Anguttara Nikaya


[Site Map]  [Home]  [Sutta Indexes]  [Glossology]  [Site Sub-Sections]

The Pali is transliterated as IAST Unicode (āīūṃṅñṭḍṇḷ). Alternatives:
[ ASCII (aiumnntdnl) | Mobile (āīūŋńñţđņļ) | Velthuis (aaiiuu.m'n~n.t.d.n.l) ]

 

Aŋguttaranikāyo
Catukkanipāto
XX: Mahā Vagga

Sutta 191

Sotānudhata Suttaɱ

Adapted from the 1995 edition of the digital version of the Sri Lanka Buddha Jayanti Tripitaka Series and proofed against, and mostly resolved to the Pali Text Society Anguttara-Nikaya edited by Rev. Richard Morris, M.A., LL.D.

 


 

[1][pts] Evaɱ me sutaɱ:|| ||

Ekaɱ samayaɱ Bhagavā Sāvatthiyaɱ viharati.|| ||

Tatra kho Bhagavā bhikkhū āmantesi:|| ||

"Bhikkhavo" ti.|| ||

"Bhadante" ti te bhikkhū Bhagavato paccassosuɱ.|| ||

Bhagavā etad avoca:|| ||

2. Sotānugatānaɱ Bhikkhave dhammānaɱ vacasā paricitānaɱ manasānupekkhitānaɱ diṭṭhiyā suppaṭividdhānaɱ cattāro ānisaɱsā paṭikaŋkhā.|| ||

Katame cattāro?|| ||

Idha, bhikkhave, bhikkhu dhammaɱ pariyāpuṇāti:|| ||

Suttaɱ Geyyaɱ Veyyākaraṇaɱ Gāthā Udānaɱ Itivuttakaɱ Jātakaɱ Ababhutadhammaɱ Vedallaɱ.|| ||

Tassa te dhammā sotānudhatā honti vacasā paricitā manasānupekkhitā diṭṭhiyā suppaṭividdhā.|| ||

So muṭṭhassati kālaɱ kuramāno aññataraɱ devanikāyaɱ upapajjati.|| ||

Tassa tattha sukhino dhammapadāni pi lapanti.|| ||

Dandho bhikkhave sattuppādo,||
atha so satto khippaɱ yeva visesagāmī hoti.|| ||

Sotānugatānaɱ bhikkhave dhammānaɱ vacasā paricitānaɱ manasānupekkhitānaɱ diṭṭhiyā suppaṭividdhānaɱ||
ayaɱ paṭhamo ānisaɱso pāṭikaŋkho.|| ||

 

§

 

2. Puna ca paraɱ bhikkhave bhikkhu dhammaɱ pariyāpuṇāti:|| ||

Suttaɱ Geyyaɱ Veyyākaraṇaɱ Gāthā Udānaɱ Itivuttakaɱ Jātakaɱ Ababhutadhammaɱ Vedallaɱ.|| ||

Tassa te dhammā sotānudhatā honti vacasā paricitā manasānupekkhitā diṭṭhiyā suppaṭividdhā.|| ||

So muṭṭhassati kālaɱ kuramāno aññataraɱ devanikāyaɱ upapajjati.|| ||

Tassa tattha na h'eva kho sukhino dhammapadāni pi lapanti,||
api ca kho bhikkhu iddhimā cetovasippatto devaparisāyaɱ dhammaɱ deseti.|| ||

Tass'evaɱ hoti:|| ||

'Ayaɱ vā so dhammavinayo yatthāhaɱ pubbe brahmacariyahaɱ acarin' ti.|| ||

Dandho bhikkhave satuppādo,||
atha so satto khippaɱ yeva visesagāmī hoti.|| ||

Seyyathā pi, bhikkhave, puriso kusalo bherisaddassa,||
so addhānamagga paṭipanno bherisaddaɱ suṇeyya,||
tassa na h'eva kho assa kaŋkā vā vimati vā bherisaddo nu kho na nu kho bherisaddo ti,||
atha kho bherisaddo t'eva niṭṭhaɱ gaccheyya,||
evam eva kho bhikkhave bhikkhu dhammaɱ [186]pariyāpuṇāti:|| ||

Suttaɱ Geyyaɱ Veyyākaraṇaɱ Gāthā Udānaɱ Itivuttakaɱ Jātakaɱ Ababhutadhammaɱ Vedallaɱ.|| ||

Tassa te dhammā sotānudhatā honti vacasā paricitā manasānupekkhitā diṭṭhiyā suppaṭividdhā.|| ||

So muṭṭhassati kālaɱ kuramāno aññataraɱ devanikāyaɱ upapajjati.|| ||

Tassa tattha na h'eva kho sukhino dhammapadāni pi lapanti,||
api ca kho bhikkhu iddhimā cetovasippatto devaparisāyaɱ dhammaɱ deseti.|| ||

Tass'evaɱ hoti:|| ||

'Ayaɱ vā so dhammavinayo yatthāhaɱ pubbe brahmacariyahaɱ acarin' ti.|| ||

Dandho bhikkhave satuppādo,||
atha so satto khippaɱ yeva visesagāmī hoti.|| ||

Sotānugatānaɱ bhikkhave dhammānaɱ vacasā paricitānaɱ manasānupekkhitānaɱ diṭṭhiyā suppaṭividdhānaɱ||
ayaɱ dutiyo ānisaɱso pāṭkaŋkho.

 

§

 

3. Puna ca paraɱ bhikkhave bhikkhu dhammaɱ pariyāpuṇāti:|| ||

Suttaɱ Geyyaɱ Veyyākaraṇaɱ Gāthā Udānaɱ Itivuttakaɱ Jātakaɱ Ababhutadhammaɱ Vedallaɱ.|| ||

Tassa te dhammā sotānudhatā honti vacasā paricitā manasānupekkhitā diṭṭhiyā suppaṭividdhā.|| ||

So muṭṭhassati kālaɱ kuramāno aññataraɱ devanikāyaɱ upapajjati.|| ||

Tassa tattha na h'eva kho sukhino dhammapadāni pi lapanti,||
napi bhikkhu iddhimā cetovasippatto devaparisāyaɱ dhammaɱ deseti,||
api ca kho devaputto devaparisāyaɱ dhammaɱ deseti.|| ||

Tass'evaɱ hoti:|| ||

Ayaɱ vā so dhammavinayo yatthāhaɱ pubbe brahmacariyaɱ acarin ti.|| ||

Dandho bhikkhave satuppādo,||
atha so satto khippaɱ yeva visesagāmi hoti.|| ||

Seyyathā pi, bhikkhave, puriso kusalo saŋkhasaddassa,||
so addhānamaggapaṭipanno saŋkhasaddaɱ suṇeyya,||
tassa na h'eva kho assa kaŋkhā vā vimati va saŋkhasaddo nu kho na nu kho saŋkhasaddo ti,||
atha kho saŋkhasaddo t'eva niṭṭhaɱ gaccheyya,||
evam eva kho bhikkhave bhikkhu dhammaɱ pariyāpuṇāti:|| ||

Suttaɱ Geyyaɱ Veyyākaraṇaɱ Gāthā Udānaɱ Itivuttakaɱ Jātakaɱ Ababhutadhammaɱ Vedallaɱ.|| ||

Tassa te dhammā sotānudhatā honti vacasā paricitā manasānupekkhitā diṭṭhiyā suppaṭividdhā.|| ||

So muṭṭhassati kālaɱ kuramāno aññataraɱ devanikāyaɱ upapajjati.|| ||

Tassa tattha na h'eva kho sukhino dhammapadāni pi lapanti,||
napi bhikkhu iddhimā cetovasippatto devaparisāyaɱ dhammaɱ deseti,||
api ca kho devaputto devaparisāyaɱ dhammaɱ deseti.|| ||

Tass'evaɱ hoti:|| ||

Ayaɱ vā so dhammavinayo yatthāhaɱ pubbe brahmacariyaɱ acarin ti.|| ||

Dandho bhikkhave satuppādo,||
atha so satto khippaɱ yeva visesagāmi hoti.|| ||

Sotānugatānaɱ bhikkhave dhammānaɱ vacasā paricitānaɱ manasānupekkhitānaɱ diṭṭhiyā suppaṭividdhānaɱ||
ayaɱ tatiyo ānisaɱso pāṭikaŋkho.|| ||

 

§

 

4. Puna ca paraɱ bhikkhave bhikkhu dhammaɱ pariyāpuṇāti:|| ||

Suttaɱ Geyyaɱ Veyyākaraṇaɱ Gāthā Udānaɱ Itivuttakaɱ Jātakaɱ Ababhutadhammaɱ Vedallaɱ.|| ||

Tassa te dhammā sotānudhatā honti vacasā paricitā manasānupekkhitā diṭṭhiyā suppaṭividdhā.|| ||

So muṭṭhassati kālaɱ kuramāno aññataraɱ devanikāyaɱ upapajjati.|| ||

Tassa tattha na h'eva kho sukhino dhammapadāni pi lapanti,||
napi bhikkhu iddhimā cetovasippatto devaparisāyaɱ dhammaɱ deseti,||
napi devaputto devaparisāyaɱ dhammaɱ deseti,||
api ca kho opapātiko opapātikaɱ sāreti:|| ||

"Sarasi tvaɱ mārisa||
sarasi tvaɱ mārisa||
yattha mayaɱ pubbe brahmacariyaɱ acarimhā" ti?|| ||

So evam āha:|| ||

"Sarāmi mārisa||
sarāmi mārisā" ti.|| ||

Dandho bhikkhave sattupādo,||
atha so satto khippaɱ yeva visesagāmī hoti.|| ||

Seyyathā pi, bhikkhave, dve sahayakā sahapaɱsukīḷikā,||
te kadāci karahaci aññamaññaɱ samāgaccheyyuɱ,||
tam enaɱ sahāyako sahāyakaɱ evaɱ vadeyya:|| ||

"Idam pi samma sarasī||
idam pi me samma sarasī" ti?|| ||

So evaɱ vadeyya:|| ||

[187] "Sarāmi samma||
sarāmi sammaā" ti||
evam eva kho bhikkhave bhikkhu dhammaɱ pariyāpuṇāti:|| ||

Suttaɱ Geyyaɱ Veyyākaraṇaɱ Gāthā Udānaɱ Itivuttakaɱ Jātakaɱ Ababhutadhammaɱ Vedallaɱ.|| ||

Tassa te dhammā sotānudhatā honti vacasā paricitā manasānupekkhitā diṭṭhiyā suppaṭividdhā.|| ||

So muṭṭhassati kālaɱ kuramāno aññataraɱ devanikāyaɱ upapajjati.|| ||

Tassa tattha na h'eva kho sukhino dhammapadāni pi lapanti,||
napi bhikkhu iddhimā cetovasippatto devaparisāyaɱ dhammaɱ deseti,||
napi devaputto devaparisāyaɱ dhammaɱ deseti,||
api ca kho opapātiko opapātikaɱ sāreti:|| ||

"Sarasi tvaɱ mārisa||
sarasi tvaɱ mārisa||
yattha mayaɱ pubbe brahmacariyaɱ acarimhā" ti?|| ||

So evam āha:|| ||

"Sarāmi mārisa||
sarāmi mārisā" ti.|| ||

Dandho bhikkhave sattupādo,||
atha so satto khippaɱ yeva visesagāmī hoti.|| ||

Sotānudhatānaɱ bhikkhave dhammanaɱ vacasā paricitānaɱ manasānupekkhitānaɱ diṭaṭhiyā suppaṭividdhānaɱ||
ayaɱ catuttho ānisaɱso pāṭikaŋkho.|| ||

Sotānugatānaɱ bhikkhave dhammānaɱ vacasā paricitānaɱ manasānupekkhitānaɱ diṭṭhiyā suppaṭividdhānaɱ||
ime cattāro ānisaɱsā pāṭikaŋkhā ti.|| ||

 


Contact:
E-mail
Copyright Statement   Webmaster's Page