Anguttara Nikaya


[Site Map]  [Home]  [Sutta Indexes]  [Glossology]  [Site Sub-Sections]

The Pali is transliterated as IAST Unicode (āīūṃṅñṭḍṇḷ). Alternatives:
[ ASCII (aiumnntdnl) | Mobile (āīūŋńñţđņļ) | Velthuis (aaiiuu.m'n~n.t.d.n.l) ]

 

Aŋguttara Nikāya
Pañcaka Nipāta
VI: Nīvaraṇa Vagga

Sutta 55

Mātā-Putta Suttaɱ

Adapted from the 1995 edition of the digital version of the Sri Lanka Buddha Jayanti Tripitaka Series and proofed against, and mostly resolved to the Pali Text Society Anguttara-Nikaya edited by Prof. E. Hardy, Ph.D., D.D.

 


[67]

[1][pts][bodh] Evaɱ me sutaɱ.|| ||

Ekaɱ samayaɱ Bhagavā Sāvatthiyaɱ viharati Jetavane Anāthapiṇḍikassa Ārāme.|| ||

Tena kho pana samayena Sāvatthiyaɱ ubho mātāputtā vassāvāsaɱ upagamiɱsu,||
bhikkhu ca bhikkhuṇi ca.|| ||

Te añññamañññassa abhiṇahaɱ dassanakāmā ahesuɱ.|| ||

Mātā pi puttassa abhiṇhaɱ dassanakāmā ahosī.|| ||

Putto pi mātaraɱ abhiṇhaɱ dassanakāmo ahosi.|| ||

Tesaɱ abhiṇahaɱ dassanā saɱsaggo ahosi,||
saɱsagge sati vissāso ahosi,||
vissāse sati otāro ahosi.|| ||

Te otiṇṇacittā sikkhaɱ apaccakkhāya dubbalyaɱ anāvīkatvā methutaɱ dhammaɱ patiseviɱsu.|| ||

2. Atha kho sambahulā bhikkhu yena Bhagavā ten'upasaŋkamiɱsu.|| ||

Upasaŋkamitvā Bhagavantaɱ abhivādetvā eka-m-antaɱ nisidiɱsu.|| ||

Eka-m-antaɱ nisinnā kho te bhikkhu Bhagavantaɱ etad avocuɱ:|| ||

'Idha bhante Sāvatthiyaɱ ubho mātā puttā vassāvāsaɱ upagamiɱsu,||
bhikkhu ca bhikkhuṇi ca.|| ||

Te aññamaññassa [68] abhiṇahaɱ dassanakāmā ahesuɱ.|| ||

Mātā pi puttassa abhiṇahaɱ dassanakāmā ahosi.|| ||

Putto pi mātaraɱ abhiṇahaɱ dassanakāmo ahosi.|| ||

Tesaɱ abhiṇahaɱ dassanā saɱsaggo ahosi,||
saɱsagge sati vissāso ahosi,||
vissāse sati otāro ahosī.|| ||

Te otiṇṇacittā sikkhāɱ apaccakkhāya dubbalyaɱ anāvīkatvā methunaɱ dhammaɱ patiseviɱsu' ti.|| ||

3. 'Kin nu so bhikkhave moghapuriso maññati||
"na mātā putte sārajjati,||
putto vā pana mātarī" ti?|| ||

Nāhaɱ bhikkhave aññaɱ eka-rūpam pi samanupassāmi||
evaɱ rājaniyaɱ,||
evaɱ kamanīyaɱ,||
evaɱ madanīyaɱ,||
evaɱ bandhanīyaɱ,||
evaɱ mucchanīyaɱ,||
evaɱ antarāyakaraɱ anuttarassa yogatkhemassa adhigamāya,||
yathayidaɱ bhikkhave itthi-rūpaɱ.|| ||

Itthi-rūpe bhikkhave sattā rattā giddhā gadhitā mucchitā ajjhopannā,||
te dīrattaɱ socanti itthi-rūpa-vasānugā.|| ||

Nāhaɱ bhikkhave aññaɱ eka-saddam pi samanupassāmi||
evaɱ rājaniyaɱ,||
evaɱ kamanīyaɱ,||
evaɱ madanīyaɱ,||
evaɱ bandhanīyaɱ,||
evaɱ mucchanīyaɱ,||
evaɱ antarāyakaraɱ anuttarassa yogatkhemassa adhigamāya,||
yathayidaɱ bhikkhave itthi-saddam.|| ||

Itthi-sadde bhikkhave sattā rattā giddhā gadhitā mucchitā ajjhopannā,||
te dīrattaɱ socanti itthi-sadda-vasānugā.|| ||

Nāhaɱ bhikkhave aññaɱ eka-gandham pi samanupassāmi,||
evaɱ rājaniyaɱ,||
evaɱ kamanīyaɱ,||
evaɱ madanīyaɱ,||
evaɱ bandhanīyaɱ,||
evaɱ mucchanīyaɱ,||
evaɱ antarāyakaraɱ anuttarassa yogatkhemassa adhigamāya,||
yathayidaɱ bhikkhave itthirūpaɱ.|| ||

Itth-gandhe bhikkhave sattā rattā giddhā gadhitā mucchitā ajjhopannā,||
te dīrattaɱ socanti itthi-gandha-vasānugā.|| ||

Nāhaɱ bhikkhave aññaɱ eka-rasam pi samanupassāmi,||
evaɱ rājaniyaɱ,||
evaɱ kamanīyaɱ,||
evaɱ madanīyaɱ,||
evaɱ bandhanīyaɱ,||
evaɱ mucchanīyaɱ,||
evaɱ antarāyakaraɱ anuttarassa yogatkhemassa adhigamāya,||
yathayidaɱ bhikkhave itthi-rasaɱ.|| ||

Itthi-rase bhikkhave sattā rattā giddhā gadhitā mucchitā ajjhopannā,||
te dīrattaɱ socanti itthirasavasānugā.|| ||

Nāhaɱ bhikkhave aññaɱ eka-phoṭṭhabbam pi samanupassāmi,||
evaɱ rājaniyaɱ,||
evaɱ kamanīyaɱ,||
evaɱ madanīyaɱ,||
evaɱ bandhanīyaɱ,||
evaɱ mucchanīyaɱ,||
evaɱ antarāyakaraɱ anuttarassa yogatkhemassa adhigamāya,||
yathayidaɱ bhikkhave itthi-poṭṭhabbo.|| ||

Itthi-poṭṭhabbe bhikkhave sattā rattā giddhā gathitā mucjitā ajjhopannā||
te dīgha-rattaɱ socanti itthi-poṭṭhabba-vasānugā.|| ||

Itthi bhikkhave gacchantī pi purisassa cittaɱ pariyādāya tiṭṭhati.|| ||

Ṭhitā pi nisinnā pi sayānā pi hasanti pi bhaṇanatī pi gāyantī pi rodantī pi ugghānitā pi mātā pi purisassa cittaɱ pariyādāya tiṭṭhati.|| ||

Yam hi taɱ bhikkhave sammā vadamāno vadeyya:|| ||

"Samannapāso Mārassā' ti|| ||

mātugāmaɱ yeva sammā vadamāno vadeyya:|| ||

"Samannapāso Mārassā' ti.|| ||

[69]Salalape asihatthe pisācena pi sallape,||
Āsīvisam pi āside yena daṭṭho na jīvati.|| ||

Na tv eva eko ekāya mātugāmena sallape,||
Muṭṭhassatiɱ tā bandhanti pekkhitena mhitena ca,|| ||

Atho pi dunnivatthena mañajunā bhaṇitena ca,||
n'eso jano suvāsīsaddo api ugghātito mato.|| ||

Pañca kāmaguṇā ete itthirūpasmiɱ dissare,||
Rūpā saddā rasā gandhā phoṭṭhabbā ca manoramā.|| ||

Tesaɱ kāmoghavuḷhānaɱ kāme aparijānataɱ,||
Kālaɱ gatiɱ bhavābhavaɱ saɱsārasmiɱ purakkhatā.|| ||

Ye ca kāme pariññāya caranti akutobhayā,||
Te ve pāragatā loke ye pattā āsavakkhayan' ti.|| ||


Contact:
E-mail
Copyright Statement   Webmaster's Page