Anguttara Nikaya


[Site Map]  [Home]  [Sutta Indexes]  [Glossology]  [Site Sub-Sections]

The Pali is transliterated as IAST Unicode (āīūṃṅñṭḍṇḷ). Alternatives:
[ ASCII (aiumnntdnl) | Mobile (āīūŋńñţđņļ) | Velthuis (aaiiuu.m'n~n.t.d.n.l) ]

 

Anguttara Nikāya
Pañcaka Nipāta
15. Tikaṇḍaki Vaggo

Sutta 144

Tikaṇḍakī Suttaɱ

Adapted from the 1995 edition of the digital version of the Sri Lanka Buddha Jayanti Tripitaka Series and proofed against, and mostly resolved to the Pali Text Society Anguttara-Nikaya edited by Prof. E. Hardy, Ph.D., D.D.

 


 

[1][pts]Evaɱ me sutaɱ:|| ||

Ekaɱ samayaɱ Bhagavā Sākete viharati Tikaṇḍakīvane.|| ||

Tatra kho Bhagavā bhikkhu āmantesi:|| ||

"Bhikkhavo" ti.|| ||

"Bhadante" ti te bhikkhu Bhagavato paccassosuɱ.|| ||

Bhagavā etad avoca:|| ||

2. "Sādhu bhikkhave bhikkhu kālena kālaɱ appaṭikkūle paṭikkūlasaññī vihareyya.|| ||

Sādhu bhikkhave bhikkhu kālena kālaɱ paṭikkūle appaṭikkūlasaññī vihareyya.|| ||

Sādhu bhikkhave bhikkhu kālena kālaɱ appaṭikkūle ca paṭikkūle ca paṭikkūlasaññī vihareyya.|| ||

Sādhu bhikkhave bhikkhu kālena kālaɱ paṭikkūle ca appaṭikkūle ca appaṭikkūlasaññī vihareyya.|| ||

Sādhu bhikkhave bhikkhu kālena kālaɱ appaṭikkūlraɱ ca paṭikkūlaɱ ca tadubhayaɱ abhinivajjetvā upekkhako vihareyya sato sampajāno.|| ||

 


 

3. Kathañ ca bhikkhave bhikkhu atthavasaɱ paṭicca appaṭikkūle paṭikkūlasaññī vihareyya?|| ||

"Mā me rajanīyesu dhammesu rāgo udapādī" ti.|| ||

Idaɱ kho bhikkhave bhikkhu atthavasaɱ paṭicca appaṭikkūle paṭikkūlasaññī vihareyya.|| ||

 

 

4. Kathañ bhikkhave bhikkhu atthavasaɱ paṭicca paṭikkūle appaṭikkūlasaññī vihareyya?|| ||

"Mā me dosanīyesu dhammesu doso udapādī" ti.|| ||

Idaɱ kho bhikkhave bhikkhu atthavasaɱ paṭicca paṭikkūle appaṭikkūlasaññī vihareyya.|| ||

 

 

5. Kathañ bhikkhave bhikkhu [170] atthavasaɱ paṭicca appaṭikkūle ca paṭikkūle ca paṭikkūlasaññī vihareyya?|| ||

"Mā me rajanīyesu dhammesu rāgo udapādī" ti.|| ||

"Mā me dosaniyesu dhammesu doso udapādī" ti.|| ||

Idaɱ kho bhikkhave, bhikkhu atthavasaɱ paṭicca appaṭikkūle ca paṭikkūle ca paṭikkūlasaññī vihareyya.|| ||

 

 

6. Kathañ bhikkhave bhikkhu atthavasaɱ paṭicca paṭikkūle ca appaṭikkūle ca appaṭikkūlasaññī vihareyya?|| ||

"Mā me dosanīyesu dhammesu doso udapādī.|| ||

Mā me rajaniyesu dhammesu rāgo udapādī" ti.|| ||

Idaɱ kho bhikkhave, bhikkhu atthavasaɱ paṭicca paṭikkūle ca appaṭikkūle ca appaṭikkūlasaññī vihareyya.|| ||

 

 

7. Kathañ bhikkhave bhikkhu atthavasaɱ paṭicca appaṭikkūlaɱ ca paṭikkūlaɱ ca tadubhayaɱ abhinivajjetvā upekkhako vihareyya sato sampajāno?|| ||

"Mā me kvacini katthaci kiñcana rajanīyesu dhammesu rāgo udapādi,||
mā me kvacini katthaci kiñcana dosanīyesu dhammesu doso udapādi,||
mā me kvacini1 katthaci kiñcana mohanīyesu dhammesu moho udapādī" ti.|| ||

Idaɱ kho bhikkhave bhikkhu atthavasaɱ paṭicca appaṭikkūlaɱ ca paṭikkūlraɱ ca tadubhayaɱ abhinivajjetvā upakkhako vihareyya sato sampajāno' ti.|| ||


Contact:
E-mail
Copyright Statement   Webmaster's Page