Anguttara Nikaya


[Site Map]  [Home]  [Sutta Indexes]  [Glossology]  [Site Sub-Sections]

The Pali is transliterated as IAST Unicode (āīūṃṅñṭḍṇḷ). Alternatives:
[ ASCII (aiumnntdnl) | Mobile (āīūŋńñţđņļ) | Velthuis (aaiiuu.m'n~n.t.d.n.l) ]

 

Aŋguttara Nikāya
Pañcaka Nipāta
III: Pañcaŋgika Vagga

Sutta 23

Upakkilesa Suttaɱ

Adapted from the 1995 edition of the digital version of the Sri Lanka Buddha Jayanti Tripitaka Series and proofed against, and mostly resolved to the Pali Text Society Anguttara-Nikaya edited by Prof. E. Hardy, Ph.D., D.D.

 


[16]

[1][pts][bodh]Evaɱ me sutaɱ:|| ||

Ekaɱ samayaɱ Bhagavā Sāvatthiyaɱ viharati.|| ||

Tatra kho Bhagavā bhikkhu āmantesi:|| ||

"Bhikkhavo" ti.|| ||

"Bhadante" ti te bhikkhū Bhagavato paccassosuɱ.|| ||

Bhagavā etad avoca:|| ||

"Pañc'ime bhikkhave jātarūpassa upakkilesā, yehi upakkilesehi upakkiliṭṭhaɱ jātarūpaɱ na c'eva mudu hoti, na ca kammanīyaɱ, na ca pabhassaraɱ, pabhaŋgu ca, ta ca sammā upeti kammāya.|| ||

Katame pañca?|| ||

Ayo lohaɱ tipu sīsaɱ sajjha ime kho bhikkhave pañca jātarūpassa upakkilesā, yehi upakkilesehi upakkiliṭṭhaɱ jātarūpaɱ na c'eva mudu hoti, na ca kammanīyaɱ na ca pabhassaraɱ, pabhaŋgu ca, na ca sammā upeti kammāya.|| ||

Yato ca kho bhikkhave jātarūpaɱ imehi pañcahi upakkilesehi vippamuttaɱ 3 hoti, taɱ hoti jātarūpaɱ mudu ca kammaniyañ ca pabhassaraɱ ca, na ca pabhaŋgu, sammā upeti kammāya yassā yassā.|| ||

Yassā yassā ca pilandhanavikatiyā ākaŋkhati:yadi muddikāya yadi kuṇḍalāya yadi gīveyyakāya yadi yadi suvaṇṇamālakāya.|| ||

Tañc'assa atthaɱ anuhoti.|| ||

Suvaṇaṇamālakaya.|| ||

Tañc'assa atthaɱ anuhoti.|| ||

Evam eva kho bhikkhave pañcime cittassa upakkilesā yehi upakkilesehi upakkiliṭṭhaɱ cittaɱ naceva mudu hoti, ta ca kammanīyaɱ. Na ca pabhassaraɱ, pabhaŋgu ca, na ca sammāsamādhīyati āsavānaɱ khayāya.|| ||

Katame pañca?|| ||

Kāmacchando vyāpādo thīnamiddhaɱ uddhaccakukkuccaɱ vicikicchā.|| ||

Ime kho bhikkhave pañca cittassa upakkilesā yehi upakkilesehi upakkiliṭṭhaɱ cittaɱ na c'eva mudu hoti, na ca kammanīyaɱ, na ca pabhassaraɱ.|| ||

Pabhaŋgu ca, na ca sammāsamādhīyati āsavānaɱ khayāya.|| ||

Yato ca kho bhikkhave cittaɱ imehi pañcahi upakkilesehi vippamuttaɱ hoti, taɱ hoti cittaɱ mudu ca [17] kammaniyañ ca pahassarañca, na ca pahaŋgu, sammāsamādhīyati āsavānaɱ khayāya.|| ||

Yassa yassa ca abhiññāsacchikaraṇīyassa Dhammassa cittaɱ abhininnāmeni abhiññā sacchikiriyāya, tatra tatr'eva sakkhibhabbataɱ pāpuṇāti sati sati āyatane.|| ||

So sace ākaŋkhati:|| ||

'Aneka-vihitaɱ iddhividhaɱ paccanubhaveyyaɱ:||
eko pi hutvā bahudhā assaɱ bahudhā pi hutvā eko hoti,||
āvībhāvaɱ tirobhāvaɱ tirokuḍḍaɱ tiropākāraɱ tiropabbataɱ asajjamāno gacchati seyyathā pi ākāse,||
paṭhaviyā'pi ummujjanimujjaɱ karoti seyyathā pi udake,||
udake'pi abhijjamāne gacchati seyyathā pi paṭhaviyaɱ,||
ākāse'pi pallaŋkena kamati seyyathā'pi pakkhī sakuṇo.|| ||

Ime'pi candimasuriye evaɱmahānubhāve pāṇinā parāmasati parimajjati.|| ||

Yāva brahmalokā pi kāyena va saɱvatteyyan ti."|| ||

Tatra tatr'eva sakkhibhabbataɱ pāpuṇāti sati sati āyatane.|| ||

So sace ākaŋkhati:|| ||

"Dibbāya sotadhātuyā visuddhāya atikkantamānusikāya ubho sadde suṇeyyaɱ dibbe ca mānuse ca ye dūre ye santike cā" ti.|| ||

Tatra tatr'eva sakkhibhabbataɱ pāpuṇāti sati sati āyatane.|| ||

So sace ākaŋkhati|| ||

"Parasattānaɱ parapuggalānaɱ cetasā ceto paricca pajāneyyaɱ:||
sarāgaɱ vā cittaɱ 'Sarāgaɱ cittan' ti pajāneyyaɱ||
vītarāgaɱ vā cittaɱ 'Vītarāgaɱ cittan' ti pajānāti;||
sadosaɱ vā cittaɱ 'Sadosaɱ cittan' ti pajānāti;||
vītadosaɱ vā cittaɱ 'Vītadosaɱ cittan' ti pajānāti;||
samohaɱ vā cittaɱ 'Samohaɱ cittan' ti pajānāti;||
vītamohaɱ vā cittaɱ 'Vītamohaɱ cittan' ti pajānāti;||
saŋkhittaɱ vā cittaɱ 'Saŋkhittaɱ cittan' ti pajānāti;,||
vikkhittaɱ vā cittaɱ 'Vikkhittaɱ cittan' ti pajānāti;||
mahaggataɱ vā cittaɱ 'Mahaggataɱ cittaɱ' ti pajānāti;||
amahaggataɱ vā cittaɱ 'Amahaggataɱ cittaɱ' ti pajānāti;||
sa-uttaraɱ vā cittaɱ 'Sa-uttaraɱ cittaɱ' ti pajānāti;||
anuttaraɱ vā cittaɱ 'Anuttaraɱ cittan' ti pajānāti;||
samāhitaɱ vā cittaɱ 'Samāhitaɱ cittan' ti pajānāti;||
asamāhitaɱ vā cittaɱ 'Asamāhitaɱ cittan' ti pajānāti;||
vimuttaɱ vā cittaɱ 'Vimuttaɱ cittan' ti pajānāti;||
avimuttaɱ vā cittaɱ 'Avimuttaɱ cittan' ti pajānāti.|| ||

Tatra tatr'eva sakkhibhahabbataɱ pāpuṇāti sati sati āyatane.|| ||

So sace ākaŋkhati|| ||

"Aneka-vihitaɱ pubbenivāsaɱ anussareyyaɱ seyyathīdaɱ:||
ekam pi jātiɱ dve pi jātiyo tisso pi jātiyo catasso pi jātiyo pañca pi jātiyo||
dasa pi jātiyo vīsam pi jātiyo tiɱsam pi jātiyo cattārīsam pi jātiyo paññāsam pi jātiyo||
jāti-satam pi jāti-sahassam pi jāti-sata-sahassam pi||
aneke pi saɱvaṭṭakappe aneke pi vivaṭṭakappe aneke pi saɱvaṭṭa-vivaṭṭakappe amutrāsiɱ evaɱ nāmo evaɱ gotto evaɱ-vaṇṇo evam-āhāro evaɱ-sukha-dukkha-paṭisaŋvedī evam-āyu-pariyanto.|| ||

So tato cuto amutra upapādiɱ tatrāpāsiɱ evaɱnāmo evaɱgotto evaɱ-vaṇṇo evam-āhāro evaɱ-sukha-dukkha-paṭisaŋvedī evam-āyu-pariyanto.|| ||

So tato cuto idhūpapanno' ti.|| ||

Iti sākāraɱ sa uddesaɱ aneka-vihitaɱ pubbenivāsaɱ anussareyyan" ti.|| ||

Tatra tatr'eva sakkhibhabbataɱ pāpuṇāti sati sati āyatane.|| ||

[19]So sace ākaŋkhati|| ||

"Dibbena cakkhunā visuddhena atikkantamānusakena satte passati cavamāne uppajjamāne hīne paṇite suvaṇṇe dubbaṇeṇa sugate duggate yathākammupage satte pajāneti ime vata bhonto sattā kāyaduccaritena samannāgatā,||
vacī duccaritena samannāgatā manoduccaritena samannāgatā ariyānaɱ upavādakā micchādiṭiṭhikā micchādiṭṭhikammasamādānā.|| ||

Te kāyassa bhedā param maraṇā apāyaɱ duggatiɱ vinipātaɱ Nirayaɱ upapannā.|| ||

Ime vā pana bhonto sattā kāyasucaritena samannāgatā vacī sucaritena samannāgatā manosucaritena samannāgatā ariyānaɱ anupavādakā sammādiṭṭhikā sammādiṭṭhikammasamādānā.|| ||

Te kāyassa bhedā param maraṇā sugatiɱ saggaɱ lokaɱ uppannāti iti dibbena cakkhunā visuddhena atikkantamānusakena satte passati cavamāne uppajjamāne hīne paṇite suvaṇeṇa dubbaṇeṇa sugate duggate yathākammupage satte pajāneyyan" ti.|| ||

Tatra tatr'eva sakkhibhabbataɱ pāpuṇāti sati sati āyatane.|| ||

So sace ākaŋkhati|| ||

"Āsavānaɱ khayā (anāsavaɱ ceto-vimuttiɱ paññā-vimuttiɱ) diṭṭhe va dhamme sayaɱ abhiññā sacchikatvā upasampajja vihareyyan" ti.|| ||

Tatra tatr'eva sakkhibhabbataɱ pāpuṇāni sati sati āyataneti.|| ||

 


Contact:
E-mail
Copyright Statement   Webmaster's Page