Samyutta Nikaya Masthead


[Site Map]  [Home]  [Sutta Indexes]  [Glossology]  [Site Sub-Sections]

The Pali is transliterated as IAST Unicode (āīūṃṅñṭḍṇḷ). Alternatives:
[ ASCII (aiumnntdnl) | Mobile (āīūŋńñţđņļ) | Velthuis (aaiiuu.m'n~n.t.d.n.l) ]

 

Anguttara Nikaya
Catukkanipata

Sutta 192

Ṭhānasuttaɱ

Adapted from the 1995 edition of the digital version of the Sri Lanka Buddha Jayanti Tripitaka Series and proofed against, and mostly resolved to the Pali Text Society Anguttara-Nikaya edited by Rev. Richard Morris, M.A., LL.D.

 


 

[1][pts][ati] Cattār'imāni bhikkhave ṭhānāni catuhi ṭhānehi veditabbāni.|| ||

Katamāni cattāri?|| ||

Saɱvāsena bhikkhave sīlaɱ veditabbaɱ,||
tañ ca kho dīghena addhunā na ittaraɱ||
manasikarotā no amanasi-kārā,||
paññavatā no duppaññena.|| ||

Saɱvohārena bhikkhave soceyyaɱ veditabbaɱ,||
tañ ca kho dīghena addhunā na ittaraɱ||
manasikarotā no amanasi-kārā||
paññavatā no duppaññena.|| ||

Apadāsu bhikkhave thāmo veditabbo,||
so ca kho dīghena addhunā na ittaraɱ||
manasikarotā no amanasi-kārā||
paññāvatā no duppaññena.|| ||

Sākacchāya bhikkhave paññā veditabbā,||
sā ca kho dīghena addhunā na ittaraɱ||
manasikarotā no amanasikarā||
paññāvatā no duppaññena.|| ||

 

§

 

[2][pts][ati] Saɱvāsena bhikkhave sīlaɱ veditabbaɱ,||
tañ ca kho dīghena addhunā na ittaraɱ,||
manasikarotā no amanasikārā,||
paññāvatā no duppaññenāti.|| ||

Iti kho pan'etaɱ vuttaɱ.|| ||

Kiñ c'etaɱ paṭicca vuttaɱ?|| ||

Idha, bhikkhave, puggalo puggalena saddhiɱ saɱvasamāno evaɱ jānāti:|| ||

Dīgharattaɱ kho ayam āyasmā khaṇḍakārī chiddakārī sabalakārī kammāsakārī na santatakārī na santatavutti sīlesu,||
dussīlo ayam āyasmā,||
nāyaɱ āyasmā sīlavā ti.|| ||

Idha pana bhikkhave puggalo puggalena saddhiɱ saɱvasamāne evaɱ jānāti:|| ||

Dīgharattaɱ kho ayam āyāsmā akhaṇḍakārī acchiddakārī asabalakārī akammāsakārī san- [188] tatakārī santatavutti silesu,||
sīlavā ayam āyasmā,||
nāyaɱ āyasmā dussīlo ti.|| ||

Saɱvāsena bhikkhave sīlaɱ veditabbaɱ,||
tañ ca kho dīghena addhunā na ittaraɱ,||
manasikarotā no amanasikārā,||
paññavatā no duppaññenāti||
— iti yaɱ taɱ vuttaɱ,||
idam etaɱ paṭicca vuttaɱ.|| ||

 

§

 

[3][pts][ati] Saɱvohārena bhikkhave soceyyaɱ veditabbaɱ,||
tañ ca kho dīghena addhunā na ittaraɱ,||
manasakarotā no amanasikārā,||
paññavatā no duppaññenāti.|| ||

Iti kho pan'etaɱ vuttaɱ.|| ||

Kiñ c'etaɱ paṭicca vuttaɱ?|| ||

Idha, bhikkhave, puggalo puggalena saddhiɱ saɱvohāramāno evaɱ jānāti:|| ||

Aññatā kho ayam āyasmā ekena eko voharati,||
aññathā dvīhi,||
aññathā tīhi,||
aññathā sambahulehi,||
vokkamati ayam āyasmā purimavohārā pacchimavohārā,||
aparisuddhavohāro ayam āyasmā,||
nāyam āyasmā parisuddhavohāro ti.|| ||

Idha pana bhikkhave puggalo puggalena saddhiɱ saɱvohāramāno evaɱ jānāti:|| ||

Yath'eva kho ayam āyasmā ekena eko voharati,||
tathā dvīhi,||
tathā tīhi,||
tathā sambahulehi,||
nāyam āyasmā vokkamati purimavohārā pacchamavohārā, parisuddhavohāro ayam āyasmā,||
nāyam āyasmā aparisuddhavohāro ti.|| ||

Saɱvohārena bhikkhave soceyyaɱ veditabbaɱ,||
tañ ca kho dīghena addhunā na ittaraɱ,||
manasikarotā no amanasikārā,||
paññavatā no duppaññenāti||
— iti kho pan'etaɱ vuttaɱ,||
idam etaɱ paṭicca vuttaɱ.|| ||

 

§

 

[4][pts][ati] Āpadāsu bhikkhave thāmo veditabbo,||
so ca kho dīghena addhunā na ittaraɱ,||
manasikarotā no amanasikārā||
paññavatā no duppaññenāti.|| ||

Iti kho pan'etaɱ vuttaɱ.|| ||

Kiñ c'etaɱ paṭicca vuttaɱ?|| ||

Idha, bhikkhave, ekacco ñātivyasanena vā phuṭṭho samāno bhogavyasanena vā phuṭṭho samāno rogavyasanena vā phuṭṭho samāno [na] iti paṭisañcikkhati:|| ||

Tathābhuto kho ayaɱ lokasannivāso tathābhuto attabhāvapaṭilābho,||
yathābhute lonakasannivāse yathābhute attabhāvapaṭilābhe aṭṭha lokadhammā lokaɱ anuparivattanti,||
loko c'aṭṭha lokadhamme anuparivattati:||
lābho ca alābho ca||
ayaso ca yaso ca||
nindā ca pasaɱsā ca||
sukhañ ca dukkhañ cā ti.|| ||

So ñātivyasanena vā phuṭṭho samāno bhogavyasanena vā phuṭṭho samāno rogavyasanena vā phuṭṭho samāno socati kilamati paridevati urattāḷiɱ kandati sammohaɱ āpajjati.|| ||

Idha pana bhikkhave ekacco ñātivyasanena vā phuṭṭho samāno bhogavyasanena vā phuṭṭho samāno ro- [189] gavyasanena vā phuṭṭho samāno iti paṭisañcikkhati:|| ||

Tathābhuto kho ayaɱ lokasannivāso tathābhuto attabhāvapaṭilābho,||
yathābhute lokasannivāse yathābhute attabhāvapaṭilābhe aṭṭha lokadhammā lokaɱ anuparivattanti,||
loko c'aṭṭha lokadhamme anuparivattati:||
lābho ca alābho ca||
ayaso ca yaso ca||
nindā ca pasaɱsā ca||
sukhañ ca dukkhañ cā ti.|| ||

So ñātivyasanena vā phuṭṭho samāno bhogavyasanena vā phuṭṭho samāno rogavyasanena vā phuṭṭho samāno na socati na kilamati na paridevati,||
na urattāḷiɱ kandati,||
na sammohaɱ āpajjati.|| ||

Āpadāsu bhikkhave thāmo veditabbo,||
so ca kho dīghena addhunā na ittaraɱ||
manasikarotā no amanasi-kārā,||
paññavatā no duppaññanāti||
— iti yaɱ taɱ vuttaɱ||
idam etaɱ paṭicca vuttaɱ.|| ||

 

§

 

[5][pts][ati] Sākacchāya bhikkhave paññā veditabbā.|| ||

Sā ca kho dīghena addhunā na ittaraɱ,||
manasikarotā no amanasi-kārā,||
paññavatā no duppaññenāti.|| ||

Iti kho pan'etaɱ vuttaɱ.|| ||

Kiñ c'etaɱ paṭicca vuttaɱ?|| ||

Idha, bhikkhave, puggalo puggalena saddhiɱ sākacchāyamāno evaɱ jānāti:|| ||

Yathā kho imassa āyasmato ummaggo,||
yathā ca abhinīhāro,||
yathā pañhasamudācāro,||
duppañño ayam āyasmā||
nāyam āyasmā paññāvā.|| ||

Taɱ kissa hetu?|| ||

Tathā hi ayam āyasmā na c'eva gambhīraɱ atthapadaɱ udāharati santaɱ paṇitaɱ atakkāvacaraɱ nipuṇaɱ paṇḍitavedanīyaɱ.|| ||

Yañ ca ayam āyasmā dhammaɱ bhāsati,||
tassa ca na paṭibalo sāŋkhittena vā vitthārena vā atthaɱ ācikkhituɱ desetuɱ paññapetuɱ paṭṭhapetuɱ vicarituɱ vibhajituɱ uttānīkātuɱ,||
duppañño ayam āyasmā||
nāyaɱ āyasmā paññavā.|| ||

Seyyathā pi, bhikkhave, cakkhumā puriso udakarabhadassa tīre ṭhito passeyya parittaɱ macchaɱ ummūjjamānaɱ,||
tass'evam assa:|| ||

Yathā kho imassa macchassa ummaggo||
yathā ca umighāto||
yathā ca vegāyitattaɱ,||
paritto ayaɱ maccho,||
nāyaɱ maccho mahanto ti.|| ||

Evam eva kho bhikkhave puggalo puggalena saddhiɱ sākacchāyamāno evaɱ jānāti:|| ||

Yathā kho imassa āyasmato ummaggo||
yathā ca abhinīhāro||
yathā ca pañhasamudācāro,||
duppañño ayaɱ āyasmā,||
nāyam āyasmā paññavā.|| ||

Taɱ kissa hetu?|| ||

Tathā hi ayam āyasmā na c'eva gambhīraɱ atthapadaɱ udāharati santaɱ paṇitaɱ atakkāvacaraɱ nipuṇaɱ paṇḍitavedanīyaɱ.|| ||

Yañ ca ayam āyasmā dhammaɱ bhāsati,||
tassa ca na paṭibalo saŋkhittena vā vitthārena vā atthaɱ ācikkhituɱ desetuɱ paññapetuɱ paṭṭhapetuɱ vicarituɱ vibhajituɱ uttānīkātuɱ.||
duppañño ayam āyasmā,||
nāyam āyasmā paññavā ti.|| ||

Idha, bhikkhave, puggalo puggalena saddhiɱ sākacchāyamāno evaɱ jānāti:|| ||

Yathā kho imassa āyasmato ummaggo yathā ca abhinībhāro yathā ca pañhasamudācāro,||
paññavā ayam āyasmā,||
nāyam āyasmā duppaññe.|| ||

Taɱ kissa hetu?|| ||

Tathā hi ayam āyasmā gambhīraɱ atthapadaɱ udāharati santaɱ paṇitaɱ atakkāvacaraɱ nipuṇaɱ paṇḍitavedanīyaɱ,||
yañ ca ayam āyasmā dhammaɱ bhāsati,||
tassa ca paṭibalo saŋakhittena vā vitthārena vā atthaɱ ācikkhituɱ||
desetuɱ paññapetuɱ paṭṭhapetuɱ vicarituɱ vibhajituɱ uttānīkātuɱ,||
paññavā ayam āyasmā,||
nāyam āyasmā duppañño.|| ||

Seyyathā pi, bhikkhave, cakkhumā puriso udakarahadassa tīre ṭhito passeyya mahantaɱ macchaɱ ummujjamānaɱ,||
tass' [190] evam assa:||
yathā kho imassa macchassa ummaggo yathā ca ūmighāto yathā ca vegāyittataɱ,||
mahanto ayaɱ maccho nāyaɱ maccho paritto ti.|| ||

Evam eva kho bhikkhave puggalo puggalena saddhiɱ sākacchāyamāno evaɱ jānāti:|| ||

Yathā kho imassa āyasmato ummaggo yathā ca pañhasamudācāro,||
dupañño ayam āyasmā,||
nāyam āyasmā paññavā.|| ||

Taɱ kissa hetu?|| ||

Tathā hi ayam āyasmā gambhīraɱ c'eva atthapadaɱ udāharati santaɱ paṇītaɱ atakkāvacaraɱ nipuṇaɱ paṇḍita vedanīnayaɱ,||
yañ ca ayam āyasmā dhammaɱ bhāsati,||
tassa ca paṭibalo saŋkhittena vā vitthārena vā atthaɱ ācikkhituɱ desetuɱ paññapetuɱ paṭṭhapetuɱ vivarituɱ vibhajituɱ uttānīkātuɱ,||
paññavā ayam āyasmā,||
nāyam āyasmā duppañño ti|| ||

Sākacchāya bhikkhave paññā veditabbā|| ||

Sā ca kho dīghena addhunā na ittaraɱ,||
manasikarotā no amanasikārā,||
paññavatā no duppaññenāti.||
— iti yaɱ taɱ vuttaɱ,||
idam etaɱ paṭicca vuttaɱ.|| ||

Imāni kho bhikkhave cattāri ṭhānāni,||
imehi catuhi ṭhānehi veditabbānīti.|| ||

 


Contact:
E-mail
Copyright Statement   Webmaster's Page