Anguttara Nikaya


[Site Map]  [Home]  [Sutta Indexes]  [Glossology]  [Site Sub-Sections]

The Pali is transliterated as IAST Unicode (āīūṃṅñṭḍṇḷ). Alternatives:
[ ASCII (aiumnntdnl) | Mobile (āīūŋńñţđņļ) | Velthuis (aaiiuu.m'n~n.t.d.n.l) ]

 

Aŋguttaranikāyo
Catukkanipāto
XXIV: Kamma Vagga

Sutta 239

Samaṇa Suttaɱ

Adapted from the 1995 edition of the digital version of the Sri Lanka Buddha Jayanti Tripitaka Series and proofed against, and mostly resolved to the Pali Text Society Anguttara-Nikaya edited by Rev. Richard Morris, M.A., LL.D.

 


 

[1][pts] Evaɱ me sutaɱ:|| ||

Ekaɱ samayaɱ Bhagavā Sāvatthiyaɱ viharati.|| ||

Tatra kho Bhagavā bhikkhū āmantesi:|| ||

"Bhikkhavo" ti.|| ||

"Bhadante" ti te bhikkhū Bhagavato paccassosuɱ.|| ||

Bhagavā etad avoca:|| ||

"'Idh'eva bhikkhave samaṇo,||
idha dutiyo samaṇo,||
idha tatiyo samaṇo,||
idha catuttho samaṇo.|| ||

Suññā parappavādā samaṇehi aññe' ti.|| ||

Evam etaɱ bhikkhave sammā sīhanādaɱ nadatha.|| ||

Katamo ca bhikkhave samaṇo?|| ||

Idha, bhikkhave, bhikkhu tiṇṇaɱ saɱyojanānaɱ parikkhayā sotāpanno hoti avinipātadhammo niyato sambodhiparāyaṇo.|| ||

Ayaɱ bhikkhave samaṇo.|| ||

Katamo ca bhikkhave dutiyo samaṇo?|| ||

Idha, bhikkhave, bhikkhu tiṇṇaɱ saɱyojanānaɱ parikkhayā rāgadosamohānaɱ tanuttā sakadāgāmi hoti, sakideva imaɱ lokaɱ āgantvā dukkhassantaɱ karoti.|| ||

Ayaɱ bhikkhave dutiyo samaṇo.|| ||

Katamo ca bhikkhave tatiyo samaṇo?|| ||

Idha, bhikkhave, bhikkhu pañcannaɱ orambhāgiyānaɱ saɱyojanānaɱ parikkhayā opapātiko hoti tattha parinibbāyī anāvattidhammo tasmā lokā ayaɱ bhikkhave tatiyo samaṇo.|| ||

Katamo ca bhikkhave catuttho samaṇo?|| ||

Idha, bhikkhave, āsavānaɱ khayā anāsavaɱ ceto-vimuttiɱ paññā-vimuttiɱ diṭṭhe va dhamme sayaɱ abhiññā sacchikatvā upasampajja viharati.|| ||

Ayaɱ bhikkhave catuttho samaṇo.|| ||

'Idh'eva bhikkhave samaṇo,||
idha dutiyo samaṇo,||
idha tatiyo samaṇo,||
idha catuttho samaṇo.|| ||

Suññā parappavādā samaṇehi aññe' ti.|| ||

Evam etaɱ bhikkhave sammā sīhanādaɱ nadathā" ti.|| ||

 


Contact:
E-mail
Copyright Statement   Webmaster's Page