Anguttara Nikaya


[Site Map]  [Home]  [Sutta Indexes]  [Glossology]  [Site Sub-Sections]

The Pali is transliterated as IAST Unicode (āīūṃṅñṭḍṇḷ). Alternatives:
[ ASCII (aiumnntdnl) | Mobile (āīūŋńñţđņļ) | Velthuis (aaiiuu.m'n~n.t.d.n.l) ]

 

Aŋguttara-Nikāya
Pañcaka-Nipāta
IV. Sumanā Vagga

Sutta 40

Mahā Sāla Suttaɱ

Adapted from the 1995 edition of the digital version of the Sri Lanka Buddha Jayanti Tripitaka Series and proofed against, and mostly resolved to the Pali Text Society Anguttara-Nikaya edited by Prof. E. Hardy, Ph.D., D.D.

 


[44]

[1][pts][bodh]Evaɱ me sutaɱ:|| ||

Ekaɱ samayaɱ Bhagavā bhikkhu āmantesi:|| ||

"Bhikkhavo" ti.|| ||

"Bhadante" ti te bhikkhū Bhagavato paccassosuɱ.|| ||

Bhagavā etad avoca:|| ||

"Himavantaɱ bhikkhave pabbatarājaɱ nissāya mahāsālā pañcahi vaḍḍhihi vaḍḍhanti.|| ||

Katamāhi pañcahi?|| ||

2. Sākhāpattapaḷāsena vaḍḍhanti.|| ||

Tacena vaḍḍhanti.|| ||

Papaṭikāya vaḍḍhanti.|| ||

Pheggunā vaḍḍhanti.|| ||

Sārena vaḍḍhanti.|| ||

Himavannaɱ bhikkhave pabbatarājaɱ nissāya mahāsālā imāhi pañcahi vaḍḍhīhi vaḍḍhanti.|| ||

Evam eva kho bhikkhave saddhaɱ kulapatiɱ nissāya antojano pañcahi vaḍḍhīhi vaḍḍhati.|| ||

Katamāhi pañcahi?|| ||

3. Saddhāya vaḍḍhati.|| ||

Sīlena vaḍḍhati.|| ||

Sutena vaḍḍhati.|| ||

Cāgena vaḍḍhati.|| ||

Paññāya vaḍḍhati.|| ||

Saddaɱ bhikkhave kulapatiɱ nissāya antojano imāhi pañcahi vaḍḍhīhi vaḍḍhatī" ti.|| ||

Yathā hi pabbato selo araññasmiɱ brahāvane,||
Taɱ rukkhā upanissāya vaḍḍhante te vanappatī.||
Tath'eva sīla sampannaɱ saddhaɱ kulapatiɱ idha,||
Upanissāya vaḍḍhanti puttadārā ca bandhavā,||
Amaccā ñātisaŋghā ca ye c'assa anujīvino.||
Tassa sīlavato sīlaɱ cāgaɱ sucaritāni ca,||
Passamānānukubbanti ye bhavanti vicakkhaṇā.||
Idha dhammaɱ caritvāna maggaɱ sugatigāminaɱ,||
Nandino devalokasmiɱ modanti kāmakāmino ti.|| ||

Sumanāvaggo catuttho.|| ||

 


Contact:
E-mail
Copyright Statement   Webmaster's Page