Anguttara Nikaya


[Site Map]  [Home]  [Sutta Indexes]  [Glossology]  [Site Sub-Sections]

The Pali is transliterated as IAST Unicode (āīūṃṅñṭḍṇḷ). Alternatives:
[ ASCII (aiumnntdnl) | Mobile (āīūŋńñţđņļ) | Velthuis (aaiiuu.m'n~n.t.d.n.l) ]

 

Aŋguttaranikāyo
Catukkanipāto
XXV: Āppatti-bhaya Vagga

Sutta 241

Saŋghabhedaka Suttaɱ

Adapted from the 1995 edition of the digital version of the Sri Lanka Buddha Jayanti Tripitaka Series and proofed against, and mostly resolved to the Pali Text Society Anguttara-Nikaya edited by Rev. Richard Morris, M.A., LL.D.

 


 

[1][pts] Evaɱ me sutaɱ:|| ||

Ekaɱ samayaɱ Bhagavā Kosambiyaɱ viharati Ghositārāme.|| ||

Atha kho āyasmā Ānando yena Bhagavā ten'upasaŋkami,||
upasaŋkamitvā Bhagavantaɱ abhivādetvā eka-m-antaɱ nisīdi.|| ||

Eka-m-antaɱ nisinnaɱ kho āyasmantaɱ Ānandaɱ Bhagavā etad avoca:|| ||

"Api nu taɱ Ānanda adhikaraṇaɱ vupasantan" ti?|| ||

"Kuto taɱ bhante adhikaraṇaɱ vupasamissa ti?|| ||

Āyasmato bhante Anuruddhassa Bāhiyo nāma saddhivihārī kevalakappaɱ saŋghabhedāya ṭhito.|| ||

Tatthāyasmā Anuruddho na ekavācikam pi bhaṇitabbaɱ maññatī" ti.|| ||

"Kadā pan'Ānanda Anuruddho saŋghamajjhe adhikaraṇesu voyuñjati?|| ||

Na nu Ānanda yāni kānici adhikaraṇāni uppajjanti sabbāni tāni tumhe c'eva vūpasametha Sāriputta-Moggallānā ca.|| ||

 


 

Cattāro'me Ānanda atthavase sampassamāno pāpabhikkhu saŋghabhedena nandati.|| ||

Katame cattāro?|| ||

Idh'Ānanda pāpabhikkhu dussīlo hoti pāpadhammo asuci saŋkassara-samācāro paṭicchannakammanto assamaṇo samaṇapaṭiñño abrahmacārī brahmacārīpaṭiñño [240] antopūti avassuto kasambujāto.|| ||

Tass'evaɱ hoti:|| ||

'Sace kho maɱ bhikkhū jānissanti||
"Dususīlo pāpadhammo asuci saɱkassara-samācāro paṭicchannakammanto assamaṇo samaṇapaṭiñño abrahmacārī brahmacārīpaṭiñño antopūti avassuto kasambujāto" ti,||
samaggā maɱ santā nāsissanti,||
vaggā pana maɱ na nāsissantī' ti.|| ||

Idaɱ Ānanda paṭhamaɱ atthavasaɱ sampassamāno pāpabhikkhu saŋghabhedena nandati.|| ||

 

§

 

Puna ca paraɱ Ānanda pāpabhikkhu micchādiṭṭhiko hoti antagāhikāya diṭṭhiyā samannāgato.|| ||

Tass'evaɱ hoti:|| ||

'Sace kho maɱ bhikkhū jānissanti||
"micchādiṭṭhiko antaggāhikāya diṭṭhiyā samannāgato" ti,||
samaggā maɱ santā nāsissanti,||
vaggā pana maɱ na nāsissantī' ti.|| ||

Idaɱ Ānanda dutiyaɱ atthavasaɱ sampassamāno pāpabhikkhu saŋghabhedena nandati.|| ||

 

§

 

Puna ca paraɱ Ānanda pāpabhikkhu micchāājīvo hoti,||
micchājīvena jīvitaɱ kappeti.|| ||

Tass'evaɱ hoti:|| ||

'Sace kho maɱ bhikkhū jānissanti:||
"micchāājīvo,||
micchāājīvena jīvikaɱ kappetī" ti,||
samaggā pana maɱ nāsissanti,||
vaggā pana maɱ na nāsissanti' ti.|| ||

Idaɱ Ānanda tatiyaɱ atthavasaɱ sampassamāno pāpabhikkhu saŋghabhedena nandati.

 

§

 

Puna ca paraɱ Ānanda, pāpabhikkhu labhakāmo hoti sakkārakāmo anavaññattikāmo.|| ||

Tassa evaɱ hoti:|| ||

'Sace kho maɱ bhikkhu janissanti:||
"labhakāmo sakkārakāmo anavaññattikāmo" ti,||
samagga maɱ santa na sakkarissanti||
na garukarissanti na mānessanti na pujessanti,||
vaggā pana maɱ sakkarissanti garukarissanti mānessanti pujessanti' ti.|| ||

Idaɱ, Ānanda, catutthaɱ atthavasa sampassamāno pāpabhikkhu saŋghabhedena nandati.|| ||

Ime kho Ānanda cattāro atthavase sampassamāno pāpabhikkhu saŋghabhedena nandatī" ti.|| ||

 


Contact:
E-mail
Copyright Statement   Webmaster's Page