Anguttara Nikaya


[Site Map]  [Home]  [Sutta Indexes]  [Glossology]  [Site Sub-Sections]

The Pali is transliterated as IAST Unicode (āīūṃṅñṭḍṇḷ). Alternatives:
[ ASCII (aiumnntdnl) | Mobile (āīūŋńñţđņļ) | Velthuis (aaiiuu.m'n~n.t.d.n.l) ]

 

Aŋguttara Nikāya
Pañcaka Nipāta
III: Pañcaŋgika Vagga

Sutta 24

Dussīla Suttaɱ

Adapted from the 1995 edition of the digital version of the Sri Lanka Buddha Jayanti Tripitaka Series and proofed against, and mostly resolved to the Pali Text Society Anguttara-Nikaya edited by Prof. E. Hardy, Ph.D., D.D.

 


[19]

[1][pts][bodh]Evaɱ me sutaɱ:|| ||

Ekaɱ samayaɱ Bhagavā Sāvatthiyaɱ viharati.|| ||

Tatra kho Bhagavā bhikkhu āmantesi:|| ||

"Bhikkhavo" ti.|| ||

"Bhadante" ti te bhikkhū Bhagavato paccassosuɱ.|| ||

Bhagavā etad avoca:|| ||

"Dussīlassa bhikkhave sīla-vipannassa hatupaniso hoti sammā-samādhi.|| ||

Sammā-samādhimhi asati sammā-samādhi-vipannassa hatupanisaɱ hoti yathābhūta-ñāṇa-dassanaɱ.|| ||

Yathābhūta-ñāṇa-dassane asati yathābhuta-ñāṇa-dassana-vipannassa hatupaniso hoti nibbidā virāgo.|| ||

Nibbidāvirāge asati nibbidā virāga-vipannassa hatupanisaɱ hoti vimutti-ñāṇa-dassanaɱ.|| ||

2. Seyyathā pi, bhikkhave, rukkho sākhāpalāsavipanno,||
tassa papaṭikā pi na pāripūriɱ gacchati,||
taco pi na [20] pāripūriɱ gacchati,||
pheggu pi na pāripuriɱ gacchati,||
sāro pi na pāripuriɱ gacchati.|| ||

Evam eva kho bhikkhave dussīlassa sīla-vipannassa hatupaniso hoti sammā-samādhi,||
sammā-samādhimhi asati sammā-samādhi-vipannassa hatupanisaɱ hoti yathābhuta ñāṇa-dassanaɱ,||
yathābhuta-ñāṇa-dassane asati yathābhuta-ñāṇa-dassana-vipannassa hatupaniso hoti nibbidā virāgo,||
nibbidā virāge asati nibbidā virāga-vipannassa hatupanisaɱ hoti vimutti-ñāṇa-dassanaɱ.|| ||

Sīlavato bhikkhave sīla-sampannassa upanissaya-sampanno hoti sammā-samādhi.|| ||

Sammā-samādhimhi sati sammā-samādhi-sampannassa upanissaya-sampannaɱ hoti yathābhuta-ñāṇa-dassanaɱ.|| ||

Yathābhuta-ñāṇa-dassane sati yathābhuta-ñāṇa-dassana-sampannassa upanissaya-sampanno hoti nibbidā virāgo.|| ||

Nibbidā virāge sati nibbidā virāga-sampannassa upanissaya-sampannaɱ hoti vimutti-ñāṇa-dassanaɱ.|| ||

Seyyathā'pi bhikkhave rukkho sakhāpalāsasampanno, tassa papaṭikā pi pāripūriɱ gacchati,||
taco pi pāripūriɱ gacchati,||
pheggu pi pāripūriɱ gacchati,||
sāro pi pāripūriɱ gacchati.|| ||

Evam eva kho bhikkhave sīlavato sīlasampannassa upanissayasampanno hoti sammāsamādhi||
sammā-samādhimhi sati sammā-samādhi-sampannassa upanissaya-sampannaɱ hoti yathābhuta-ñāṇa-dassanaɱ||
yathābhuta-ñāṇa-dassane sati yathābhuta-ñāṇa-dassana-sampannassa upanissaya-sampanno hoti nibbidā virāgo||
nibbidā virāge sati nibbidā virāga-sampannassa upanissaya-sampannaɱ hoti vimutti-ñāṇa-dassanaɱ." ti.|| ||

 


Contact:
E-mail
Copyright Statement   Webmaster's Page