Anguttara Nikaya


[Site Map]  [Home]  [Sutta Indexes]  [Glossology]  [Site Sub-Sections]

The Pali is transliterated as IAST Unicode (āīūṃṅñṭḍṇḷ). Alternatives:
[ ASCII (aiumnntdnl) | Mobile (āīūŋńñţđņļ) | Velthuis (aaiiuu.m'n~n.t.d.n.l) ]

 

Aŋguttara Nikāya
Pañcaka Nipāta
VI: Nīvaraṇa Vagga

Sutta 56

Upajjhāya Suttaɱ

Adapted from the 1995 edition of the digital version of the Sri Lanka Buddha Jayanti Tripitaka Series and proofed against, and mostly resolved to the Pali Text Society Anguttara-Nikaya edited by Prof. E. Hardy, Ph.D., D.D.

 


[69]

[1][pts][bodh] Evaɱ me sutaɱ.|| ||

Ekaɱ samayaɱ Bhagavā Sāvatthiyaɱ viharati Jetavane Anāthapiṇḍikassa Ārāme.|| ||

2. Atha kho aññataro bhikkhu yena sako upajjhāyo ten'upasaŋkami.|| ||

Upasaɱkamitvā sakaɱ ujjajhāyaɱ etad avoca:|| ||

'Etarahi me bhante madhurakajāto c'eva kāyo.|| ||

Disā ca me na pakkhāyanti.|| ||

Dhammā ca maɱ na ppaṭibhanti.|| ||

Thīnamiddhañ ca me cittaɱ pariyādāya tiṭṭhati.|| ||

Anabhirato ca brahmacariyaɱ carāmi.|| ||

Atthi ca me dhammesu vicikicchā' ti.|| ||

3. Atha kho so bhikkhu taɱ saddhivihāritaɱ bhikkhuɱ ādāya yena Bhagavā ten'upasaŋkami.|| ||

Upasaŋkamitvā Bhagavantaɱ abhivādetvā eka-m-antaɱ nisīdi.|| ||

Eka-m-antaɱ nisinno kho so bhikkhu Bhagavantaɱ etad avoca:|| ||

Ayaɱ bhante bhikkhu evam āha:|| ||

'Etarahi me bhante madhurakajāto c'eva kāyo.|| ||

Disā ca me napakkhāyanti.|| ||

Dhammā ca maɱ na ppaṭibhanti.|| ||

Thīnamiddhañ ca me cittaɱ pariyādāya tiṭṭhati.|| ||

Anabhirato ca brahamacariyaɱ carāmi.|| ||

Atthi ca me dhammesu vicikicchā' ti.|| ||

[70] 4. Evaɱ h'etaɱ bhikkhu hoti.|| ||

Indriyesu aguttadvārassa,||
bhojane amattaññuno,||
jāgariyaɱ ananuyuttassa,||
avipassakassa kusalānaɱ dhammānaɱ,||
pubbarattāpararattaɱ bodhipakkhiyānaɱ dhammānaɱ bhāvanānuyogaɱ ananuyuttassa viharato,||
yaɱ madhurakajāto c'eva kāyo hoti,||
disā c'assa na pakkhāyanti,||
dhammā ca taɱ na ppaṭibhanti,||
thīnamiddhaɱ c'assa cittaɱ pariyādāya tiṭṭhati,||
anabhirato ca brahmacariyaɱ carati,||
hoti c'assa dhammesu vicikicchā.|| ||

Tasmā ti ha te bhikkhu evaɱ sikkhitabbaɱ:|| ||

'Indriyesu guttadvāro bhavissāmi,||
bhojane mattaññu,||
jāgariyaɱ anuyutto,||
vipassako kusalānaɱ dhammānaɱ,||
pubbarattāpararattaɱ bodhipakkhiyānaɱ dhammānaɱ bhāvanānuyogaɱ anuyutto viharissāmi' ti.|| ||

"Evaɱ hi te bhikkhu sikkhitabban ti.|| ||

5. Atha kho so bhikkhu Bhagavatā iminā ovādena ovadito uṭṭhāy āsanā Bhagavankaɱ abhivādetvā padakkhiṇaɱ katvā pakkāmi.|| ||

Atha kho so bhikkhu eko vupakaṭṭho appamatto ātāpī pahitatto viharanto na cirass'eva yassatthāya kulaputtā samma-d-eva agārasmā anagāriyaɱ pabbajanti,||
tad anuttaraɱ brahmacariyapariyosānaɱ diṭṭhe va dhamme sayaɱ abhiññā sacchiktvā upasampajja vihāsi:|| ||

Khīṇa jāti,||
vusitaɱ brahamacariyaɱ,||
kataɱ karaṇiyaɱ,||
nāparaɱ itthattāyā' ti.|| ||

Abbhaññāsi aññataro ca pana so bhikkhu arahataɱ ahosi.|| ||

Atha kho so bhikkhu arahattappatto yena sako upajjhāyo ten'upasaŋkami.|| ||

Upasaŋkamitvā sakaɱ upajjhāyaɱ etad avoca:|| ||

'Etarahi me bhante na c'eva madhurakajāto kāyo.|| ||

Disā ca me pakkhāyanti.|| ||

Dhammā ca maɱ paṭibhanti.|| ||

Thīnamiddhaɱ ca me cittaɱ na pariyādāya tiṭṭhati.|| ||

Abhirato ca brahamacariyaɱ carāmi.|| ||

N'atthi ca me dhammesu vickicchā' ti.|| ||

7. Atha kho so bhikkhu taɱ saddhivihārikaɱ bhikkhuɱ ādāya yena Bhagavā ten'upasaŋkami.|| ||

Upasaŋkamitvā [71] Bhagavantaɱ abhivādetvā eka-m-antaɱ nisidi.|| ||

Eka-m-antaɱ nisinno kho so bhikkhu Bhagavantaɱ etad avoca:|| ||

Ayaɱ bhante bhikkhu evam āha:|| ||

'Etarahi me bhante na c'eva madhurakajāto kāyo.|| ||

Disā ca me pakkhāyanti.|| ||

Dhammā ca maɱ paṭibhanti.|| ||

Thīnamiddhaɱ ca me cittaɱ na pariyādāya tiṭṭhati.|| ||

Abhirato ca brahamacariyaɱ carāmi.|| ||

N'atthi ca me dhammesu vicikicchā' ti.|| ||

8. Evaɱ hi taɱ bhikkhu hoti.|| ||

Indriyesu guttadvārassa,||
bhojane mattaññuno,||
jāgariyaɱ anuyuttassa,||
vipassakassa kusalānaɱ dhammānaɱ,||
pubbarattāpararattaɱ bodhipakkhikānaɱ dhammānaɱ bhāvanānuyogaɱ anuyuttassa viharato,||
yaɱ na c'eva madhurakajāto kāyo hoti,||
disā c'assa pakkhāyanti,||
dhammā ca taɱ paṭibhanti,||
thīnamiddhaɱ c'assa cittaɱ na pariyādāya tiṭṭhati,||
abhirato ca brahamacariyaɱ carati,||
na c'assa hoti dhammesu vicikicchā.|| ||

Tasmā ti ha vo bhikkhave evaɱ sikkhitabba:|| ||

'Indriyesu guttadvārā bhavissāma,||
bhojane mattaññuno,||
jāgariyaɱ anuyuttā,||
vipassakā kusalānaɱ dhammānaɱ,||
pubbarattāpararattaɱ bodhipakkhiyānaɱ dhammānaɱ bhāvanānuyogaɱ anuyuttā viharissāmā' ti.|| ||

Evaɱ hi vo bhikkhave sikkhitabbanti.|| ||


Contact:
E-mail
Copyright Statement   Webmaster's Page