Aṅguttara Nikāya


[Home]  [Sutta Indexes]  [Glossology]  [Site Sub-Sections]


 

Aṅguttara Nikāya
Pañcaka Nipāta
III: Pañc'aṅgika Vagga

Sutta 28

Pañc'aṅgika Samādhi Suttaɱ

Adapted from the 1995 edition of the digital version of the Sri Lanka Buddha Jayanti Tripitaka Series.

 


[25]

[1][pts][than][bodh][olds] Evaɱ me sutaɱ:|| ||

Ekaɱ samayaɱ Bhagavā Sāvatthiyaɱ viharati.|| ||

Tatra kho Bhagavā bhikkhu āmantesi:|| ||

"Bhikkhavo" ti.|| ||

"Bhadante" ti te bhikkhū Bhagavato paccassosuɱ.|| ||

Bhagavā etad avoca:|| ||

"Ariyassa bhikkhave pañc'aṅgikassa sammā samādhissa bhāvanaɱ desissāmi.|| ||

Taɱ suṇātha sādhukaɱ manasi-karotha||
bhāsissāmī" ti.|| ||

"Evaɱ bhante" ti kho te bhikkhu Bhagavato paccassosuɱ.|| ||

Bhagavā etad avoca:

"Katamā ca bhikkhave ariyassa pañc'aṅgikassa sammā-samādhissa bhāvanā?

[2] Idha, bhikkhave, bhikkhu vivicc'eva kāmehi||
vivicca akusalehi dhammehi||
sa-vitakkaɱ,||
sa-vicāraɱ||
viveka-jaɱ pīti-sukhaɱ||
paṭhamaɱ-jhānaɱ upasampajja viharati.|| ||

So imam eva kāyaɱ viveka-jena||
pīti-sukhena||
abhisandeti||
parisandeti||
paripūreti||
parippharati,||
nāssa kiñci sabbā-vato kāyassa||
viveka-jena pīti-sukhena apaphuṭaɱ hoti.|| ||

[3] Seyyathā pi, bhikkhave, dakkho nahāpako vā||
nahāpakantevāsī vā||
kaɱsathāle nahāniyacuṇṇāni ākiritvā||
udakena paripphosakaɱ||
paripphosakaɱ||
sanneyya||
sāssa nahāniyapiṇḍi snehānugatā snehaparetā santara-bāhirā phuṭā snehena na ca paggharati,||
evam eva kho, bhikkhave, bhikkhu imam eva kāyaɱ viveka-jena pīti-sukhena||
abhisandeti||
parisandeti||
paripūreti||
parippharati,||
nāssa kiñci sabbā-vato kāyassa||
viveka-jena pīti-sukhena apthuṭaɱ hoti.|| ||

Ariyassa bhikkhave pañc'aṅgikassa sammā-samādhissa ayaɱ paṭhamā bhāvanā.|| ||

[4] Puna ca paraɱ bhikkhave bhikkhu||
vitakka-vicārānaɱ vūpasamā||
ajjhattaɱ sampasādanaɱ||
cetaso ekodi-bhāvaɱ||
avitakkaɱ||
avicāraɱ||
samādhi-jaɱ pīti-sukhaɱ||
dutiyaɱ-jhānaɱ upasampajja viharati.|| ||

So imam eva kāyaɱ||
samādhi-jena||
pīti-sukhena||
abhisandeti||
parisandeti||
paripūreti||
parippharati,||
nāssa kiñci sabbā-vato kāyassa||
samādhi-jena pīti-sukhena apphuṭaɱ hoti.|| ||

[5] Seyyathā pi, bhikkhave, udaka-rahado ubbhidodako,||
tassa nev'assa puratthi-māya disāya udakassa āya-mukhaɱ||
na pacchi-māya disāya udakassa āya-mukhaɱ||
na uttarāya [26] disāya udakassa āya-mukhaɱ||
na dakkhiṇāya disāya udakassa āya-mukhaɱ||
devo ca na kālena kālaɱ sammā-dhāraɱ anuppaveccheyya||
atha kho tamhā ca udaka-rahadā sītā vāridhārā ubbhijjītvā tam eva udaka-rahadaɱ sītena vārinā||
abhisandeyya||
parisandeyya||
paripureyya||
paripphareyya||
nāssa kiñci sabbā-vato udaka-rahadassa sītena vārinā apphuṭaɱ assa.|| ||

Evam eva kho bhikkhave bhikkhu imeva kāyaɱ samādhi-jena pīti-sukhena||
abhisandeti||
parisandeti||
paripureti||
parippharati,||
nāssa kiñci sabbā-vato kāyassa samādhi-jena pīti-sukhena apphuṭaɱ hoti.|| ||

Ariyassa bhikkhave pañc'aṅgikassa sammā-samādhissa ayaɱ dutiyā bhāvanā.

[6] Puna ca paraɱ bhikkhave bhikkhu pītiyā ca virāgā||
upekkhako ca viharati||
sato ca sampajāno||
sukhañ ca kāyena paṭisaɱvedeti||
yaɱ taɱ ariyā ācikkhanti:|| ||

'Upekkhako satimā sukha-vihārī' ti|| ||

tatiyaɱ-jhānaɱ upasampajja viharati.|| ||

So imam eva kāyaɱ nippīti-kena sukhena||
abhisandeti||
parisandeti||
paripūreti||
parippharati,||
nāssa kiñci sabbā-vato kāyassa||
nippīti-kena apphuṭaɱ hoti.|| ||

[7] Seyyathā pi, bhikkhave, uppaliniyaɱ vā||
paduminiyaɱ vā||
puṇḍarīkiniyaɱ vā||
app ekaccāni uppalāni vā||
padumāni vā||
puṇḍarīkāni vā||
udake jātāni udake saɱvaddhāni udakānuggatāni anto nimuggaposīni||
tāni yāvaggā yāva mūlā sītena vārinā||
abhisannāni||
parisannāni||
paripūrāni||
paripphuṭāni,||
nāssa kiñci sabbā-vataɱ uppalānaɱ vā||
padumānaɱ vā||
puṇḍarīkānaɱ vā||
sītena vārinā apphuṭaɱ assa.|| ||

Evam eva kho bhikkhave bhikkhu imam eva kāyaɱ nippīti-kena sukhena||
abhisandeti||
parisandeti||
paripūreti||
parippharati,||
nāssa kiñci sabbā-vato kāyassa nippīti-kena sukhena apphuṭaɱ hoti.|| ||

Ariyassa bhikkhave pañc'aṅgikassa sammā-samādhissa ayaɱ tatiyā bhāvanā.|| ||

[8] Puna ca paraɱ bhikkhave bhikkhu||
sukhassa ca pā- [27] hāṇā||
dukkhassa ca pahānā||
pubb'eva somanassa-domanassānaɱ atthaṅ-gamā||
adukkha-ɱ-asukhaɱ||
upekkhā-sati-pārisuddhiɱ||
catutthaɱ-jhānaɱ upasampajja viharati.|| ||

So imam eva kāyaɱ parisuddhena cetasā||
pariyodāneta||
pharitvā||
pharitvā nisinno hoti||
nāssa kiñci sabbā-vato kāyassa||
parisuddhena cetasā||
pariyodātena apphuṭaɱ hoti.|| ||

[9] Seyyathā pi, bhikkhave, puriso odāteka vatthena sasīsaɱ pārupitvā nisinno assa,||
nāssa kiñci sabbā-vato kāyassa odātena vatthena apphuṭaɱ assa.|| ||

Evam eva kho bhikkhave bhikkhu imam eva kāyaɱ parisuddhena cetasā||
pariyodātena||
pharitvā nisinno hoti||
nāssa kiñci sabbā-vato kāyassa||
parisuddhena cetasā||
pariyodātena apphuṭaɱ hoti.|| ||

Ariyassa bhikkhave pañc'aṅgikassa sammā-samādhissa ayaɱ catutthā bhāvanā.|| ||

[10] Puna ca paraɱ bhikkhave bhikkhuno pacc'avekkhaṇā-nimittaɱ suggahītaɱ hoti||
sumana-sikataɱ||
sūpadhāritaɱ||
su-p-paṭividdha paññāya.|| ||

[11] Seyyathā pi, bhikkhave, añño'vā aññaɱ pacc'avekkheyya||
ṭhito vā nisinnaɱ pacc'avekkheyya||
nisinno vā nipannaɱ pacc'avekkheyya||
evam eva kho, bhikkhave,||
bhikkhuno pacc'avekkhaṇā-nimittaɱ suggahītaɱ hoti||
sumana-sikataɱ||
sūpadhāritaɱ||
su-p-paṭividdha paññāyā.|| ||

Ariyassa bhikkhave pañc'aṅgikassa sammā-samādhissa ayaɱ pañcamī bhāvanā.

Evaɱ bhāvite kho bhikkhave||
bhikkhu ariye pañc'aṅgike sammā-samādhimhi||
evaɱ bahulī-kate yassa yassa abhiññā sacchi-karaṇīyassa Dhammassa cittaɱ abhininnāmeti abhiññā sacchi-kiriyāya||
tatra tatr'eva sakkhi-bhabbataɱ pāpuṇāti sati sati āyatane.

[12] Seyyathā pi, bhikkhave, udaka-maṇiko ādhāre ṭhapito||
pūro udakassa samatittiko kākapeyyo||
tam enaɱ balavā puriso yato yato āvajjeyya||
āgaccheyya udakan" ti?|| ||

"Evaɱ [28] bhante".|| ||

"Evam'eva kho bhikkhave bhikkhu||
evaɱ bhāvite ariye pañc'aṅgike sammā-samādhimhi||
evaɱ bahulī-kate yassa yassa abhiññā sacchi-karaṇīyassa Dhammassa cittaɱ abhininnāmeni abhiññā sacchi-kiriyāya||
tatra tatr'eva sakkhi-bhabbataɱ pāpuṇāni sati sati āyatane.

[13] Seyyathā pi, bhikkhave, same bhumi-bhāge pokkharaṇī caturassā ālibaddhā pūrā udakassa samatittikā kākapeyyā,||
tam enaɱ balavā puriso yato yato āliɱ muñceyya||
āgaccheyya udakan" ti?|| ||

"Evaɱ bhante" ti.|| ||

"Evam eva kho bhikkhave bhikkhu||
evaɱ bhāvite ariye pañc'aṅgike sammā-samādhimahi||
evaɱ bahulī-kate yassa yassa abhiññā sacchi-karaṇīyassa Dhammassa cittaɱ abhinitnāmeti abhiññā sacchi-kiriyāya||
tatra tatr'eva sakkhi-bhabbataɱ pāpuṇāti sati sati āyatane.|| ||

[14] Seyyathā pi, bhikkhave, su-bhūmiyaɱ cātu-m-mahā-pathe ājañña-ratho yutto assa ṭhito odhasta-patodo||
tam enaɱ dakkho yogg-ā-cariyo assa-damma-sārathi abhirūhitvā vāmena hatthena rasmiyo gahetvā dakkhiṇena hatthena patodaɱ gahetvā yen'icchakaɱ yad icchakaɱ sāreyya pi paccāsāreyya pi.|| ||

"Evam eva kho bhikkhave bhikkhu evaɱ bhāvite ariye pañc'aṅgike sammā-samādhimahi evaɱ bahulī-kate yassa yassa abhiññā sacchi-karaṇīyassa Dhammassa cittaɱ abhinitnāmeti abhiññā sacchi-kiriyāya||
tatra tatr'eva sakkhi-bhabbataɱ pāpuṇāti sati sati āyatane.|| ||

[15] So sace ākaṅkhati:|| ||

'Aneka-vihitaɱ iddhi-vidhaɱ [29] pacc'anubhaveyyaɱ:||
eko pi hutvā bahudhā assaɱ bahudhā pi hutvā eko hoti,||
āvībhāvaɱ tiro-bhāvaɱ tiro-kuḍḍaɱ tiro-pākāraɱ tiro-pabbataɱ asajja-māno gacchati seyyathā pi ākāse,||
paṭhaviyā pi ummujjani-mujjaɱ karoti seyyathā pi udake,||
udake pi abhijja-māne gacchati seyyathā pi paṭhaviyaɱ,||
ākāse pi pallaṅkena kamati seyyathā pi pakkhī sakuṇo.|| ||

Ime pi candima-suriye evaɱ mah-ā-nubhāve pāṇinā parāma-sati parimajjati.|| ||

Yāva Brahma-lokā pi kāyena va saɱvatteyyan' ti.|| ||

Tatra tatr'eva sakkhi-bhabbataɱ pāpuṇāti sati sati āyatane.|| ||

So sace ākaṅkhati:|| ||

'Dibbāya sota-dhātuyā||
visuddhāya atikkanta mānusa-kāya||
ubho sadde suṇeyyaɱ:||
dibbe ca mānuse ca,||
ye dūre santike cā" ti.

Tatra tatr'eva sakkhi-bhabbataɱ pāpuṇāti sati sati āyatane.|| ||

So sace ākaṅkhati|| ||

Parasattāṇaɱ para-puggalānaɱ cetasā ceto paricca pajāneyyaɱ:|| ||

Sarāgaɱ vā cittaɱ,||
'Sarāgaɱ cittan' ti pajānāti;||
vīta-rāgaɱ vā cittaɱ,||
'Vīta-rāgaɱ cittan' ti pajānāti;||
sadosaɱ vā cittaɱ,||
'Sadosaɱ cittan' ti pajānāti;||
vīta-dosaɱ vā cittaɱ,||
'Vīta-dosaɱ cittan' ti pajānāti;||
samohaɱ vā cittaɱ,||
'Samohaɱ cittan' ti pajānāti;||
vīta-mohaɱ vā cittaɱ,||
'Vīta-mohaɱ cittan' ti pajānāti; -||
saṇkhittaɱ vā cittaɱ,||
'Saṇkhittaɱ cittan' ti pajānāti;||
vikkhittaɱ vā cittaɱ,||
'Vikkhittaɱ cittan' ti pajānāti;||
mahaggataɱ vā cittaɱ,||
'Mahaggataɱ cittan' ti pajānāti;||
amahaggataɱ vā cittaɱ,||
'Amahaggataɱ cittan' ti pajānāti;||
sa-uttaraɱ vā cittaɱ,||
'Sa-uttaraɱ cittan' ti pajānāti;||
anuttaraɱ vā cittaɱ,||
'Anuttaraɱ cittan' ti pajānāti;||
samāhitaɱ vā cittaɱ,||
'Samāhitaɱ cittan' ti pajānāti;||
asamāhitaɱ vā cittaɱ,||
'Asamāhitaɱ cittan' ti pajānāti;||
vimuttaɱ vā cittaɱ,||
'Vimuttaɱ cittan' ti pajānāti;||
avimuttaɱ vā cittaɱ,||
'Avimuttaɱ cittan' ti pajānāti.

Tatra tatr'eva sakkhi-bhabbataɱ pāpuṇāti sati sati āyatane.|| ||

So sace ākaṅkhati|| ||

Aneka-vihitaɱ pubbe-nivāsaɱ anussarāmi seyyath'īdaɱ:|| ||

Ekam pi jātiɱ,||
dve pi jātiyo,||
tisso pi jātiyo,||
catasso pi jātiyo,||
pañca pi jātiyo,||
dasa pi jātiyo,||
vīsam pi jātiyo,||
tiɱsam pi jātiyo,||
cattārīsam pi jātiyo,||
paññāsam pi jātiyo,||
jāti-satam pi||
jāti-sahassam pi,||
jāti-sata-sahassam pi,||
aneke pi saɱvaṭṭa-kappe,||
aneke pi vivaṭṭa-kappe,||
aneke pi saɱvaṭṭa-vivaṭṭa-kappe,||
'amutr'āsiɱ evaɱ-nāmo||
evaɱ gotto||
evaɱ vaṇṇo||
evam-āhāro||
evaɱ sukha-dukkha-paṭisaɱvedī||
evam-āyu-pariyanto,||
so tato cuto||
amutra udapādiɱ.

Tatrā p'āsiɱ||
evaɱ-nāmo||
evaɱ gotto||
evaɱ vaṇṇo||
evam-āhāro||
evaɱ sukha-dukkha-paṭisaɱvedī||
evam-āyu-pariyanto.

So tato cuto||
idh'ūpapanno' ti.

Iti sākāraɱ sa-uddesaɱ aneka-vihitaɱ pubbe-nivāsaɱ anussareyyan.|| ||

Tatra tatr'eva sakkhi-bhabbataɱ pāpuṇāti sati sati āyatane.|| ||

So sace ākaṅkhati|| ||

"Dibbena cakkhunā visuddhena atikkanta-mānusakena satte passati cavamāne uppajjamāne hīne paṇite suvaṇṇe dubbaṇeṇa sugate duggate yathā-kammupage satte pajāneti ime vata bhonto sattā||
kāya-du-c-caritena samannāgatā,||
vacī-du-c-caritena samannāgatā||
mano-du-c-caritena samannāgatā||
ariyānaɱ upavādakā micchā-diṭṭhikā||
micchā-diṭṭhi-kamma-samādānā.|| ||

Te kāyassa bhedā param maraṇā apāyaɱ duggatiɱ vinipātaɱ Nirayaɱ upapannā.|| ||

Ime vā pana bhonto sattā||
kāya-sucaritena samannāgatā||
vacī-sucaritena samannāgatā||
mano-sucaritena samannāgatā||
ariyānaɱ anupavādakā sammā-diṭṭhikā||
sammā-diṭṭhi-kamma-samādānā.|| ||

Te kāyassa bhedā param maraṇā sugatiɱ saggaɱ lokaɱ uppannāti iti dibbena cakkhunā visuddhena atikkanta-mānusakena satte passati cavamāne uppajjamāne hīne paṇite suvaṇeṇa dubbaṇeṇa sugate duggate yathā-kammupage satte pajāneyyan" ti.|| ||

Tatra tatr'eva sakkhi-bhabbataɱ pāpuṇāti sati sati āyatane.|| ||

So sace ākaṅkhati|| ||

'Āsavānaɱ khayā anāsavaɱ ceto-vimuttiɱ||
paññā-vimuttiɱ||
diṭṭhe'va dhamme sayaɱ abhiññā||
sacchi-katvā upasampajja vihareyyan' ti.|| ||

Tatra tatr'eva sakkhi-bhabbataɱ pāpuṇāni sati sati āyatane" ti.|| ||

 


Contact:
E-mail
Copyright Statement