Anguttara Nikaya


[Site Map]  [Home]  [Sutta Indexes]  [Glossology]  [Site Sub-Sections]

The Pali is transliterated as IAST Unicode (āīūṃṅñṭḍṇḷ). Alternatives:
[ ASCII (aiumnntdnl) | Mobile (āīūŋńñţđņļ) | Velthuis (aaiiuu.m'n~n.t.d.n.l) ]

 

Aŋguttaranikāyo
Catukkanipāto
XXV: Āppatti-bhaya Vagga

Sutta 243

Sikkhānisaɱsa Suttaɱ

Adapted from the 1995 edition of the digital version of the Sri Lanka Buddha Jayanti Tripitaka Series and proofed against, and mostly resolved to the Pali Text Society Anguttara-Nikaya edited by Rev. Richard Morris, M.A., LL.D.

 


 

[1][pts] Evaɱ me sutaɱ:|| ||

Ekaɱ samayaɱ Bhagavā bhikkhū āmantesi:|| ||

"Bhikkhavo" ti.|| ||

"Bhadante" ti te bhikkhū Bhagavato paccassosuɱ.|| ||

Bhagavā etad avoca:|| ||

"Sikkhānisaɱsam idaɱ bhikkhave brahmacariyaɱ vussati,||
paññuttaraɱ,||
vimuttisāraɱ,||
satādhipateyyaɱ.|| ||

 

§

 

Kathañ ca bhikkhave sikkhānisaɱsaɱ hoti?|| ||

Idha, bhikkhave, mayā sāvakānaɱ ābhisamācārikā sikkhā paññattā appasannānaɱ pasādāya,||
pasannānaɱ bhiyyo-bhāvāya||
yathā yathā bhikkhave mayā sāvakānaɱ ābhisamācārikā sikkhā paññattā appasannānaɱ pasādāya,||
pasannānaɱ bhiyyo-bhāvāya,||
tathā tathā so tassā sikkhāya akhaṇḍakārī hoti||
acchiddakārī asabalakārī akammāsakārī samādāya sikkhati sikkhāpadesu.|| ||

Puna ca paraɱ bhikkhave mayā sāvakānaɱ ādibrahmacariyikā sikkhā paññattā sabbaso sammā-dukkhakkhayāya||
yathā yathā bhikkhave mayā sāvakānaɱ ādibrahmacariyikā sikkhā paññattā sabbaso sammā dukkhakkhayāya||
tathā tathā so tassā sikkhāya akhṇḍakārī hoti||
acchiddakārī asabalakārī akammāsakārī samādāya sikkhati sikkhāpadesu.|| ||

Evaɱ kho bhikkhave sikkhānisaɱsaɱ hoti.

 

§

 

Kathañ ca bhikkhave paññuttaraɱ hoti?|| ||

Idha, bhikkhave, mayā sāvakānaɱ dhammā desitā sabbaso sammā-dukkhakkhayāya,||
yathā yathā bhikkhave mayā sāvakānaɱ dhammā desitā sabbaso sammā-dukkhakkhayāya,||
tathā tathā'ssa te dhammā paññāya samavekkhitā honti.|| ||

Evaɱ kho bhikkhave paññuttaraɱ hoti.|| ||

 

§

 

[244] Kathañ ca bhikkhave vimuttisāraɱ hoti?|| ||

Idha, bhikkhave, mayā sāvakānaɱ dhammā desitā sabbaso sammā-dukkhakkhayāya,||
yathā yathā bhikkhave mayā sāvakānaɱ dhammā desitā sabbaso sammā-dukkhakkhayāya,||
tathā tathāssa te dhammā vimuttiyā phassitā honti.|| ||

Evaɱ kho bhikkhave vimuttisāraɱ hoti.|| ||

 

§

 

Kathañ ca bhikkhave satādhipateyyaɱ hoti?|| ||

Iti aparipūraɱ vā ābhismācārikaɱ sikkhaɱ paripūressāmi,||
paripūraɱ vā ābhisamācārikaɱ sikkhaɱ tattha tattha paññāya anuggahessāmī ti||
ajjhattaɱ yeva sati sūpaṭṭhitā hoti.|| ||

Iti aparipūraɱ vā ādibrahmanacariyikaɱ sikkhaɱ paripūressāmi,||
paripūraɱ vā ādibrahmacariyikaɱ sikkhaɱ tattha tattha paññāya anuggahessāmī ti||
ajjhattaɱ yeva sati sūpaṭṭhitā hoti.|| ||

Iti asamavekkhitaɱ vā dhammaɱ paññāya samavekkhissāmi,||
samavekkhitaɱ vā dhammaɱ tattha tattha paññāya anuggahesmāmī ti.||
ajjhattaɱ yeva sati sūpaṭṭhitā hoti.|| ||

Iti aphassitaɱ vā dhammaɱ vimuttiyā phassissāmiɱ,||
phassitaɱ vā dhammaɱ tattha tattha paññāya anuggahessāmī ti||
ajjajhattaɱ yeva sati sūpaṭṭhitā hoti.|| ||

Evaɱ kho bhikkhave satādhipateyyaɱ hoti.|| ||

Sikkhānisaɱsamidaɱ bhikkhave brahmacariyaɱ vussati,||
paññuttaraɱ,||
vimuttisāraɱ,||
satādhipateyyanti.|| ||

Iti yaɱ taɱ vuttaɱ,,||
idam etaɱ paṭicca vuttan" ti.|| ||

 


Contact:
E-mail
Copyright Statement   Webmaster's Page