Anguttara Nikaya


[Site Map]  [Home]  [Sutta Indexes]  [Glossology]  [Site Sub-Sections]

The Pali is transliterated as IAST Unicode (āīūṃṅñṭḍṇḷ). Alternatives:
[ ASCII (aiumnntdnl) | Mobile (āīūŋńñţđņļ) | Velthuis (aaiiuu.m'n~n.t.d.n.l) ]

 

Anguttara Nikāya
Pañcaka Nipāta
5. Muṇḍarāja-Vagga

Sutta 43

Pañca Iṭṭha-Dhamma Suttaɱ

Adapted from the 1995 edition of the digital version of the Sri Lanka Buddha Jayanti Tripitaka Series and proofed against, and mostly resolved to the Pali Text Society Anguttara-Nikaya edited by Prof. E. Hardy, Ph.D., D.D.

 


 

[1][pts][than][bodh]Evaɱ me sutaɱ:|| ||

Ekaɱ samayaɱ Bhagavā Sāvatthiyaɱ viharati.|| ||

Atha kho Anāthapiṇḍiko gahapati yena Bhagavā ten'upasaŋkami.|| ||

Upasaŋkamitvā Bhagavantaɱ abhivādetvā eka-m-antaɱ nisīdi.|| ||

Ekamannaɱ nisinnaɱ kho Anāthapiṇḍikaɱ gahapatiɱ Bhagavā etad avoca:|| ||

Pañc'ime gahapati dhammā iṭṭhā kantā manāpā dullabhā lokasmiɱ.|| ||

Katame pañca?|| ||

Āyu kho gahapati iṭṭho kanto manāpo dullabho lokasmiɱ.|| ||

Vaṇṇo iṭṭho kanto manāpo dullabho lokasmiɱ.|| ||

Sukhaɱ iṭṭhaɱ kantaɱ manāpaɱ dullabhaɱ lokasmiɱ.|| ||

Yaso iṭṭho kanto manāpo dullabho lokasmiɱ.|| ||

Saggā iṭṭhā kantā manāpā dullabhā lokasmiɱ.|| ||

Ime kho gahapati pañca dhammā iṭṭhā kantā manāpā dullabhā lokasmiɱ.|| ||

Imesaɱ kho gahapati pañcannaɱ dhammānaɱ iṭṭhānaɱ kantānaɱ manāpānaɱ dullabhānaɱ lokasmiɱ. Na āyācanāhetu vā patthanāhetu vā paṭilābhaɱ vadāmi.|| ||

Imesaɱ kho gahapati pañcannaɱ iṭṭhānaɱ kantānaɱ manāpānaɱ dullabhānaɱ lokasmiɱ āyācanāhte [48] vā patthanāhetu vā paṭilābho abhavissa, ko idha kena hāyetha?|| ||

Na kho gahapati arahati ariyasāvako āyuɱ kāmo āyuɱ āyācituɱ vā abhinandituɱ vā āyussa vā pihetuɱ.|| ||

Āyukāmena gahapati ariyasāvakena āyusaɱvattanikā paṭipadā paṭipajjitabbā.|| ||

Āyusaɱvattanikā hi'ssa paṭipadā paṭipannā āyupaṭilābhāya saɱvattati.|| ||

So lābhī hoti āyussa dibbassa vā mānusassa vā.|| ||

Na kho gahapati arahati ariyasāvako vaṇṇakāmo vaṇṇaɱ āyācituɱ vā abhinandituɱ vā vaṇṇassa vā pihetuɱ.|| ||

Vaṇṇakāmena gahapati ariyasāvakena vaṇṇasaɱvattanikā paṭipadā paṭipajjitabbā.|| ||

Vaṇṇasaɱvattanikā hi'ssa paṭipadā paṭipannā vaṇṇapaṭilābhāya saɱvattati.|| ||

So lābhī hoti vaṇṇassa dibbassa vā mānusassa vā.|| ||

Na kho gahapati arahati ariyasāvako sukhakāmo sukhaɱ āyācituɱ vā abhinandituɱ vā sukhassa vā pihetuɱ.|| ||

Sukhakāmena gahapati ariyasāvakena sukhasaɱvattanikā paṭipadā paṭipajjitabibā.|| ||

Sukhasaɱvattanikā hi'ssa paṭipadā paṭipannā sukhapaṭilābhāya saɱvattati.|| ||

So lābhī hoti sukhassa dibbassa vā mānusassavā.|| ||

Na kho gahapati arahati ariyasāvako yasakāmo yasaɱ āyācituɱ vā abhinandituɱ vā yasassa vā pihetuɱ.|| ||

Yasakāmena gahapati ariyasāvakena yasasaɱvattanikā paṭipadā paṭipajjitabbā.|| ||

Yasasaɱvavattanikā hi'ssa paṭipadā paṭipannā yasapaṭilābhāya saɱvattati.|| ||

So lābhī hoti yasassa dibbassa vā mānusassa vā.|| ||

Na kho gahapati arahati ariyasāvako saggakāmo saggaɱ āyācituɱ vā abhinandituɱ vā saggānaɱ vā1 pihetuɱ.|| ||

Saggakāmena gahapati ariyasāvakena saggasaɱvattanikā paṭipadā paṭipajjitabbā.|| ||

Saggasaɱvattanikā hi'ssa paṭipadā paṭipannā saggapaṭilābhāya saɱvattati.|| ||

So lābhī hoti saggānan ti.|| ||

Āyuɱ vaṇṇaɱ yasaɱ kittiɱ saggaɱ uccākulīnataɱ,||
ratiyo patthayānena u'ārā aparāparaɱ,||
appamādaɱ pasaɱsanti puññakiriyāsu paṇḍitā.|| ||

[49] Appamatto ubho atthe adhigaṇhāti paṇḍito||
diṭṭhe dhamme ca yo attho yo c'attho samparāyiko,||
Atthābhisamayā dhīro paṇḍitoti pacuccatī ti.|| ||


Contact:
E-mail
Copyright Statement   Webmaster's Page