Anguttara Nikaya


[Site Map]  [Home]  [Sutta Indexes]  [Glossology]  [Site Sub-Sections]

The Pali is transliterated as IAST Unicode (āīūṃṅñṭḍṇḷ). Alternatives:
[ ASCII (aiumnntdnl) | Mobile (āīūŋńñţđņļ) | Velthuis (aaiiuu.m'n~n.t.d.n.l) ]

 

Aŋguttaranikāyo
Catukkanipāto
XVIII: Sañcetana Vagga

Sutta 178

Ceto-Vimutti Suttaɱ

Adapted from the 1995 edition of the digital version of the Sri Lanka Buddha Jayanti Tripitaka Series and proofed against, and mostly resolved to the Pali Text Society Anguttara-Nikaya edited by Rev. Richard Morris, M.A., LL.D.

 


 

[1][pts][than] Evaɱ me sutaɱ:|| ||

Ekaɱ samayaɱ Bhagavā bhikkhū āmantesi:|| ||

"Bhikkhavo" ti.|| ||

"Bhadante" ti te bhikkhū Bhagavato paccassosuɱ.|| ||

Bhagavā etad avoca:|| ||

2. Cattāro'me bhikkhave puggalā santo saɱvijjamānā lokasmiɱ.|| ||

Katame cattāro?|| ||

Idha, bhikkhave, bhikkhu aññataraɱ santaɱ ceto-vimuttiɱ upasampajja viharati.|| ||

So sakkāyanirodaɱ manasikaroti,||
tassa sakkāyanirodhaɱ manasi karoto||
sakkāyanirodhe cittaɱ na pakkhandati,||
nappasīdati,||
na santiṭṭhati||
na vimuccati.|| ||

Tassa kho etaɱ bhikkhave bhikkhuno na sakkāyanirodho pāṭikaŋkho.|| ||

Seyyathā pi, bhikkhave, puriso lasāgatena||
hatthena sākhaɱ gaṇheyya,||
tassa so hattho sajjeyyāpi bajjheyyāpi,||
evam eva kho bhikkhave bhikkhu aññataraɱ santaɱ ceto-vimuttiɱ upasampajja viharati.|| ||

So sakkāyanirodhaɱ manasikaroti||
tassa sakkāyanirodhaɱ manasi karoto||
sakkāyanirodhe cittaɱ na pakkhandati||
nappasīdati||
na santiṭṭhati||
na vimuccati.|| ||

Tassa kho etaɱ bhikkhave bhikkhuno na sakkāyanirodho pāṭikaŋkho.|| ||

 

§

 

Idha pana bhikkhave bhikkhu aññataraɱ santaɱ ceto-vimuttiɱ upasampajja viharati.|| ||

So sakkāyanirodhaɱ [166] manasikaroti,||
tassa sakkāyanirodhaɱ manasi karoto||
sakkāyanirodhe cittaɱ pakkhandati||
pasīdati||
santiṭṭhati||
vimuccati.|| ||

Tassa kho etaɱ bhikkhave bhikkhuno sakkāyanirodho pāṭikaŋkho.|| ||

Seyyathā pi, bhikkhave, puriso suddhena hatthena sākhaɱ gaṇheyya,||
tassa so hattho n'eva sajjeyya na gaṇheyya na khajjeyya.|| ||

Evam eva kho bhikkhave bhikkhu aññataraɱ santaɱ ceto-vimuttiɱ upasampajja viharati.|| ||

So sakkāyanirodhaɱ manasikaroti||
tassa sakkāyanirodhaɱ manasi karoto sakkāyanirodhe cittaɱ pakkhandati||
pasīdati||
santiṭṭhati||
vimuccati.|| ||

Tassa kho etaɱ bhikkhave bhikkhuno sākkāyanirodho pāṭikaŋkho.|| ||

 

§

 

Idha pana bhikkhave bhikkhu aññataraɱ santaɱ ceto-vimuttiɱ upasampajja viharati.|| ||

So avijjāppabhedaɱ manasikaroti||
tassa avijjāppabhedaɱ manasikaroto||
avijjāppabhede cittaɱ na pakkhandati||
na ppasīdati||
na santiṭṭhati||
na vimuccati.|| ||

Tassa kho etaɱ bhikkhave bhikkhuno na avijjāppado pāṭikaŋkho.|| ||

Seyyathā pi, bhikkhave, jambāli anekavassagaṇikā,||
tassā puriso yāni c'eva āyamukhāni tāni pidabheyya,||
yāni ca apāyamukhāni tāni vivareyya,||
devo ca na sammādhāraɱ anuppaveccheyya,||
evaɱ hi tassā bhikkhave jambāliyā na pālippabhedo pāṭikaŋkho,||
evam eva kho bhikkhave bhikkhu aññataraɱ santaɱ cetovimttiɱ upasampajja viharati.|| ||

So avijjāppabhedaɱ manasikaroti,||
tassa avijjāppabhedaɱ manasi karoto||
avijjāppabhede cittaɱ na pakkhandati||
nappasīdati||
na santiṭṭhati||
na vimuccati.|| ||

Tassa kho etaɱ bhikkhave bhikkhuno na avijjāppabhedo pāṭikaŋkho.|| ||

 

§

 

Idha pana bhikkhave bhikkhu aññataraɱ santaɱ ceto-vimuttiɱ upasampajja viharati.|| ||

So avijjāppabhedaɱ manasikaroti||
tassa avijjāppabhedaɱ manasi karoto||
avijjāppabhede cittaɱ pakkhandati||
pasīdati||
santiṭṭhati||
vimuccati.|| ||

Tassa kho etaɱ bhikkhave bhikkhuno avijjāppabhedo pāṭakaŋkho.|| ||

Seyyathā pi, bhikkhave, jambāli anekavassagaṇikā,||
tassā puriso yāni c'eva āyamukhāni tāni vivareyya,||
yāni ca apāyamukhāni tāni pidaheyya,||
devo ca sammādhāraɱ anuppaveccheyya||
evaɱ hi tassā bhikkhave jambāliyā pālippabhedo pāṭikaŋkho.|| ||

Evam eva kho bhikkhave bhikkhu aññataraɱ santaɱ ceto-vimuttiɱ upasampajja viharati.|| ||

So avijjāppabhedaɱ manasikaroti||
tassa [167] avijjāppabhedaɱ manasi karoto||
avijjāppabhede cittaɱ pakkhandati||
pasīdati||
santiṭṭhati||
vimuccati.|| ||

Tassa kho etaɱ bhikkhave bhikkhuno avijjāppabhedo pāṭikaŋkho.|| ||

Ime kho bhikkhave cattāro puggalā santo saɱvijjamānā lokasmin ti.|| ||

 


Contact:
E-mail
Copyright Statement   Webmaster's Page