Anguttara Nikaya


[Site Map]  [Home]  [Sutta Indexes]  [Glossology]  [Site Sub-Sections]

The Pali is transliterated as IAST Unicode (āīūṃṅñṭḍṇḷ). Alternatives:
[ ASCII (aiumnntdnl) | Mobile (āīūŋńñţđņļ) | Velthuis (aaiiuu.m'n~n.t.d.n.l) ]

 

Anguttara Nikāya
Pañcaka Nipāta
13. Gilāna Vaggo

Sutta 130

Sampadā Suttaɱ

Adapted from the 1995 edition of the digital version of the Sri Lanka Buddha Jayanti Tripitaka Series and proofed against, and mostly resolved to the Pali Text Society Anguttara-Nikaya edited by Prof. E. Hardy, Ph.D., D.D.

 


 

[1][pts][than]Evaɱ me sutaɱ:|| ||

Ekaɱ samayaɱ Bhagavā Sāvatthiyaɱ viharati.|| ||

Tatra kho Bhagavā bhikkhu āmantesi:|| ||

"Bhikkhavo" ti.|| ||

"Bhadante" ti te bhikkhū Bhagavato paccassosuɱ.|| ||

Bhagavā etad avoca:|| ||

2. "Pañcimāni bhikkhave byasanāni.|| ||

Katamāni pañca?|| ||

Ñātibyasanaɱ,||
bhogabyasanaɱ,||
rogabyasanaɱ,||
sīlabyasanaɱ,||
diṭṭhibyasanaɱ.|| ||

Na bhikkhave sattā ñātibyasanahetu vā||
bhogabyasanahetu vā||
rogabyasanahetu vā||
kāyassa bhedā param maraṇā apāyaɱ duggatiɱ vinipātaɱ Nirayaɱ upapajjanti.|| ||

Sīlabyasanahetu vā bhikkhave sattā diṭṭhibyasanahetu vā kāyassa bhedā param maraṇā apāyaɱ duggatiɱ vinipātaɱ Nirayaɱ upapajjanti.|| ||

Imāni kho bhikkhave pañca byasanāni.|| ||

 


 

Pañcimā bhikkhave sampadā.|| ||

Katamā pañca?|| ||

Ñātisampadā,||
bhogasampadā,||
ārogyasampadā,||
sīlasampadā,||
diṭṭhisampadā.|| ||

Na bhikkhave sattā ñātisampadāhetu vā bhogasampadāhetu vā ārogyasampadāhetu vā kāyassa bhedā param maraṇā sugatīɱ saggaɱ lokaɱ uppajjanti.|| ||

Sīlasampadāhetu vā bhikkhave sattā diṭṭisampadā hetu vā kāyassa bhedā param maraṇā sugatiɱ saggaɱ lokaɱ upapajjanti.|| ||

Imā kho bhikkhave pañca sampadāti.|| ||

Gilānavaggo tatiyo.|| ||


Contact:
E-mail
Copyright Statement   Webmaster's Page