Anguttara Nikaya


[Site Map]  [Home]  [Sutta Indexes]  [Glossology]  [Site Sub-Sections]

The Pali is transliterated as IAST Unicode (āīūṃṅñṭḍṇḷ). Alternatives:
[ ASCII (aiumnntdnl) | Mobile (āīūŋńñţđņļ) | Velthuis (aaiiuu.m'n~n.t.d.n.l) ]

 

Aŋguttara Nikāya
Pañcaka Nipāta
VI: Nīvaraṇa Vagga

Sutta 51

Nīvaraṇa Suttaɱ

Adapted from the 1995 edition of the digital version of the Sri Lanka Buddha Jayanti Tripitaka Series and proofed against, and mostly resolved to the Pali Text Society Anguttara-Nikaya edited by Prof. E. Hardy, Ph.D., D.D.

 


 

[1][pts][than][bodh] Evaɱ me sutaɱ ekaɱ samayaɱ Bhagavā Sāvatthiyaɱ viharati jtevane Anāthapiṇḍikassa ārāme.|| ||

Tatra kho Bhagavā bhikkhu āmattesi:

"Bhikkhavo" ti.|| ||

"Bhadante" ti te bhikkhu Bhagavato paccassosuɱ.|| ||

Bhagavā etad avoca:|| ||

"Pañc'ime bhikkhave āvaraṇā nīvaraṇā cetaso ajjhāruhā paññāya dubbalīkaraṇā.|| ||

Katame pañca?|| ||

Kāmacchando bhikkhave āvaraṇo nīvaraṇo cetaso ajjhāruho paññāya dubbalīkaraṇo.|| ||

Vyāpādo bhikkhave āvaraṇo nīvaraṇo cetaso ajjhāruho paññāya dubbalīkaraṇo.|| ||

Thīnamiddhaɱ bhikkhave āvaraṇaɱ nīvaraṇaɱ cetaso ajjhāruhaɱ paññāya dubbalīkaraṇaɱ.|| ||

Uddhaccakukkuccaɱ bhikkhave āvaraṇaɱ nīvaraṇaɱ cetaso ajjhārahaɱ paññāya dubbalīkaraṇaɱ.|| ||

Vicikicchā bhikkhave āvaraṇā nīvaraṇā cetaso ajjhāruhā paññāya dubbalīkaraṇā.|| ||

Ime kho bhikkhave pañca āvaraṇā nīvaraṇā cetaso ajjhāruhāpaññāya dubbalīkaraṇā.|| ||

So vata bhikkhave bhikkhu,||
ime pañca āvaraṇe nīvaraṇe cetaso ajjhāruhe paññāya dubbalīkaraṇe appahāya abalāya paññāya dubbalāya attatthaɱ vā ñassati,||
[64] paratthaɱ vā ñassati,||
ubhayatthaɱ vā ñassati,||
uttariɱ vā manussadhammā alamariyañāṇadassanavisesaɱ sacchikarissatī'ti n'etaɱ ṭhānaɱ vijjati.|| ||

seyyathā pi, bhikkhave, nadī pabbateyyā dūraŋgamā sīghasotā hārahāriṇī,||
tassā puriso ubhato naŋgalamukhāni vivareyya,||
evaɱ hi so bhikkhave majjhe nadiyā soto vikkhitto visaṭo khyādinno na c'eva dūraŋgamo assa,||
na sīghasoto, na hārahārī.|| ||

Evam eva kho bhikkhave so vata bhikkhu ime pañca āvaraṇe nivaraṇe cetaso ajjhāruhe paññāya dubbalīkaraṇe appahāya abalāya paññāya dubbalāya attatthaɱ vā ñassati,||
paratthaɱ vā ñassati,||
ubhayatthaɱ vā ñassati,||
uttariɱ vā manussadhammā alamariyañāṇadassanavisesaɱ sacchikarissatī'ti n'etaɱ ṭhānaɱ vijjati.|| ||

So vata bhikkhave bhikkhu ime pañca āvaraṇe nīvaraṇe cetaso ajjhāruhe paññāya dubbalīkaraṇe pahāya balavatiyā paññāya attatthaɱ vā ñassati,||
paratthaɱ vā ñassati,||
ubhayatthaɱ vā ñassati,||
uttariɱ vā manussadhammā alamariyañāṇadassanavisesaɱ sacchikarissatī'ti ṭhāname taɱ vijjati.|| ||

seyyathā pi, bhikkhave, nadī pabbateyyā dūraŋgamā sīghasotā hārahāriṇī,||
tassā puriso ubhato naŋgalamukhāni pidaheyya,||
evaɱ hi so bhikkhave majjhe nadiyā soto avikkhitto avisaṭo abyādinno dūraŋgamo c'eva assa sīghasoto ca hārahārī ca.|| ||

Evam eva kho bhikkhave so vata bhikkhu ime pañca āvaraṇe nīvaraṇe cetaso ajjhāruhe paññāya dubbalīkaraṇe pahāya balavatiyā paññāya attatthaɱ vā ñassati,||
paratthaɱ vā ñassati.|| ||

Ubhayatthaɱ vā ñassati,||
uttariɱ vā manussadhammā alamariyañāṇadassanavisesaɱ sacchikarissatī'ti ṭhaname taɱ vijjati.|| ||

 


Contact:
E-mail
Copyright Statement   Webmaster's Page