Anguttara Nikaya


[Site Map]  [Home]  [Sutta Indexes]  [Glossology]  [Site Sub-Sections]

The Pali is transliterated as IAST Unicode (āīūṃṅñṭḍṇḷ). Alternatives:
[ ASCII (aiumnntdnl) | Mobile (āīūŋńñţđņļ) | Velthuis (aaiiuu.m'n~n.t.d.n.l) ]

 

Anguttara Nikāya
Pañcaka Nipāta
15. Tikaṇḍaki Vaggo

Sutta 141

Avajānāti Suttaɱ

Adapted from the 1995 edition of the digital version of the Sri Lanka Buddha Jayanti Tripitaka Series and proofed against, and mostly resolved to the Pali Text Society Anguttara-Nikaya edited by Prof. E. Hardy, Ph.D., D.D.

 


 

[1][pts]Evaɱ me sutaɱ:|| ||

Ekaɱ samayaɱ Bhagavā Sāvatthiyaɱ viharati.|| ||

Tatra kho Bhagavā bhikkhu āmantesi:|| ||

"Bhikkhavo" ti.|| ||

"Bhadante" ti te bhikkhū Bhagavato paccassosuɱ.|| ||

Bhagavā etad avoca:|| ||

2. Pañcame bhikkhave puggalā santo saɱvijjamānā lokasmiɱ.|| ||

Katame pañca?|| ||

Datvā avajānāti,||
saɱvāsena avajānāti,||
ādiyyamukho hoti,||
lolo hoti,||
mando momūho hoti.|| ||

3. Kathañ ca bhikkhave puggalo datvā avajānāti?|| ||

Idha, bhikkhave, puggalo puggalassa deti cīvara-piṇḍapāta-senāsana-gilāna-paccaya-bhesajja-parikkhāraɱ.|| ||

Tassa evaɱ hoti:|| ||

'Ahaɱ demi, ayaɱ patigaṇhātī' ti.|| ||

Tam enaɱ datvā avajānāti.|| ||

Evaɱ kho bhikkhave puggalo datvā avajānāti.|| ||

4. Kathañ ca bhikkhave puggalo saɱvāsena avajānāti?|| ||

[165] Idha bhikkhave puggalo puggalena saddhiɱ saɱvasati dve vā tiṇi vā vassāni.|| ||

Tam enaɱ saɱvāsena avajānāti.|| ||

Evaɱ kho bhikkhave puggalo saɱvāsena avajānāti.|| ||

5. Kathañ ca bhikkhave puggalo ādiyamukho hoti?|| ||

Idha, bhikkhave, ekacco puggalo parassa vaṇeṇe vā avaṇeṇa vā bhāsiyamāne taɱ khippaɱ yeva adhimuccitā hoti.|| ||

Evaɱ kho bhikkhave puggalo ādiyamukho hoti.|| ||

6. Kathañ ca bhikkhave puggalo lolo hoti?|| ||

Idha, bhikkhave, ekacco puggalo ittarasaddho hoti,||
ittarabhatti,||
ittarapemo,||
ittarappasādo.|| ||

Evaɱ kho bhikkhave puggalo lolo hoti.|| ||

7. Kathañ ca bhikkhave puggalo mando momūho hoti?|| ||

Idha bhikkhave ekacco puggalo kusalākusale dhamme na jānāti,||
sāvajjānavajje dhamme na jānāti,||
hīnappaṇite dhamme na jānāni,||
kaṇhasukkasappaṭibhāge dhamme na jānāti.|| ||

Evaɱ kho bhikkhave puggalo mando momūho hoti.|| ||

Ime kho bhikkhave pañca puggalā santo saɱvijjamānā lokasmin" ti.|| ||


Contact:
E-mail
Copyright Statement   Webmaster's Page