Anguttara Nikaya


[Site Map]  [Home]  [Sutta Indexes]  [Glossology]  [Site Sub-Sections]

The Pali is transliterated as IAST Unicode (āīūṃṅñṭḍṇḷ). Alternatives:
[ ASCII (aiumnntdnl) | Mobile (āīūŋńñţđņļ) | Velthuis (aaiiuu.m'n~n.t.d.n.l) ]

 

Aŋguttaranikāyo
Catukkanipāto
XIX: Yodhajīva Vagga

Sutta 185

Samaṇa
aka
Brāhmaṇa-Sacca Suttaɱ
aka
Catukoṭika-Suññatā Suttaɱ

Adapted from the 1995 edition of the digital version of the Sri Lanka Buddha Jayanti Tripitaka Series and proofed against, and mostly resolved to the Pali Text Society Anguttara-Nikaya edited by Rev. Richard Morris, M.A., LL.D.

 


 

[1][pts] Evaɱ me sutaɱ:|| ||

Ekaɱ samayaɱ Bhagavā Rājagahe viharati||
Gijjhakūṭe, pabbate.|| ||

Tena kho pana samayena samabahulā abhiññatā abhiññatā paribbājakā Sappinikā tīre paribbājakārāme paṭivasanti||
Seyyath'idaɱ:|| ||

Antabhāro,||
Varadharo,||
Sakuladāyī ca paribbājako||
aññe ca abhiññatā abhiññatā paribbājakā.|| ||

Atha kho Bhagavā sāyaṇhasamayaɱ patisallānā vuṭṭhito yena Sappiniyā tīre paribbājakārāmo ten'upasaŋkami.|| ||

Tena kho pana samayena tesaɱ aññatitthiyānaɱ paribbājakānaɱ sannisinnānaɱ sannipatitānaɱ ayam antarā kathā udapādi:|| ||

Iti pi brāhmaṇasaccāni,||
iti pi brāhmaṇasaccāniti.|| ||

2. Atha kho Bhagavā yena te paribbājakā ten'upasaŋkami.|| ||

Upasaŋkamitvā paññatte āsane nisīdi.|| ||

Nisajja kho Bhagavā te paribbājake etad avoca:|| ||

"Kāya nu'ttha paribbājakā etarahi kathāya sannisinnā,||
kā ca pana vo antarā kathā vippakatā" ti?|| ||

"Idha bho Gotama amhākaɱ sannisinnātaɱ sannipatitānaɱ ayam antarā kathā udapādi:|| ||

"Iti pi brāhmaṇasaccāni.|| ||

Iti pi brāhmaṇasaccāni" ti.|| ||

3. "Cattar'imāni paribbājakā brāhmaṇasaccāni mayā sayaɱ abhiññā sacchikatvā paveditāni.|| ||

Katamāni cattāri?|| ||

Idha paribbājakā brāhmaṇo evam āha:|| ||

'Sabbe pāṇā avajjha' ti.|| ||

Iti vadaɱ brāhmaṇo saccaɱ āha, no musā.|| ||

So tena na 'samaṇo' ti maññati,||
na 'brāhmaṇo' ti maññati,||
na 'seyyo'ham asmi' ti maññati,||
na 'sadiso'ham asmi' ti maññati,||
na 'hīto'ham asmi' ti maññati.|| ||

Api ca yad eva tattha saccaɱ,||
tad abhiññāya pāṇānaɱ yeva anuddayāya anukampāya paṭipanno hoti.|| ||

4. Puna ca paraɱ paribbājakā brāhmaṇo evam āha:|| ||

[177] 'Sabbe kāmā aniccā dukkhā vipariṇāma-dhammā' ti.|| ||

Iti vadaɱ brāhmaṇo saccaɱ āha, no musā.|| ||

So tena na 'samaṇo' ti maññati,||
na 'brāhmaṇo' ti maññati,||
na 'seyyo'ham asmi' ti maññati,||
na 'sadiso'ham asmi' ti maññati,||
na 'hīto'ham asmi' ti maññati.|| ||

Api ca yad eva tattha saccaɱ,||
tad abhiññāya kāmānaɱ yeva nibbidāya virāgāya nirodhāya paṭipanno hoti.|| ||

5. Puna ca paraɱ paribbājakā brāhmaṇo evam āha:|| ||

'Sabbe bhavā aniccā dukkhā vipariṇāma-dhammā' ti.|| ||

Iti vadaɱ brāhmaṇo saccaɱ āha, no musā.|| ||

So tena na 'samaṇo' ti maññati,||
na 'brāhmaṇo' ti maññati,||
na 'seyyo'ham asmi' ti maññati,||
na 'sadiso'ham asmi' ti maññati,||
na 'hīto'ham asmi' ti maññati.|| ||

Api ca yad eva tattha saccaɱ,||
tad abhiññāya bhavānaɱ yeva nibbidāya virāgāya nirodhāya paṭipanno hoti.|| ||

6. Puna ca paraɱ paribbājakā brāhmaṇo evam āha:|| ||

'Nāhaɱ kvaci,||
kassaci kiñcanaɱ tasmiɱ,||
na ca mama kvaci,||
katthaci kiñcanaɱ n'atthi' ti.|| ||

Iti vadaɱ brāhmaṇo saccaɱ āha, no musā.|| ||

So tena na 'samaṇo' ti maññati,||
na 'brāhmaṇo' ti maññati,||
na 'seyyo'ham asmi' ti maññati,||
na 'sadiso'ham asmi' ti maññati,||
na 'hīto'ham asmi' ti maññati.|| ||

Api ca yad eva tattha saccaɱ,||
tad abhiññāya ākiñcaññaɱ yeva paṭipadaɱ paṭipanno hoti|| ||

Imāni kho paribbājakā cattāri brāhmaṇasaccāni mayā sayaɱ abhiññā sacchikatvā paveditānī ti.|| ||

 


Contact:
E-mail
Copyright Statement   Webmaster's Page