Anguttara Nikaya


[Site Map]  [Home]  [Sutta Indexes]  [Glossology]  [Site Sub-Sections]

The Pali is transliterated as IAST Unicode (āīūṃṅñṭḍṇḷ). Alternatives:
[ ASCII (aiumnntdnl) | Mobile (āīūŋńñţđņļ) | Velthuis (aaiiuu.m'n~n.t.d.n.l) ]

 

Anguttara Nikāya
Pañcaka Nipāta
11. Phāsuvihāra Vagga

Sutta 103

Mahā Cora Suttaɱ

Adapted from the 1995 edition of the digital version of the Sri Lanka Buddha Jayanti Tripitaka Series and proofed against, and mostly resolved to the Pali Text Society Anguttara-Nikaya edited by Prof. E. Hardy, Ph.D., D.D.

 


 

[1][pts]Evaɱ me sutaɱ:|| ||

Ekaɱ samayaɱ Bhagavā Sāvatthiyaɱ viharati.|| ||

Tatra kho Bhagavā bhikkhu āmantesi:|| ||

"Bhikkhavo" ti.|| ||

"Bhadante" ti te bhikkhū Bhagavato paccassosuɱ.|| ||

Bhagavā etad avoca:|| ||

"Pañcahi bhikkhave, aŋgehi samannāgato mahācoro||
sandhim pi chindanti,||
nillopam pi harati,||
ekāgārikam pi karoti,||
paripanthe pi tiṭṭhati.|| ||

Katamehi pañcahi?|| ||

2. Idha, bhikkhave, mahācoro,||
visamanissito ca hoti,||
gahananissito ca,||
balavanissito ca,||
bhogacāgī ca,||
ekacārī ca.|| ||

3. Kathañ ca bhikkhave, mahācoro visamanissito hoti?|| ||

Idha bhikkhave mahācoro nadīviduggaɱ vā nissito hoti pabbatavisamaɱ vā.|| ||

Evaɱ kho bhikkhave mahācoro visamanissito hoti.|| ||

 

 

4. Kathañ ca bhikkhave, mahācoro gahananissito hoti?|| ||

Idha bhikkhave mahācoro tiṇaghanaɱ vā nissito hoti||
rukkhagahanaɱ vā||
rodhaɱ vā||
mahāvanasaṇḍaɱ.|| ||

Evaɱ kho bhikkhave mahācoro gahananissito hoti.|| ||

 

 

5. Kathañ ca bhikkhave, mahācoro balavanissito hoti?|| ||

Idha bhikkhave mahācoro rājānaɱ vā||
rājamahāmattaɱ vā||
nissito hoti.|| ||

Tassa evaɱ hoti:|| ||

'Sace maɱ koci [129] kiñci vakkhati,||
ime rājāno vā||
rājamahāmattā vā||
pariyodhāya atthaɱ bhaṇissantī' ti.|| ||

Sace naɱ koci kiñci āha,||
tyāssa rājāno vā||
rājamahāmattā vā||
pariyodhāya atthaɱ bhaṇanti.|| ||

Evaɱ kho bhikkhave mahācoro balavanissito hoti.|| ||

 

 

6. Kathañ ca bhikkhave, mahācoro bhogacāgī hoti?|| ||

Idha bhikkhave mahācoro aḍḍho hoti mahaddhano mahābhogo.|| ||

Tassa evaɱ hoti:|| ||

'Sace maɱ koci kiñci vakkhati,||
ito bhogena paṭisantharissāmi' ti.|| ||

Sace naɱ koc kiñci āha,||
tato bhogena paṭisantharati.|| ||

Evaɱ kho bhikkhave mahācoro bhogacāgī hoti.|| ||

 

 

7. Kathañ ca bhikkhave, mahācoro ekacāri hoti?|| ||

Idha bhikkhave mahācoro ekako niggahaṇāni kattā hoti.|| ||

Taɱ kissa hetu?|| ||

'Mā me guyhamantā bahiddhā sambhedaɱ agamaɱsu' ti.|| ||

Evaɱ kho bhikkhave mahācoro ekacāri hoti.|| ||

Imehi kho bhikkhave, pañcahi aŋgehi samannāgato mahācoro||
sandhim pi chindanti,||
nillopam pi harati,||
ekāgārikam pi karoti,||
paripanthe pi tiṭṭhati.|| ||

 

 

8. Evam eva kho bhikkhave,||
pañcahi dhammehi samannāgato pāpabhikkhu,||
khataɱ upahataɱ attānaɱ pariharati,||
sāvajjo ca hoti sānuvajjo viññunaɱ,||
bahuñ ca apuññaɱ pasavati.|| ||

Katamehi pañcahi?|| ||

9. Idha, bhikkhave, pāpabhikkhu,||
visamanissito ca hoti,||
gahaŋanissito ca,||
balavanissito ca,||
bhogacāhī ca,||
ekacārī ca.|| ||

10. Kathaña bhikkhave, pāpabhikkhu visamanissito hoti?|| ||

Idha bhikkhave pāpabhikkhu,||
visamena kāyakammena samannāgato hoti,||
visamena vacīkammena samannāgato hoti,||
visamena manokammena samannāgato hoti.|| ||

Evaɱ kho bhikkhave pāpabhikkhu visamanissito hoti.|| ||

 

 

11. Kathañ ca bhikkhave, pāpabhikkhu gahaŋanissito hoti?|| ||

[130] Idha bhikkhave pāpabhikkhu,||
micichādiṭṭhiko hoti,||
antaggāhikāya diṭṭhiyā samannāgato.|| ||

Evaɱ kho bhikkhave pāpabhikkhu gahaŋanissito hoti.|| ||

 

 

12. Kathañ ca bhikkhave, pāpabhikkhu balavanissito hoti?|| ||

Idha bhikkhave pāpabhikkhu,||
rājānaɱ vā,||
rājamahāmattaɱ vā nissito hoti.|| ||

Tassa evaɱ hoti:|| ||

'Sace maɱ koci kiñci vakkhati,||
ime me rājāno vā,||
rājamahāmattā vā,||
pariyodhāya atthaɱ bhaṇissantī' ti.|| ||

Sace naɱ koci kiñci āha,||
tyāssa rājāno vā,||
rājamahāmattā vā,||
pariyodhāya atthaɱ bhaṇnti.|| ||

Evaɱ kho bhikkhave pāpabhikkhu balavanissito hoti.|| ||

 

 

13. Kathañ ca bhikkhave, pāpabhikkhu bhogacāgī hoti?|| ||

Idha bhikkhave pāpabhikkhu,||
lābhī hoti cīvara-piṇḍapāta-senāsana-gilāna-ppaccaya-bhesajja-parikkhārānaɱ.|| ||

Tassa evaɱ hoti:|| ||

'Sace maɱ koci kiñci vakkhati,||
ito lābhena paṭisantharissāmi' ti.|| ||

Sace naɱ koci kiñci āha,||
tato lābhena paṭisantharati.|| ||

Evaɱ kho bhikkhave pāpabhikkhu bhogacāgī hoti.|| ||

 

 

14. Kathañ ca bhikkhave, pāpabhikkhu ekacārī hoti?|| ||

Idha bhikkhave pāpabhikkhu,||
ekako paccantimesu janapadesu nivāsaɱ kappeti.|| ||

So tattha kulāni upasaŋkamanto lābhaɱ labhati.|| ||

Evaɱ kho bhikkhave pāpabhikkhu ekacārī hoti.|| ||

Imehi kho bhikkhave, pañcahi dhammehi samannāgato pāpabhikkhu,||
khataɱ upahataɱ attānaɱ pariharati,||
sāvajjo ca hoti sānuvajjo viññūnaɱ,||
bahuñ ca apuññaɱ pasavati" ti.|| ||


Contact:
E-mail
Copyright Statement   Webmaster's Page