Anguttara Nikaya


[Site Map]  [Home]  [Sutta Indexes]  [Glossology]  [Site Sub-Sections]

The Pali is transliterated as IAST Unicode (āīūṃṅñṭḍṇḷ). Alternatives:
[ ASCII (aiumnntdnl) | Mobile (āīūŋńñţđņļ) | Velthuis (aaiiuu.m'n~n.t.d.n.l) ]

 

Anguttara Nikāya
Pañcaka Nipāta
5. Muṇḍarāja-Vagga

Sutta 45

Puññābhisanda Suttaɱ

Adapted from the 1995 edition of the digital version of the Sri Lanka Buddha Jayanti Tripitaka Series and proofed against, and mostly resolved to the Pali Text Society Anguttara-Nikaya edited by Prof. E. Hardy, Ph.D., D.D.

 


 

[1][pts][bodh] Evaɱ me sutaɱ:|| ||

Ekaɱ samayaɱ Bhagavā Sāvatthiyaɱ viharati
Jetavane Anāthapiṇḍikassa ārāme.|| ||

Tatra kho Bhagavā bhikkhū āmantesi:|| ||

'Bhikkhavo' ti.|| ||

'Bhadante' ti te bhikkhū Bhagavato paccassosuɱ.|| ||

2. Pañc'ime bhikkhave puññābhisandā kusalābhisandā sukhassāhārā sovaggikā sukhavipākā saggasaɱvattanikā iṭṭhāya kantāya manāpāya hitāya sukhāya saɱvattanti.|| ||

Katame pañca?|| ||

2. Yassa bhikkhave bhikkhu cīvaraɱ paribhuñjamāno appamāṇaɱ ceto-samādhiɱ upasampajja viharati,||
appamāṇo tassa puññābhisando kusalābhisando sukhassāhāro sovaggiko sukhavipāko saggasaɱvattaniko iṭṭhāya kantāya manāpāya hitāya sukhāya saɱvattati.|| ||

Yassa bhikkhave bhikkhu piṇḍapātaɱ paribhuñjamāno appamāṇaɱ ceto-samādhiɱ upasampajja viharati,||
appamāṇo tassa puññābhisando kusalābhisando sukhassāhāro sovaggiko sukhavipāko saggasaɱvattaniko iṭṭhāya kantāya manāpāya hitāya sukhāya saɱvattati.|| ||

Vihāraɱ paribhuñjamāno appamāṇaɱ ceto-samādhiɱ upasampajja viharati,||
appamāṇo tassa puññābhisando kusalābhisando sukhassāhāro sovaggiko sukhavipāko saggasaɱvattaniko iṭṭhāya kantāya manāpāya hitāya sukhāya saɱvattati.|| ||

Mañcapīṭhaɱ paribhuñjamāno appamāṇaɱ ceto-samādhiɱ upasampajja viharati,||
appamāṇo tassa puññābhisando kusalābhisando sukhassāhāro sovaggiko sukhavipāko saggasaɱvattaniko iṭṭhāya kantāya manāpāya hitāya sukhāya saɱvattati.|| ||

Gilānapacchayabhesajjaparikkhāraɱ paribhuñjamāno appamāṇaɱ ceto-samādhiɱ [52] upasampajja viharati,||
appamāṇo tassa puññābhisando kusalābhisando sukhassāhāro sovaggiko sukhavipāko saggasaɱvattaniko iṭṭhāya kantāya manāpāya hitāya sukhāya saɱvattati.|| ||

Ime kho bhikkhave pañca puññābhisandā kusalābhisandā sukhassāhārā sovaggikā sukhavipākā saggasaɱvattanikā iṭṭhāya kantāya manāpāya hitāya sukhāya saɱvattanti.|| ||

3. Imehi ca pana bhikkhave pañcahi puññābhisandehi kusalābhisandehi samannāgatassa ariyasāvakassa na sukaraɱ puññassa pamāṇaɱ gahetuɱ:|| ||

"Ettako puññāhisando kusalābhisando sukhassāhāro sovaggiko sukhavipāko saggasaɱvattaniko iṭṭhāya kantāya manāpāya hitāya sukhāya saɱvattatī" ti. Atha kho asaŋkheyyo appameyyo mahāpuññakkhandhotvve saŋkhaɱ gacchati.|| ||

Seyyathā pi, bhikkhave, mahasamudde na sukaraɱ udakassa pamāṇaɱ gahetuɱ|| ||

'Ettakāni udakāḷhakānīti vā||
ettakāni udakāḷhakasatānīti vā||
ettakāni udakāḷhaka satasahassānī' ti vā.|| ||

Atha kho asaŋkheyyo appameyyo mahāudakakkhandho tv eva saŋkhaɱ gacchati.|| ||

Evam eva kho bhikkhave imehi pañcahi puññābhisandehi kusalābhisandehi samannāgatassa ariyasāvakassa na sukaraɱ puññassa pamāṇaɱ gahetuɱ|| ||

'Ettako puññābhisando kusalābhisando sukhassāhāro sovaggiko sukhavipāko saggasaɱvattaniko iṭṭhāya kantāya manāpāya hitāya sukhāya saɱvattatī' ti.|| ||

Atha kho asaŋkheyyo appameyyo mahāpuññakkhandho tv eva saŋkhaɱ gacchatī ti.|| ||

Mahodadhiɱ aparimitaɱ mahāsaraɱ||
Bahubheravaɱ ratanagaṇānam ālayaɱ,||
Najjo yathā macchagaṇasaŋghasevitā||
Puthū savantī upayanti sāgaraɱ.||
[53] evaɱ naraɱ annadapānavatthadaɱ||
Seyyā nisajjattharaṇassa dāyakaɱ,||
Puññassa dhārā upayanti paṇḍitaɱ||
Najjo yathā vārivahāva sāgaran ti.|| ||


Contact:
E-mail
Copyright Statement   Webmaster's Page