Anguttara Nikaya


[Site Map]  [Home]  [Sutta Indexes]  [Glossology]  [Site Sub-Sections]

The Pali is transliterated as IAST Unicode (āīūṃṅñṭḍṇḷ). Alternatives:
[ ASCII (aiumnntdnl) | Mobile (āīūŋńñţđņļ) | Velthuis (aaiiuu.m'n~n.t.d.n.l) ]

 

Aŋguttaranikāyo
Catukkanipāto
XIX: Yodhajīva Vagga

Sutta 186

Ummagga Suttaɱ, aka Bahussuta Suttaɱ

Adapted from the 1995 edition of the digital version of the Sri Lanka Buddha Jayanti Tripitaka Series and proofed against, and mostly resolved to the Pali Text Society Anguttara-Nikaya edited by Rev. Richard Morris, M.A., LL.D.

 


 

[1][pts] Evaɱ me sutaɱ:|| ||

Ekaɱ samayaɱ Bhagavā Sāvatthiyaɱ viharati.|| ||

Atha kho aññataro bhikkhu yena Bhagavā ten'upasaŋkami.|| ||

Upasaŋkamitvā Bhagavantaɱ abhivādetvā eka-m-antaɱ nisīdi.|| ||

Eka-m-antaɱ nisinno kho so bhikkhu Bhagavantaɱ etad avoca:|| ||

"Kena nu kho bhante loko nīyati,||
kena loko parikssati,||
kassa ca uppannassa vasaɱ gacchatī?"|| ||

"Sādhu sādhu bhikkhu.|| ||

Bhaddako kho te bhikkhu ummaggo,||
bhaddakaɱ paṭihānaɱ,||
kalyāṇi paripucchā.|| ||

Evaɱ hi tvaɱ bhikkhu pucchasi:|| ||

'Kena nu kho bhante loko nīyati,||
kena loko parikssati,||
kassa ca uppannassa vasaɱ gacchatī' ti.|| ||

"Evaɱ bhante."|| ||

"Cittena kho bhikkhu||
loko nīyati,||
cittena parikssati,||
cittassa uppannassa vasaɱ gacchati.|| ||

[178] Sādhu bhante' ti||
kho so bhikkhu Bhagavato bhāsitaɱ abhinanditvā anumoditvā Bhagavantaɱ uttariɱ pañhaɱ āpucchi:|| ||

"'Bahussuto dhammadharo,||
bahussuto dhammadharo' ti vuccati.|| ||

Kittāvatā nu kho bhante bahussuto dhammadharo hotī" ti?|| ||

"Sādhu sādhu bhikkhu.|| ||

Bhaddako kho te bhikkhu ummaggo,||
bhaddakaɱ paṭihānaɱ,||
kalyāṇi paripucchā.|| ||

Evaɱ hi tvaɱ bhikkhu pucchasi:|| ||

'Bahussuto dhammadharo,
bahussuto dhammadharo' ti bhante vuccati,||
kittāvatā nu kho bhante||
bahussuto dhammadharo hotī" ti.|| ||

"Evaɱ bhante."|| ||

"Bahu kho bhikkhu mayā dhammā desitā:|| ||

Suttaɱ geyyaɱ veyyākaraṇaɱ gāthā udānaɱ itivuttakaɱ jātakaɱ abbhutadhammaɱ vedallaɱ.|| ||

Catuppadāya ce pi bhikkhu gāthāya atthaɱ aññāya dhammaɱ aññāya dhammānudhammapaṭipanno hoti,||
'bahussuto dhammadharo' ti alaɱ vacanāyāti.|| ||

"Sādhu bhante" ti||
kho so bhikkhu Bhagavato bhāsitaɱ abhinanditvā anumoditvā Bhagavantaɱ uttariɱ pañhaɱ āpucchi:|| ||

'Sutavā nibbedhikapañño',||
'Sutavā nibabedhikapañño'||
ti bhante vuccati.|| ||

Kittāvatā nu kho bhante Sutavā nibbedhikapañño hotī" ti?|| ||

"Sādhu sādhu bhikkhu.|| ||

Bhaddako kho te bhikkhu ummaggo,||
bhaddakaɱ paṭihānaɱ,||
kalyāṇi paripucchā.|| ||

Evaɱ hi tvaɱ bhikkhu pucchasi:|| ||

'Sutavā nibbedhikapañño',||
'Sutavā nibbedhikapañño', ti bhante vuccati.|| ||

Kittāvatā nu kho bhante Sutavā nibbedhikapañño hotī' ti?|| ||

"Evaɱ bhante."|| ||

Idha bhikkhu bhikkhuno||
"Idaɱ dukkhan" ti sutaɱ hoti,||
paññāya c'assa atthaɱ ativijjha passati.|| ||

"Ayaɱ dukkhasamudayo" ti sutaɱ hoti,||
paññāya c'assa atthaɱ ativijjha passati.|| ||

"Ayaɱ dukkhanirodho" ti sutaɱ hoti,||
paññāya c'assa atthaɱ ativijjha passati.|| ||

"Ayaɱ dukkhanirodhagāminī paṭipadā" ti sutaɱ hoti,||
paññāya c'assa atthaɱ ativijjha passati.|| ||

Evaɱ kho bhikkhu Sutavā nibbedhikapañño hotī" ti.|| ||

"Sādhu bhante" ti||
kho so bhikkhu Bhagavato bhāsitaɱ abhinanditvā anumoditvā Bhagavantaɱ uttariɱ pañhaɱ āpucchi:|| ||

'Paṇḍito mahāpañño',||
'paṇḍito mahāpañño' ti bhante vuccati.|| ||

Kittāvatā nu kho bhante paṇḍito hotī" ti?|| ||

"Sā[179] dhu sādhu bhikkhu.|| ||

Bhaddako kho te bhikkhu ummaggo,||
bhaddakaɱ paṭihānaɱ,||
kalyāṇi paripucchā.|| ||

Evaɱ hi tvaɱ bhikkhu pucchasi:|| ||

'Paṇḍito mahāpañño',||
'paṇḍito mahāpañño'ti bhante vuccati,||
kittāvatā nu kho bhante paṇḍito mahāpañño hotīti?|| ||

"Evaɱ bhante."|| ||

"Idha bhikkhu paṇḍito mahāpañño n'ev'attavyābādhāya ceteti,||
na paravyābādhāya ceteti,||
na ubanayavyābādhāya ceteti.|| ||

Attahitaɱ parahitaɱ ubayahitaɱ sabbalokahitam eva cintayamāno cinteti.|| ||

Evaɱ kho bhikkhu paṇḍito mahāpañño hotī" ti.|| ||

 


Contact:
E-mail
Copyright Statement   Webmaster's Page