Anguttara Nikaya


[Site Map]  [Home]  [Sutta Indexes]  [Glossology]  [Site Sub-Sections]

The Pali is transliterated as IAST Unicode (āīūṃṅñṭḍṇḷ). Alternatives:
[ ASCII (aiumnntdnl) | Mobile (āīūŋńñţđņļ) | Velthuis (aaiiuu.m'n~n.t.d.n.l) ]

 

Aŋguttaranikāyo
Catukkanipāto
XIX: Yodhajīva Vagga

Sutta 190

Uposatha Suttaɱ aka Bhikkhu-Saŋghatho-Mana Suttaɱ

Adapted from the 1995 edition of the digital version of the Sri Lanka Buddha Jayanti Tripitaka Series and proofed against, and mostly resolved to the Pali Text Society Anguttara-Nikaya edited by Rev. Richard Morris, M.A., LL.D.

 


 

[1][pts] Evaɱ me sutaɱ:|| ||

Ekaɱ samayaɱ Bhagavā Sāvatthiyaɱ viharati||
Pubbārāme Migāramātupāsāde.|| ||

Tena kho pana samayena Bhagavā tadahuposathe bhikkhu-saŋghaparivuto nisinno hoti.|| ||

Atha kho Bhagavā tuṇhībhutaɱ tuṇhībhutaɱ bhikkhu-saŋghaɱ anuviloketvā bhikkhu āmantesi:|| ||

Apalāpā'yaɱ bhikkhave parisā.|| ||

Nippalāpā'yaɱ bhikkhave parisā suddhā sāre patiṭṭhitā.|| ||

Tathārūpo ayaɱ bhikkhave bhikkhusaŋgho.|| ||

Tathārūpā'yaɱ bhikkhave parisā yathārūpā parisā dullabhā dassanāya pi lokasmiɱ.|| ||

Tathārūpo ayaɱ bhikkhave bhikkhusaŋgho.|| ||

Tathārūpā'yaɱ bhikkhave parisā āhuneyyā pāhuṇeyyā dakkhiṇeyyā añjalikaraṇīyo anuttaraɱ puññakkhettaɱ lokassa.|| ||

Tathārūpo ayaɱ bhikkhave bhikkusaŋgho.|| ||

Tathārūpā'yaɱ bhikkhave parisā yathārūpāyaɱ parisā appam pi dinnaɱ bahuɱ hoti,||
bahuɱ dinnaɱ bahutaraɱ.|| ||

Tathārūpo ayaɱ bhikkhave bhikkhusaŋgho.|| ||

Tathārūpā'yaɱ bhikkhave parisā yathārūpaɱ parisaɱ alaɱ yojanagaṇanāni pi dassanāya gantuɱ api puṭaɱsenāpi.|| ||

Tathārūpo ayaɱ bhikkhave bhikkhusaŋgho.|| ||

[184] Santi bhikkhave bhikkhu imasmiɱ bhikkhusaŋghe devappattā viharanti.|| ||

Santi, bhikkhave, bhikkhu imasmiɱ bhikkhusaŋghe brahmappattā viharanti.|| ||

Santi, bhikkhave, bhikkhu imasmiɱ bhikkhusaŋghe āneñjappattā viharanti.|| ||

Santi, bhikkhave, bhikkhu imasmiɱ bhikkhusaŋghe ariyappattā viharanti.|| ||

Kataɱ ca bhikkhave bhikkhu devappatto hoti?|| ||

Idha, bhikkhave, bhikkhu vivicc'eva kāmehi vivicca akusalehi dhamamehi savitakkaɱ savicāraɱ vivekajaɱ pīti-sukhaɱ paṭhamaɱ jajhānaɱ upasampajja viharati.|| ||

Vitakkavicārānaɱ vupasamā ajjhattaɱ sampasādanaɱ cetaso ekodī-bhāvaɱ avitakkaɱ avicāraɱ samādhijaɱ pīti-sukhaɱ dutiyaɱ jjhānaɱ upasampajja viharati.|| ||

Pītiyā ca virāgā upekkhako ca viharati||
sato ca sampajāno,||
sukhañ ca kāyena paṭisaŋvedeti yaɱ taɱ ariyā āvikkhanti|| ||

'upekkhako satimā sukhavihārī'|| ||

ti tatiyajjhānaɱ upasampajja viharati.|| ||

Sukhassa ca pahānā dukkhassa ca pahānā pubb'eva somanassa-domanassānaɱ attha-gamā adukkhaɱ-asukhaɱ upekkhā-sati-pārisuddhiɱ catutthajjhānaɱ upasampajja viharati.|| ||

Evaɱ kho bhikkhave bhikkhu devappatto hoti.|| ||

Kathaɱ ca bhikkhave bhikkhu brahmappatto hoti?|| ||

Idha, bhikkhave, bhikkhu mettāsahagatena cetasā ekaɱ disaɱ pharitvā viharati.|| ||

Tathā dutiyaɱ disaɱ pharitvā viharati.|| ||

Tathā tatiyaɱ disaɱ pharitvā viharati.|| ||

Tathā catutthiɱ disaɱ pharitvā viharati.|| ||

Iti uddham-adho tiriyaɱ sabbadhi sabbattatāya sabbāvantaɱ lokaɱ mettāsahagatena cetasā vipulena mahaggatena appamāṇena averena akhyāpajjhena pharitvā viharati.|| ||

Karuṇāsahagatena cetasā vipulena mahaggatena appamāṇena averena akhyapajjhena pharitvā viharati.|| ||

Muditāsahagatena cetasā vipulena mahaggatena appamāṇena averena akhyāpajjheta pharitvā viharati.|| ||

Upekkhāsahagatena cetasā vipulena mahaggatena appamāṇena averena akhyāpajjheta pharitvā viharati.|| ||

Upekkhāsahagatena cetasā ekaɱ disaɱ pharitvā viharati.|| ||

Tathā dutiyaɱ disaɱ paritvā viharati.|| ||

Tathā tatiyaɱ disaɱ pharitvā viharati.|| ||

Tathā catutthiɱ disaɱ paritvā viharati.|| ||

Iti uddham-adho tiriyaɱ sabbadhi sabbattatāya sabbāvantaɱ lokaɱ upekkhāsahagatena cetasā vipulena mahaggatena appamāṇena averena adhyāpajjhena pharitvā viharati.|| ||

Evaɱ kho bhikkhave bhikkhu brahmappatto hoti.|| ||

Kathaɱ ca bhikkhave bhikkhu āneñjappatto hoti?|| ||

Idha, bhikkhave, bhikkhu sabbaso rūpa-saññānaɱ samatikkamā paṭigha-saññānaɱ attha-gamā nānattasaññānaɱ amasikārā|| ||

'anatto ākāso' ti|| ||

ākāsānañcāyatanaɱ upasampajja viharati.|| ||

Sabbaso ākāsānañcāyatanaɱ samatikkamma|| ||

'Anantaɱ viññāṇan' ti|| ||

viññāṇañcāyatanaɱ upasampajja viharati.|| ||

Sabbaso viññāṇañcāyatanaɱ samatikkamma|| ||

'n'atthi kiñci' ti|| ||

ākiñcaññāyatanaɱ upasampajja viharati.|| ||

Sabbaso ākiñcaññāyatanaɱ samatikkamma n'eva-saññā-nāsaññāyatanaɱ upasampajja viharati.|| ||

Evaɱ kho bhikkhave bhikkhu āneñjappatto hoti.|| ||

Kathaɱ ca bhikkhave bhikkhu ariyappatto hoti?|| ||

Idha, bhikkhave, bhikkhu|| ||

'Idaɱ dukkhan' ti yathābhūtaɱ pajānāti.|| ||

'Ayaɱ dukkhasamadayo' ti yathābhutaɱ pajānāti.|| ||

'Ayaɱ dukkhanirodho' ti yathābhutaɱ pajānāti.|| ||

'Ayaɱ dukkhanirodhagāminī paṭipadatā' ti yathābhutaɱ pajānāti.|| ||

Evaɱ kho bhikkhave bhikkhu ariyappatto hotī ti.|| ||

Yodhajīva Vagga (Brāhmaṇa Vaggo) Catuttho|| ||

 


Contact:
E-mail
Copyright Statement   Webmaster's Page