Anguttara Nikaya


[Site Map]  [Home]  [Sutta Indexes]  [Glossology]  [Site Sub-Sections]

The Pali is transliterated as IAST Unicode (āīūṃṅñṭḍṇḷ). Alternatives:
[ ASCII (aiumnntdnl) | Mobile (āīūŋńñţđņļ) | Velthuis (aaiiuu.m'n~n.t.d.n.l) ]

 

Aŋguttaranikāyo
Catukkanipāto
XIX: Yodhajīva Vagga

Sutta 187

Dutiya Vassakāra Suttaɱ

Adapted from the 1995 edition of the digital version of the Sri Lanka Buddha Jayanti Tripitaka Series and proofed against, and mostly resolved to the Pali Text Society Anguttara-Nikaya edited by Rev. Richard Morris, M.A., LL.D.

 


 

[1][pts] Evaɱ me sutaɱ:|| ||

Ekaɱ samayaɱ Bhagavā Rājagahe viharati Veḷuvane Kalandakanivāpe.|| ||

Atha kho Vassakāro brāhmaṇo Magadhamahāmātto yena Bhagavā ten'upasaŋkami.|| ||

Upasaŋkamitvā Bhagavatā saddhiɱ samamodi.|| ||

Sammodanīyaɱ kathaɱ sārāṇiyaɱ vītisāretvā eka-m-antaɱ nisīdi.|| ||

Eka-m-antaɱ nisinno kho Vassakāro brāhmaṇo Magadhamahāmatto Bhagavantiɱ etad avoca:|| ||

 

§

 

Jāneyya nu kho bho Gotama asappuriso asappurisaɱ:|| ||

"Asappuriso ayaɱ bhavan" ti?|| ||

Aṭṭhānaɱ kho etaɱ brāhmaṇa anavakāso yaɱ asappuriso asappurisaɱ jāneyya:|| ||

"Asappuriso ayaɱ bhavan" ti.|| ||

 

§

 

Jāneyya pana bho Gotama asappuriso sappurisaɱ:

"Sappuriso ayaɱ bhavan" ti?|| ||

Etam pi kho brāhmaṇa aṭṭhāna anavakāso yaɱ asappuriso sappurisaɱ jāneyya:|| ||

"Sappuriso ayaɱ bhavan" ti.|| ||

 

§

 

Jāneyya, pana bho Gotama sappuriso sappurisaɱ:|| ||

"Sappuriso ayaɱ bhavan" ti?|| ||

Ṭhānaɱ kho etaɱ brāhmaṇa vijjati,||
yaɱ sappuriso sappurisaɱ jāneyya:|| ||

"Sappuriso ayaɱ bhavan" ti.|| ||

 

§

 

Jāneyya, pana bho Gotama sappuriso asappurisaɱ:|| ||

"Asappuriso ayaɱ bhavan" ti.|| ||

Etam pi kho brāhmaṇa ṭhānaɱ vijjati,||
yaɱ sappuriso asappurisaɱ jāneyya:|| ||

'Asappuriso ayaɱ bhavan' ti.|| ||

 

§

 

Acchariyaɱ bho Gotama,||
abbhutaɱ bho Gotama,||
yāva [180] subhāsitaɱ vidaɱ bhotā Gotamena:|| ||

"Aṭṭhānaɱ kho etaɱ brahmaṇa anavakāso,||
yaɱ asappuriso asappurisaɱ jāneyya|| ||

'Asappuriso ayaɱ bhavan' ti.|| ||

Etam pi kho brāhmaṇa aṭṭhānaɱ anavakāso,||
yaɱ asappuriso sappurisaɱ jāneyya:|| ||

'Sappuriso ayaɱ bhavan' ti.|| ||

Ṭhānaɱ kho etaɱ brāhmaṇa vijjati,||
yaɱ sappuriso sappurisaɱ jāneyya:|| ||

'Sappuriso ayaɱ bhavan' ti.|| ||

Etam pi kho brāhmaṇa ṭhānāɱ vijjati,||
yaɱ sappuriso asappurisaɱ jāneyya:|| ||

'Asappuriso ayaɱ bhavan' ti.|| ||

 


 

Ekam idaɱ bho Gotama samayaɱ Todeyyassa brāhmaṇassa parisatiɱ parūpārambhaɱ vattenti:|| ||

"Bālo ayaɱ rājā Eḷeyyo yo samaṇe Rāmaputte abhippasanno,||
samaṇe ca pana Rāmaputte evarūpaɱ paramanipaccākāraɱ karoti:|| ||

Yad idaɱ abhivādanaɱ paccuṭṭhānaɱ añjalikammaɱ sāmīcikamman ti.|| ||

Ime pi rañño Eḷeyyassa parihārakā bālā,||
Yamako Moggallo Uggo Nāvindakī Gandhabbo Aggivesso,||
ye samaṇe Rāmaputte abhippasannā,||
samaṇe ca pana Rāmaputte evarūpaɱ paramanipaccākāraɱ karonti:|| ||

Yad idaɱ abhivādanaɱ paccuṭṭhānaɱ añjalikammaɱ sāmīcikamman" ti.|| ||

'Tyāssudaɱ Todeyyo brāhmaṇo iminā nayena neti:|| ||

Taɱ kiɱ maññanti bhonto?|| ||

"Paṇḍito rājā Eḷeyyo karaṇīyādhikaraṇīyesu vacanīyādhivacanīyesu alamatthadasatarehi alamatthadasataro" ti.'|| ||

'Evaɱ bho.|| ||

"Paṇḍito rājā Eḷeyyo karaṇīyādhikaraṇiyesu vacanīyādhivacanīyesu alamatthadasatarehī alamatthadasataro" ti.|| ||

Yasmā ca kho bhonto,||
samaṇo Rāmaputto raññā phalayyena paṇḍitena paṇḍitataro karaṇiyādhikaraṇīyesu vacanīyādhivacanīyesu alamattadasatarena alamatthadasataro,||
tasmā rājā Eḷeyyo samaṇe Rāmaputte abhippasanno,||
samaṇe va pana Rāmaputte evarūpaɱ paramanipaccakāraɱ karoti:|| ||

Yad idaɱ abhivādanaɱ paccuṭṭhānaɱ añjalikammaɱ sāmīcikammaɱ.'|| ||

'Taɱ kiɱ maññanti bhonto?|| ||

"Paṇḍitā rañño Eḷeyyassa parihārakā,||
Yamako Moggallo [181] Uggo Nāvindakī Gandhabbo Aggivesso,||
karaṇīyādhikiraṇiyesu vacanīyādhivacanīyesu alamatthadasatarehi alamatthadasatarā" ti.'|| ||

'Evaɱ bho.|| ||

"Paṇḍitā rañño Eḷeyyassa parihārakā,||
Yamako Moggallo Uggo Nāvindakī Gandhabbo Aggivesso,||
karaṇīyādhikaraṇiyesu vacanīyādhivacanīyesu alamatdasatarehi alamatthadasatarā" ti.|| ||

Yasmā kho bho,||
samaṇo rāmāputto rañño Eḷeyyassa parihārakehi paṇḍitehi paṇḍitataro karaṇīyādhikaraṇīyesu vacanīyādhivacanīyesu alamatthadasatarehi alamatthadasataro.|| ||

Tasmā rañño Eḷeyyassa parihārakā samaṇe Rāmaputte abhippasannā samaṇe ca pana rāmapute evarūpaɱ paramanipaccakāraɱ karonti:|| ||

Yad idaɱ abhivādanaɱ paccuṭṭhānaɱ añjalikammaɱ sāmīcikamman' ti.|| ||

Acchariyaɱ bho Gotama abbhutaɱ bho Gotama yāva subhāsitamidaɱ bhotā Gotamena:|| ||

"Aṭṭhānaɱ kho etaɱ brahmaṇa anavakāso||
yaɱ asappuriso asappurisaɱ jāneyya|| ||

'Asappuriso ayaɱ bhavan' ti.|| ||

Etam pi kho brāhmaṇa aṭṭhānaɱ anavakāso,||
yaɱ asappuriso sappurisaɱ jāneyya:|| ||

'Sappuriso ayaɱ bhavan' ti.|| ||

Ṭhānaɱ kho etaɱ brāhmaṇa vijjati,||
yaɱ sappuriso sappurisaɱ jāneyya:|| ||

'Sappuriso ayaɱ bhavan' ti.|| ||

Etam pi kho brāhmaṇa ṭhānāɱ vijjati,||
yaɱ sappuriso asappurisaɱ jāneyya:|| ||

'Asappuriso ayaɱ bhavan' ti.|| ||

Bhanda vadāni mayaɱ bho Gotama gacchāma, bahukicchā mayaɱ bahukaraṇīyāti.|| ||

Yassadāni tvaɱ brāhmaṇa kālaɱ maññasīti.|| ||

Atha kho Vassakāro brāhmaṇo Magadhamahāmatto Bhagavato bhāsitaɱ abhinanditvā anumoditvā uṭṭhāy āsanā pakkāmī ti.|| ||

 


Contact:
E-mail
Copyright Statement   Webmaster's Page