Anguttara Nikaya


[Site Map]  [Home]  [Sutta Indexes]  [Glossology]  [Site Sub-Sections]

The Pali is transliterated as IAST Unicode (āīūṃṅñṭḍṇḷ). Alternatives:
[ ASCII (aiumnntdnl) | Mobile (āīūŋńñţđņļ) | Velthuis (aaiiuu.m'n~n.t.d.n.l) ]

 

Anguttara Nikaya
Pañcaka-Nipāta
12. Andhakavinda Vagga

Sutta 114

Adapted from the 1995 edition of the digital version of the Sri Lanka Buddha Jayanti Tripitaka Series and proofed against, and mostly resolved to the Pali Text Society Anguttara-Nikaya edited by Prof. E. Hardy, Ph.D., D.D.

Andhakavinda Suttaɱ

 


 

[1][pts][than] Ekaɱ samayaɱ Bhagavā Magadhesu viharati Andhakavinde.|| ||

Atha kho āyasmā Ānando yena Bhagavā ten'upasaŋkami.|| ||

Upasaŋkamitvā Bhagavantaɱ abhivādetvā eka-m-antaɱ nisīdi.|| ||

Eka-m-antaɱ nisinnaɱ kho āyasmantaɱ Ānandaɱ Bhagavā etad avoca:|| ||

Ye te Ānanda bhikkhu navā acirapabbajitā adhunāgatā imaɱ dhamma-vinayaɱ,||
te vo Ānanda bhikkhu pañcasu dhammesu||
samādapetabbā,||
nivesetabbā,||
patiṭṭhāpetabbā.|| ||

Katamesu pañcasu?|| ||

"Etha tumhe āvuso, sīlavā hotha,||
pātimokkhasaɱvarasaɱvutā viharatha ācāragocarasampannā,||
aṇumattesu vajjesu bhayadassāvino,||
samādāya sikkhatha sikkhāpadesu ti."|| ||

Iti pātimokkhasaɱvare||
samādapetabbā,||
nivesetabbā,||
patiṭṭhāpetabbā.|| ||

"Etha tumhe āvuso,||
indriyesu guttadvārā viharatha ārakkhasatino nipakkasatino sārakkhitamānasā satārakkhena cetasā samannāgatā ti.|| ||

"Iti indriyasaɱvare||
samādapetabbā,||
nivesetabbā,||
patiṭṭhāpetabbā.|| ||

"Etha tumhe āvuso,||
appabhassā hotha bhassapariyantakārino ti."|| ||

Iti bhassapariyante||
samādapetabbā,||
nivesetabbā,||
patiṭṭhāpetabbā.|| ||

"Etha tumhe āvuso,||
āraññakā hotha araɱ yevanapatthāni pantāni senāsanāni paṭisevathā" ti.|| ||

Iti kāyavupakāse||
samādapetabbā,||
nivesetabbā,||
patiṭṭhāpetabbā.|| ||

"Etha tumhe āvuso,||
sammādiṭṭhikā hotha sammādassanena samannāgatā ti."|| ||

Iti sammādassane||
samādapetabbā,||
nivesetabbā,||
patiṭṭhāpetabbā.|| ||

[139] Ye te Ānanda bhikkhu navā acirapabbajitā adhunāgatā imaɱ dhamma-vinayaɱ,||
te vo Ānanda bhikkhu imesu pañcasu dhammesu samādapetabbā,||
nivesetabbā,||
patiṭṭhāpetabbāti.|| ||


Contact:
E-mail
Copyright Statement   Webmaster's Page