Anguttara Nikaya


[Site Map]  [Home]  [Sutta Indexes]  [Glossology]  [Site Sub-Sections]

The Pali is transliterated as IAST Unicode (āīūṃṅñṭḍṇḷ). Alternatives:
[ ASCII (aiumnntdnl) | Mobile (āīūŋńñţđņļ) | Velthuis (aaiiuu.m'n~n.t.d.n.l) ]

 

Aŋguttara-Nikāya
Pañcaka-Nipāta
IV. Sumanā Vagga

Sutta 38

Saddha Suttaɱ

Adapted from the 1995 edition of the digital version of the Sri Lanka Buddha Jayanti Tripitaka Series and proofed against, and mostly resolved to the Pali Text Society Anguttara-Nikaya edited by Prof. E. Hardy, Ph.D., D.D.

 


[42]

[1][pts][than][bodh]Evaɱ me sutaɱ:|| ||

Ekaɱ samayaɱ Bhagavā bhikkhu āmantesi:|| ||

"Bhikkhavo" ti.|| ||

"Bhadante" ti te bhikkhū Bhagavato paccassosuɱ.|| ||

Bhagavā etad avoca:|| ||

"Pañc'ime bhikkhave saddhe kulaputte ānisaɱsā.|| ||

Katame pañca?|| ||

2. Ye te bhikkhave loke santo sappurisā,||
te saddhaɱ yeva paṭhamaɱ anukampanti,||
no tathā assaddhaɱ;||
Saddhaɱ yeva paṭhamaɱ upasaŋkamantā upasaŋkamanti,||
no tathā assaddhaɱ;||
saddhass'eva paṭhamaɱ patigaṇhantā patigaṇhanti,||
no tathā assaddhaɱ;||
saddhass'eva paṭhamaɱ dhammaɱ desentā desenti,||
no tathā assaddhaɱ.|| ||

Saddho kāyassa bhedā param maraṇā sugatiɱ saggaɱ lokaɱ upapajjati.|| ||

Ime kho bhikkhave pañca saddhe kulaputte ānisaɱsā.|| ||

3. Seyyathā pi, bhikkhave, subhumiyaɱ cātummahāpathe mahānigrodho samantā pakkhīnaɱ paṭisaraṇaɱ hoti,||
evam [43] eva kho bhikkhave saddho kulaputto bahuno janassa paṭisaraṇaɱ hoti||
bhikkhūnaɱ bhikkhunīnaɱ upasakānaɱ upāsikānan" ti.|| ||

 

Sākhāpattaphalūpeto khandhimā va mahādumo,||
mūlavā phalasampanno patiṭṭhā hoti pakkhinaɱ.||
Manorame āyatane sevanti naɱ vihaŋgamā,||
chāyaɱ chāyatthikā yanti phalatthā phalabhojino.||
Tath'eva sīlampannaɱ saddhaɱ purisapuggalaɱ,||
nivātavuttiɱ atthaddhaɱ sorataɱ sakhilaɱ muduɱ||
vītarāgā vītadosā vītamohā anāsavā,||
puññakkhettāni lokasmiɱ sevanti tādisaɱ naraɱ.||
Te tassa dhammaɱ desenti sabbadukkhā panūdanaɱ,||
yaɱ so dhammaɱ idhaññāya parinibbāti anāsavo ti.|| ||

 


Contact:
E-mail
Copyright Statement   Webmaster's Page