Anguttara Nikaya


[Site Map]  [Home]  [Sutta Indexes]  [Glossology]  [Site Sub-Sections]

The Pali is transliterated as IAST Unicode (āīūṃṅñṭḍṇḷ). Alternatives:
[ ASCII (aiumnntdnl) | Mobile (āīūŋńñţđņļ) | Velthuis (aaiiuu.m'n~n.t.d.n.l) ]

 

Aŋguttaranikāyo
Catukkanipāto
XXV: Āppatti-bhaya Vagga

Sutta 242

Āpattibhaya Suttaɱ

Adapted from the 1995 edition of the digital version of the Sri Lanka Buddha Jayanti Tripitaka Series and proofed against, and mostly resolved to the Pali Text Society Anguttara-Nikaya edited by Rev. Richard Morris, M.A., LL.D.

 


 

[1][pts] Evaɱ me sutaɱ:|| ||

Ekaɱ samayaɱ Bhagavā bhikkhū āmantesi:|| ||

"Bhikkhavo" ti.|| ||

"Bhadante" ti te bhikkhū Bhagavato paccassosuɱ.|| ||

Bhagavā etad avoca:|| ||

"Cattār'imāni bhikkhave āpatti-bhayāni.|| ||

Katamāni cattāri?|| ||

Seyyathā pi, bhikkhave, coraɱ āgucāriɱ gahetvā rañño dasseyyuɱ:|| ||

"Ayaɱ te deva coro āgucārī,||
imassa devo daṇḍaɱ paṇetū" ti.|| ||

Tam enaɱ rājā evaɱ vadeyya:|| ||

[241] Gacchatha bho imaɱ purisaɱ daḷhāya rajjuyā pacchā bāhaɱ gāḷha bandhanaɱ bandhitvā khuramuṇḍaɱ karitvā kharassarena paṇavena rathiyāya rathiyaɱ siŋghāṭakena siŋghāṭakaɱ parinetvā dakkhiṇena dvārena nikkhāmetvā dakkhiṇato nagarassa sīsaɱ chindathā ti.|| ||

Tam enaɱ rañño purisā daḷhāya rajjuyā pacchā bāhaɱ gāḷha bandhanaɱ bandhitvā khuramuṇḍaɱ karitvā kharassarena paṇavena rathiyāya rathiyaɱ siŋghāṭakena siŋghāṭakaɱ parinetvā dakkhiṇena dvārena nikkhāmetvā dakkhiṇato nagarassa sīsaɱ chindeyyuɱ.|| ||

Tatr'aññatarassa thalaṭṭhassa purisassa evam assa:|| ||

"Pāpakaɱ vata bho ayaɱ puriso kammaɱ akāsi gārayhaɱ sīsacchejjaɱ,||
yatra hi nāma rañño purisā daḷhāya rajjuyā pacchā bāhaɱ gāḷha bandhanaɱ bandhitvā khuramuṇḍaɱ karitvā kharassarena paṇavena rathiyāya rathiyaɱ siŋghāṭakena siŋghāṭakaɱ parinetvā dakkhiṇena dvārena nikkhāmetvā dakkhiṇato nāgarassa sīsaɱ chindissan" ti.|| ||

So vat'assāhaɱ evarūpaɱ pāpaɱ kammaɱ na kareyyaɱ gārayhaɱ sīsacchejjan ti.|| ||

Evam eva kho bhikkhave yassa kassaci bhikkhussa vā bhikkhuniyā vā evaɱ tibbā bhayasaññā paccupaṭṭhitā hoti pārājikesu dhammesu,||
tass'etaɱ pāṭikaŋkhaɱ:|| ||

Anāpanno vā pārājikaɱ dhammaɱ na āpajjissati||
āpanno vā pārājikaɱ dhammaɱ yathādhammaɱ paṭikarissati.|| ||

 

§

 

Seyyathā pi, bhikkhave, puriso kāḷakaɱ vatthaɱ paridhāya kese pakiritvā mūsalaɱ khandhe āropetvā mahājanakāyaɱ upasaŋkamitvā evaɱ vadeyya:|| ||

"Ahaɱ bhante pāpaɱ kammaɱ akāsiɱ gārayhaɱ mosallaɱ.|| ||

Yena me āyasmanto attamanā honti taɱ karomī" ti.|| ||

Tatr'aññatarassa thalaṭṭhassa purisassa evam assa:|| ||

"Pāpakaɱ vata bho ayaɱ puriso kammaɱ akāsi gārayhaɱ mosallaɱ,||
yatra hi nāma kāḷakaɱ vatthaɱ paridhāya kese pakiritvā mūsalaɱ khandhe āropetvā mahājanakāyaɱ upasaŋkamitvā evaɱ vakkhati:|| ||

'Ahaɱ bhante pāpaɱ kammaɱ akāsiɱ gārayhaɱ mosallaɱ.|| ||

Yena me āyasmanto attamanā honti, taɱ karomī" ti.|| ||

[242] So vat'assāhaɱ evarūpaɱ pāpaɱ kammaɱ na kareyyaɱ gārayhaɱ mosallan" ti.|| ||

Evam eva kho bhikkhave yassa kassa ci bhikkhussa vā bhikkhuniyā vā evaɱ tibbā bhayasaññā paccupaṭṭhitā hoti saŋghādisesesu dhammesu,||
tass'etaɱ pāṭikaŋkhaɱ:|| ||

Anāpanno vā saŋghādisesaɱ dhammaɱ na āpajjissati||
āpanno vā saŋghādisesaɱ dhammaɱ yathādhammaɱ paṭikarissati.|| ||

 

§

 

Seyyathā pi, bhikkhave, puriso kāḷakaɱ vatthaɱ paridhāya kese pakiritvā assapuṭaɱ khandhe āropetvā mahājanakāyaɱ upasaŋkamitvā evaɱ vadeyya:|| ||

"Ahaɱ bhante pāpaɱ kammaɱ akāsiɱ gārayhaɱ assapuṭaɱ.|| ||

Yena me āyasmanto attamanā honti, taɱ karomī" ti.|| ||

Tatr'aññatarassa thalaṭṭhassa purisassa evam assa:|| ||

"Pāpakaɱ vata bho ayaɱ puriso kāmmaɱ akāsi gārayhaɱ assapuṭaɱ,||
yatra hi nāma kāḷakaɱ vatthaɱ paridhāya kese pakiritvā assapuṭaɱ khandhe āropetvā mahājanakāyaɱ upasaŋkamitvā evaɱ vakkhati:|| ||

'Ahaɱ bhante pāpaɱ kammaɱ akāsiɱ gārayhaɱ assapuṭaɱ.|| ||

Yena me āyasmanto attamanā honti, taɱ karomī' ti.|| ||

So vat'assāhaɱ evarūpaɱ pāpaɱ kammaɱ na kareyyaɱ gārayhaɱ assapuṭan" ti.|| ||

Evam eva kho bhikkhave yassa kassaci bhikkhussa vā bhikkhuniyā vā evaɱ tibbā bhayasaññā paccupaṭṭhitā hoti pācittiyesu dhammesu,||
tass'etaɱ pāṭikaŋkhaɱ:|| ||

Anāpanno vā pācittiyaɱ dhammaɱ na āpajjissati||
āpanno vā pācittiyaɱ dhammaɱ yathā dhammaɱ paṭikarissati.|| ||

 

§

 

Seyyathā pi, bhikkhave, puriso kāḷakaɱ vatthaɱ paridhāya kese pakiritvā mahājanakāyaɱ upasaŋkamitvā evaɱ vadeyya:|| ||

"Ahaɱ bhante pāpaɱ kammaɱ akāsiɱ gārayhaɱ upavajjaɱ.|| ||

Yena me āyasmanto attamanā honti, taɱ karomī" ti.|| ||

Tatr'aññatarassa thalaṭṭhassa purisassa evam assa:|| ||

"Pāpakaɱ vata bho ayaɱ puriso kammaɱ akāsi gārayhaɱ upavajjaɱ,||
yatra hi nāma kāḷakaɱ vatthaɱ paridhāya kese pakiritvā mahājanakāyaɱ upasaŋkamitvā [243] evaɱ vakkhati:|| ||

'Ahaɱ bhante pāpaɱ kammaɱ akāsiɱ gārayhaɱ upavajjaɱ.|| ||

Yena me āyasmanto attamanā honti, taɱ karomī' ti.|| ||

So vat'assāhaɱ evarūpaɱ pāpaɱ kammaɱ na kareyyaɱ gārayhaɱ upavajjan" ti.|| ||

Evam eva kho bhikkhave yassa kassaci bhikkhussa vā bhikkhuniyā vā evaɱ tibbā bhayasaññā paccupaṭṭhitā hoti pāṭidesanīyesu dhammesu,||
tass'etaɱ pāṭikaŋkhaɱ:|| ||

Anāpanno vā pāṭidesanīyaɱ dhammaɱ na āpajjissati||
āpanno vā pāṭidesanīyaɱ dhammaɱ yathā dhammaɱ paṭikarissati.|| ||

Imāni kho bhikkhave cattāri āpattibhayānī" ti.|| ||

 


Contact:
E-mail
Copyright Statement   Webmaster's Page