Anguttara Nikaya


[Site Map]  [Home]  [Sutta Indexes]  [Glossology]  [Site Sub-Sections]

The Pali is transliterated as IAST Unicode (āīūṃṅñṭḍṇḷ). Alternatives:
[ ASCII (aiumnntdnl) | Mobile (āīūŋńñţđņļ) | Velthuis (aaiiuu.m'n~n.t.d.n.l) ]

 

Aŋguttaranikāyo
Catukkanipāto
XX: Mahā Vagga

Sutta 200

Pema Suttaɱ

Adapted from the 1995 edition of the digital version of the Sri Lanka Buddha Jayanti Tripitaka Series and proofed against, and mostly resolved to the Pali Text Society Anguttara-Nikaya edited by Rev. Richard Morris, M.A., LL.D.

 


 

[1][pts][than] Evaɱ me sutaɱ:|| ||

Ekaɱ samayaɱ Bhagavā bhikkhū āmantesi:|| ||

"Bhikkhavo" ti.|| ||

"Bhadante" ti te bhikkhū Bhagavato paccassosuɱ.|| ||

Bhagavā etad avoca:|| ||

Cattār'imāni bhikkhave jāyanti.||
Katamāni cattāri?|| ||

Pemā pemaɱ jāyati.||
Pemā doso jāyati.||
Dosā pemaɱ jāyati.||
Dosā doso jāyati.|| ||

2. Kathañ ca bhikkhave pemā pemaɱ jāyati?|| ||

Idha, bhikkhave, puggalo puggalassa iṭṭho hoti kanto manāpo.||
Taɱ pare iṭṭhena kantena manāpena samudācaranti.||
Tass'evaɱ hoti:||
yo kho myāyaɱ puggalo iṭṭho kanto manāpo hoti||
taɱ pare iṭṭhena kantena manāpena samūdācarantī ti||
so tesu pemaɱ janeti.|| ||

Evaɱ kho bhikkhave pemā pemaɱ jāyati.|| ||

3. Kathañ ca bhikkhave pemā doso jāyati?|| ||

Idha, bhikkhave, puggalo puggalassa iṭṭho hoti kanto manāpo. Taɱ pare aniṭṭhena akantena amanāpena samudācaranti. Tass'evaɱ hoti: yo kho myāyaɱ puggalo iṭṭho kanto manāpo, taɱ pare aniṭṭhena akantena amanāpena samudācarantīti.||
So tesu dosaɱ janeti.|| ||

Evaɱ kho bhikkhave pemā doso jāyati.|| ||

Kathañ ca bhikkhave dosā pemaɱ jāyati?|| ||

Idha, bhikkhave, puggalo puggalassa aniṭṭho hoti akanto amanāpo. Taɱ pare aniṭṭhena akantena amanāpena samūdācaranti. Tass'evaɱ hoti: yo kho myāyaɱ puggalo aniṭṭho akanto amanāpo, taɱ pare aniṭṭhena akantena amanāpena samudācarantīti||
so tesu pemaɱ janeti.|| ||

Evaɱ kho bhikkhave dosā pemaɱ jāyati.|| ||

5. Kathañ ca bhikkhave dosā doso jāyati?|| ||

Idha, bhikkhave, puggalo puggalassa aniṭṭho hoti akanto [214] amanāpo taɱ pare iṭṭhena kantena manāpena samūdācaranti. Tass'evaɱ hoti: yo kho myāyaɱ puggalo aniṭṭho akanto amanāpo, taɱ pare iṭṭhena kantena manāpena samudācarantiti.||
So tesu dosaɱ janeti.|| ||

Evaɱ kho bhikkhave dosā doso jāyati.|| ||

Imāni kho bhikkhave cattāri jāyanti.|| ||

6. Yasmiɱ bhikkhave samaye bhikkhu vivicc'eva kāmehi vivicca akusalehi dhammehi savitakkaɱ savicāraɱ vivekajaɱ pīti-sukhaɱ paṭhamaɱ-jhānaɱ||
upasampajja viharati,||
yaɱ pi'ssa pemā pemaɱ jāyati,||
tam pi'ssa tasmiɱ samaye na hoti.||
Yo pi'ssa pemā doso jāyati,||
so pi'ssa tasmiɱ samaye na hoti.||
Yo pi'ssa pemā doso jāyati,||
so pi'ssa tasmiɱ samaye na hoti.||
Yam pi'ssa dosā pemaɱ jāyati,||
tam pi'ssa tasmiɱ samaye na hoti.||
Yo pi'ssa dosā doso jāyati,||
so pi'ssa tasmiɱ samaye na hoti.|| ||

7. Yasmiɱ bhikkhave samaye bhikkhu vitakka vicāranaɱ vūpasamā ajjhattaɱ sampasādanaɱ cetaso ekodi-bhāvaɱ avitakkaɱ avicāraɱ samādhijaɱ pīti-sukhaɱ dutiyaɱ-jhānaɱ||
upasampajja pemaɱ viharati,||
yam pi'ssa pemā pemaɱ jāyati.||
Tam pi'ssa tasmiɱ samaye na hoti.||
Yo pi'ssa pemā doso jāyati,||
so pi'ssa tasmiɱ samaye na hoti.||
Yam pi'ssa dosā pemaɱ jāyati,||
tam pi'ssa tasmiɱ samaye na hoti.||
Yo pi'ssa dosā doso jāyati,||
so pi'ssa tasmiɱ samaye na hoti.|| ||

8. Yasmiɱ bhikkhave samaye bhikkhu vitakka vicāranaɱ vūpasamā ajjhattaɱ sampasādanaɱ cetaso ekodi-bhāvaɱ avitakkaɱ avicāraɱ samādhijaɱ pīti-sukhaɱ tatiyaɱ-jhānaɱ||
upasampajja pemaɱ viharati,||
yam pi'ssa pemā pemaɱ jāyati.||
Tam pi'ssa tasmiɱ samaye na hoti.||
Yo pi'ssa pemā doso jāyati,||
so pi'ssa tasmiɱ samaye na hoti.||
Yam pi'ssa dosā pemaɱ jāyati.||
tam pi'ssa tasmiɱ samaye na hoti.||
Yo pi'ssa dosā doso jāyati,||
so pi'ssa tasmiɱ samaye na hoti.|| ||

Yasmiɱ bhikkhave samaye bhikkhu vitakka vicāranaɱ vūpasamā ajjhattaɱ sampasādanaɱ cetaso ekodi-bhāvaɱ avitakkaɱ avicāraɱ samādhijaɱ pīti-sukhaɱ catutthaɱ-jhānaɱ||
upasampajja pemaɱ viharati,||
yam pi'ssa pemā pemaɱ jāyati.||
Tam pi'ssa tasmiɱ samaye na hoti.||
Yo pi'ssa pemā doso jāyati,||
so pi'ssa tasmiɱ samaye na hoti.||
Yam pi'ssa dosā pemaɱ jāyati.||
tam pi'ssa tasmiɱ samaye na hoti.||
Yo pi'ssa dosā doso jāyati,||
so pi'ssa tasmiɱ samaye na hoti.|| ||

Yasmiɱ bhikkhave samaye bhikkhu āsavānaɱ khayā anāsavaɱ ceto-vimuttiɱ paññā-vimuttiɱ diṭṭhe va dhamme sayaɱ abhiññā sacchikatvā||
upasampajja viharati,||
yam pi'ssa pemā pemaɱ jāyati,||
tam pi'ssa pahīnaɱ hoti.||
Ucchinnamūlaɱ tāla-vatthu-kataɱ anabhāvakataɱ āyatiɱ anuppādadhammaɱ.||
Yo pi'ssa pemā doso jāyati||
so pi'ssa pahīṇo hoti,||
ucchinnamūlo tālāvatthukato anabhāvakato āyatiɱ anuppādadhammo.||
Yam pi'ssa dosā pemaɱ jāyati,||
tam pi'ssa pahīnaɱ hoti,||
ucchinnamūlaɱ tāla-vatthu-kataɱ anabhāvakataɱ anuppādadhammaɱ.||
Yo pi'ssa dosā doso jāyati,||
so pi'ssa pahīṇo hoti ucchinnamūlo tālāvatthukato anabhāvakato āyatiɱ anuppādadhammo.|| ||

Ayaɱ vuccati bhikkhave bhikkhu nevusseneti nappaṭisseneti na dhūpāyani na pajjalati na apajjhāyati.|| ||

9. Kathañ ca bhikkhave bhikkhu usseneti?|| ||

Idha, bhikkhave, bhikkhu rūpaɱ attato samanupassati,||
rūpavantaɱ vā attānaɱ,||
attani vā rūpaɱ,||
rūpasmiɱ vā attānaɱ.|| ||

Vedanaɱ attato samanupassati,||
[215] vedanāvantaɱ vā attānaɱ||
attani vā vedanaɱ,||
vedanāya vā attānaɱ.|| ||

Saññaɱ attato samanupassati,||
saññāvantaɱ vā attānaɱ,||
attani vā saññaɱ,||
saññāya vā attānaɱ.|| ||

Saɱkhāre attato samanupassati,||
saɱkhāravantaɱ vā attānaɱ,||
attani vā saɱkhāre,||
saɱkhāresu vā attānaɱ.|| ||

Viññāṇaɱ attato samanupassati,||
viññāṇavantaɱ vā attānaɱ,||
attani vā viññāṇaɱ,||
viññāṇasmiɱ vā attānaɱ.|| ||

Evaɱ kho bhikkhave bhikkhu usseneti.|| ||

10. Kathañ ca bhikkhave bhikkhu na usseneti?|| ||

Idha, bhikkhave, bhikkhu na rūpaɱ attato samanupassati,||
na rūpavantaɱ vā attānaɱ,||
na attani vā rūpaɱ,||
na rūpasmiɱ vā attānaɱ.|| ||

Na vedanaɱ attato samanupassati,||
na vedanāvantaɱ vā attānaɱ,||
na attani vā vedanaɱ,||
na vedanāya vā attānaɱ.|| ||

Na saññaɱ attato samanupassati,||
na saññāvantaɱ vā attānaɱ,||
na attani vā saññaɱ,||
na saññāya vā attānaɱ.|| ||

Na saɱkhāre attato samanupassati,||
na saɱkāravantaɱ vā attānaɱ,||
na attani vā saɱkhāre,||
na saɱkhāresu vā attānaɱ.|| ||

Na viññāṇaɱ attato samanupassati,||
na viññāṇavantaɱ vā attānaɱ,||
na attani vā viññāṇaɱ,||
na viññāṇasmiɱ vā attānaɱ.|| ||

Evaɱ kho bhikkhave bhikkhu na usseneti.|| ||

11. Kathañ ca bhikkhave bhikkhu paṭisseneti?|| ||

Idha, bhikkhave, bhikkhu akkosantaɱ paccakkosati,||
rosantaɱ paṭirosati,||
bhaṇḍantaɱ paṭibhaṇḍati.|| ||

Evaɱ kho bhikkhave bhikkhu paṭisseneti.|| ||

12. Kathañ ca bhikkhave bhikkhu na paṭisseneti?|| ||

Idha, bhikkhave, bhikkhu akkosantaɱ na paccakkosati,||
rosantaɱ na paṭirosati,||
bhaṇḍantaɱ na paṭibhaṇḍati.|| ||

Evaɱ kho bhikkhave bhikkhu na paṭisseneti.|| ||

13. Kathañ ca bhikkhave bhikkhu dhūpāyati?|| ||

Asmīti bhikkhave sati||
itthasmīti hoti,||
evasmīti hoti,||
aññathasmīti hoti,||
asasmīti hoti,||
satasmīti hoti,||
santi hoti,||
itthaɱ santi hoti,||
evaɱ santi hoti,||
aññathā santi hoti,||
api ha santi hoti,||
api itthaɱ santi hoti,||
api evaɱ santi hoti,||
api aññathā santi hoti,||
bhavissanti hoti,||
itthaɱ bhavissanti hoti,||
evaɱ bhavissanti hoti,||
aññathā bhavissanti hoti.|| ||

Evaɱ kho bhikkhave bhijhu dhūpāyati.|| ||

14. Kathañ ca bhikkhave bhikkhu na dhūpāyati?|| ||

Asmīti bhikkhave asati||
itthasmīti na hoti,||
aññathasmīti na hoti,||
asasmīti na hoti,||
satasmīti na hoti,||
santi na hoti,||
itthaɱ santi na hoti,||
evaɱ santi na hoti,||
aññathā santi na hoti,||
apiha santi na hoti,||
api itthaɱ santi na hoti,||
api evaɱ santi na hoti,||
api aññathā [216] santi na hoti,||
bhavissanti na hoti,||
itthaɱ bhavissanti na hoti,||
eva bhavissanti na hoti,||
aññathā bhavissanti na hoti.|| ||

Evaɱ kho bhikkhave bhikkhu na dhūpāyati.|| ||

15. Kathañ ca bhikkhave bhikkhu pajjalati?|| ||

Iminā asmīti bhikkhave sati||
iminā itthasmīti hoti,||
iminā evasmīti hoti||
iminā aññathasmīti hoti,||
iminā asasmīti hoti,||
iminā satasmīti hoti,||
iminā santi hoti,||
iminā itthaɱ santi hoti,||
iminā evaɱ santi santi hoti,||
iminā apiha santi hoti,||
iminā aññathā santi hoti,||
iminā apiha santi hoti,||
iminā api itthaɱ santi hoti,||
iminā api evaɱ santi hoti,||
iminā api aññathā santi hoti,||
iminā bhavissanti hoti,||
iminā itthaɱ bhavissanti hoti,||
iminā evaɱ bhavissanti hoti,||
iminā aññathā bhavissanti hoti.|| ||

Evaɱ kho bhikkhave bhikkhu pajjalati.|| ||

16. Kathañ ca bhikkhave bhikkhu na pajjalati?|| ||

Iminā asmīti bhikkhave asati||
iminā itsmīti na hoti,||
iminā evasmīti na hoti,||
iminā aññathasmīti na hoti,||
iminā asasmīti na hoti,||
iminā satasmīti na hoti,||
iminā santi na hoti,||
iminā itthaɱ santi na hoti,||
iminā evaɱ santi na hoti,||
iminā aññathā santi na hoti,||
iminā apiha santi na hoti,||
iminā api itthaɱ santi na hoti,||
iminā api evaɱ santi na hoti,||
iminā api aññathā santi na hoti,||
iminā bhavassanti na hoti,||
iminā itthaɱ bhavissanti na hoti,||
iminā evaɱ bhavissanti na hoti,||
iminā aññathā bhavissanti na hoti.|| ||

Evaɱ kho bhikkhave bhikkhu na pajjalati.|| ||

17. Kathañ ca bhikkhave bhikkhu pajjhāyati?|| ||

Idha, bhikkhave, bhikkhuno asmimāno pahīṇo na hoti,||
ucchinnamūlo tālāvatthukato anabhāvakato āyatiɱ uppādadhammo.|| ||

Evaɱ bhikkhave bhikkhu pajjhāyati.|| ||

Kathañ ca bhikkhave bhikkhu na pajjhāyati?|| ||

Idha, bhikkhave, bhikkhuno asmimāno pahīṇo hoti,||
ucchinnamūlo tālāvatthukato anabhāvakato āyatiɱ anuppādadhammo.|| ||

Evaɱ kho bhikkhave bhikkhu na pajjhāyatī ti.|| ||

MAHĀVAGGO PAÑCAMO

 


Contact:
E-mail
Copyright Statement   Webmaster's Page