Anguttara Nikaya


[Site Map]  [Home]  [Sutta Indexes]  [Glossology]  [Site Sub-Sections]

The Pali is transliterated as IAST Unicode (āīūṃṅñṭḍṇḷ). Alternatives:
[ ASCII (aiumnntdnl) | Mobile (āīūŋńñţđņļ) | Velthuis (aaiiuu.m'n~n.t.d.n.l) ]

 

Aŋguttara Nikāya
Pañcaka Nipāta
III: Pañcaŋgika Vagga

Sutta 26

Vimuttāyatana Suttaɱ

Adapted from the 1995 edition of the digital version of the Sri Lanka Buddha Jayanti Tripitaka Series and proofed against, and mostly resolved to the Pali Text Society Anguttara-Nikaya edited by Prof. E. Hardy, Ph.D., D.D.

 


[21]

[1][pts][bodh][olds]Evaɱ me sutaɱ:|| ||

Ekaɱ samayaɱ Bhagavā Sāvatthiyaɱ viharati.|| ||

Tatra kho Bhagavā bhikkhu āmantesi:|| ||

"Bhikkhavo" ti.|| ||

"Bhadante" ti te bhikkhū Bhagavato paccassosuɱ.|| ||

Bhagavā etad avoca:|| ||

"Pañc'imāni bhikkhave vimuttāyatanāni,||
yattha bhikkhuno appamattassa ātāpino pahitattassa viharato||
avimuttaɱ vā cittaɱ vimuccati,||
aparikkhīṇā vā āsavā parikkhayaɱ gacchanti,||
ananuppattaɱ vā anuttaraɱ yogakkhemaɱ anupāpuṇāti.|| ||

Katamāni pañca?|| ||

Idha, bhikkhave, bhikkhuno Satthā dhammaɱ deseti aññataro vā garuṭṭhāniyo sabrahmacārī.|| ||

Yathā yathā bhikkhave tassa bhikkhuno Satthā dhammaɱ deseti,||
aññataro vā garuṭṭhāniyo sabrahmacārī,
tathā tathā so tasmiɱ dhamme attha-paṭisaŋvedī ca hoti,||
dhamma-paṭisaŋvedī ca||
tassa attha-paṭisaŋvedino dhamma-paṭisaŋvedino pāmujjaɱ jāyati,||
pamuditassa pīti jāyati,||
pītimanassa kāyo passambhati,||
passaddhakāyo sukhaɱ vedeti,||
sukhino cittaɱ samādhiyati.|| ||

Idaɱ, bhikkhave, paṭhamaɱ vimuttāyatanaɱ,||
yattha bhikkhuno appamattassa ātāpino pahitattassa viharato||
avimuttaɱ vā cittaɱ vimuccati,||
aparikkhīṇā vā āsavā parikkhayaɱ gacchanti,||
ananuppattaɱ vā anuttaraɱ yogakkhemaɱ anupāpuṇāti.|| ||

 

§

 

Puna ca paraɱ bhikkhave bhikkhuno na h'eva kho Satthā dhammaɱ deseti,||
aññataro vā garuṭṭhāniyo sabrahmavārī,||
api ca kho yathā-sutaɱ yathā-pariyattaɱ dhammaɱ vitthārena paresaɱ deseti.|| ||

Yathā yathā bhikkhave bhikkhu [22] yathā-sutaɱ yathā-pariyattaɱ dhamimaɱ vitthārena paresaɱ deseti,||
tathā tathā so tasmiɱ dhamme attha-paṭisaŋvedī ca hoti,||
dhamma-paṭisaŋvedī ca||
tassa attha-paṭisaŋvedino dhamma-paṭisaŋvedino pāmujjaɱ jāyati,||
pamuditassa pīti jāyati,||
pītimanassa kāyo passambhati,||
passaddhakāyo sukhaɱ vedeti,||
sukhino cittaɱ samādhiyati.|| ||

Idaɱ, bhikkhave, dutiyaɱ vimuttāyatanaɱ,||
yattha bhikkhuno appamattassa ātāpino pahitattassa viharato||
avimuttaɱ vā cittaɱ vimuccati,||
aparikkhīṇā vā āsavā parikkhayaɱ gacchanti,||
ananuppattaɱ vā anuttaraɱ yogakkhemaɱ anupāpuṇāti.|| ||

 

§

 

Puna ca paraɱ bhikkhave bhikkhuno na h'eva kho Satthā dhammaɱ deseti,||
aññataro vā garuṭṭhāniyo sabrahmacārī,||
nā pi yathā-sutaɱ yathā-pariyattaɱ dhammaɱ vitthārena paresaɱ deseti,||
api ca kho yathā-sutaɱ yathā-pariyattaɱ dhammaɱ vitthārena sajjhāyaɱ karoti.|| ||

Yathā yathā bhikkhave bhikkhu yathā-sutaɱ yathā-pariyattaɱ dhammaɱ vitthārena sajjhāyaɱ karoti,||
tathā tatha so tasmiɱ dhamme attha-paṭisaŋvedī ca hoti,||
dhammapaṭissamvedī ca||
tassa attha-paṭisaŋvedino dhamma-paṭisaŋvedino pāmujjaɱ jāyati,||
pamuditassa pīti jāyati,||
pītimanassa kāyo passambhati,||
passaddhakāyo sukhaɱ vedeti,||
sukhino cittaɱ samādhiyati.|| ||

Idaɱ, bhikkhave, tatiyaɱ vimuttāyatanaɱ,||
yattha bhikkhuno appamattassa ātāpino pahitattassa viharato||
avimuttaɱ vā cittaɱ vimuccati,||
aparikkhīṇā vā āsavā parikkhayaɱ gacchanti,||
ananuppattaɱ vā anuttaraɱ yogakkhemaɱ anupāpuṇāti.|| ||

 

§

 

Puna ca paraɱ bhikkhave bhikkhuno na h'eva kho satthā dhammaɱ deseti,||
aññataro vā garuṭṭhāniyo sabrahmacāri,||
nā pi yathā-sutaɱ yathā-pariyattaɱ dhammaɱ vitthārena paresaɱ deseti,||
nā pi yathā-sutaɱ yathā-pariyattaɱ dhammaɱ vitthārena sajjhāyaɱ karoti,||
api ca kho yathā-sutaɱ yathā-pariyattaɱ dhammaɱ cetasā anuvitakketi [23] anuvicāreti manasānupekkhati.|| ||

Yathā yathā bhikkhave bhikkhu yathā-sutaɱ yathā-pariyattaɱ dhammaɱ cetasā anuvitakketi anuvicāreti manasānupekkhati,||
tathā tathā so tasmiɱ dhamme attha-paṭisaŋvedī ca hoti,||
dhammapaṭisaŋvedi ca||
Tassa attha-paṭisaŋvedino dhamma-paṭisaŋvedino pāmujjaɱ jāyati,||
pamuditassa pīti jāyati,||
pītimanassa kāyo passambhati,||
passaddhakāyo sukhaɱ vedeti,||
sukhino cittaɱ samādhiyati.|| ||

Idaɱ, bhikkhave, catutthaɱ vimuttāyatanaɱ,||
yattha bhikkhuno appamattassa ātāpino pahitattassa viharato||
avimuttaɱ vā cittaɱ vimuccati,||
aparikkhīṇā vā āsavā parikkhayaɱ gacchanti,||
ananuppattaɱ vā anuttaraɱ yogakkhemaɱ anupāpuṇāti.|| ||

 

§

 

Puna ca paraɱ bhikkhave bhikkhuno na h'eva kho satthā dhammaɱ deseti,||
aññataro vā garuṭṭhāniyo sabrahmacārī,||
nā pi yathā-sutaɱ yathā-pariyattaɱ dhammaɱ vitthārena paresaɱ deseti,,||
nāpi yathā-sutaɱ yathā-pariyattaɱ dhammaɱ vitthārena sajjhāyaɱ karoti,,||
nā pi yathā-sutaɱ yathā-pariyattaɱ dhammaɱ cetasā anuvitakketi anuvicāreti manasānupekkhati,||
api ca khavassa aññātaraɱ samādhi-nimittaɱ suggahītaɱ hoti,||
sumana-sikataɱ sūpadhāritaɱ suppaṭi-viddhaɱ paññāya.|| ||

Yathā yathā bhikkhave bhikkhuno aññataraɱ samādhi-nimittaɱ suggahītaɱ hoti sumanasikata supadhāritaɱ suppaṭi-viddhaɱ paññāya,||
tathā tathā so tasmiɱ dhamme attha-paṭisaŋvedī ca hoti,||
dhamma-paṭisaŋvedī ca.|| ||

Tassa attha-paṭisaŋvedino dhamma-paṭisaŋvedino pāmujjaɱ jāyati,||
pamuditassa pīti jāyati,||
pītimanassa kāyo passambhati,||
passaddhakāyo sukhaɱ vedeti,||
sukhino cittaɱ samādhiyati.|| ||

Idaɱ, bhikkhave, pañcamaɱ vimuttāyatanaɱ,||
yattha bhikkhuno appamattassa ātāpino pahitattassa [24] viharato||
avimuttaɱ vā cittaɱ vimuccati,||
aparikkhīṇā vā āsavā parikkhayaɱ gacchanti,||
ananuppattaɱ vā anuttaraɱ yogakkhemaɱ anupāpuṇāti.|| ||

Imāni kho bhikkhave pañca vimuttāyatanāni.|| ||

Yattha bhikkhuno appamattassa ātāpino pahitattassa viharato||
avimuttaɱ vā cittaɱ vimuccati,||
aparikkhīṇā vā āsavā parikkhayaɱ gacchanti,||
ananuppattaɱ vā anuttaraɱ yogakkhemaɱ anupāpuṇāti.|| ||

 


Contact:
E-mail
Copyright Statement   Webmaster's Page