Anguttara Nikaya


[Site Map]  [Home]  [Sutta Indexes]  [Glossology]  [Site Sub-Sections]

The Pali is transliterated as IAST Unicode (āīūṃṅñṭḍṇḷ). Alternatives:
[ ASCII (aiumnntdnl) | Mobile (āīūŋńñţđņļ) | Velthuis (aaiiuu.m'n~n.t.d.n.l) ]

 

Anguttara Nikāya
Pañcaka Nipāta
16. Saddhamma Vaggo

Sutta 156

Tatiya Saddhammasammosa Suttaɱ

Adapted from the 1995 edition of the digital version of the Sri Lanka Buddha Jayanti Tripitaka Series and proofed against, and mostly resolved to the Pali Text Society Anguttara-Nikaya edited by Prof. E. Hardy, Ph.D., D.D.

 


 

[1][pts]Evaɱ me sutaɱ:|| ||

Ekaɱ samayaɱ Bhagavā Sāvatthiyaɱ viharati.|| ||

Tatra kho Bhagavā bhikkhu āmantesi:|| ||

"Bhikkhavo" ti.|| ||

"Bhadante" ti te bhikkhū Bhagavato paccassosuɱ.|| ||

Bhagavā etad avoca:|| ||

2. "Pañc'ime bhikkhave, dhammā saddhammassa antaradhānāya saɱvattanti.|| ||

Katame pañca?|| ||

Idha, bhikkhave, bhikkhu duggahitaɱ suttantaɱ pariyāpuṇanti duntikkhittehi padavyañjanehi.|| ||

Dunnikkhittassa bhikkhave padavyañjanassa atthopi dunnayo hoti.|| ||

Ayaɱ bhikkhave, paṭhamo dhammo saddhammassa sammosāya antaradhānāya saɱvattati.|| ||

Puna ca paraɱ bhikkhave, bhikkhu dubbacā honti dovacassakaraṇehi dhammehi samannāgatā, akkhamā appadakkhiṇaggāhino anusāsaniɱ.|| ||

Ayaɱ bhikkhave, dutiyo dhammo saddhammassa sammosāya antaradhānāya saɱvattati.|| ||

[179] Puna ca paraɱ bhikkhave, ye te bhikkhū bahussutā āgatāgamā dhammadharā vinayadharā mātikādharā, te na sakkaccaɱ suttantaɱ paraɱ vācenti.|| ||

Tesaɱ accayena chinnamūlako suttanto hoti appaṭisaraṇo.|| ||

Ayaɱ bhikkhave, tatiyo dhammo saddhammassa sammosāya antaradhānāya saɱvattati.|| ||

Puna ca paraɱ bhikkhave, therā bhikkhu bāhulikā honti sāthalikā okkamane pubbaŋgamā paviveke nikkhitta-dhurā.|| ||

Na viriyaɱ ārabhanti appattassa pattiyā anadhigatassa adhigamāya asacchikatassa sacchikiriyāya.|| ||

Tesaɱ pacchimā janatā diṭṭhānugatiɱ āpajjati.|| ||

Sāpi hoti bāhulikā sāthalikā okkamane pubbaŋgamā paviveke ninakkhittadhurā.|| ||

Na viriyaɱ ārabhati appattassa pattiyā anadhigatassa adhigamāya asacchikatassa sacchikiriyāya.|| ||

Ayaɱ bhikkhave, catuttho dhammo saddhammassa sammosāya antaradhānāya saɱvattati.|| ||

Puna ca paraɱ bhikkhave, saŋgho bhinno hoti.|| ||

Saŋghe kho pana bhikkhave.|| ||

Bhinne aññamaññaɱ akkosā ca honti, aññamaññaɱ paribhāsā ca honti, aññamaññaɱ parikkhepā ca honti, aññamaññaɱ pariccajanā ca honti.|| ||

Tattha appattassa c'eva nappasīdanti, passannānaɱ ca ekaccānaɱ aññathattaɱ hoti.|| ||

Ayaɱ bhikkhave pañcamo dhammo saddhammassa sammosāya antaradhānāya saɱvattati.|| ||

Ime kho bhikkhave, pañca dhammā saddhammassa sammosāya antaradhānāya saɱvattanti.|| ||

 


 

Pañc'ime bhikkhave dhammā saddhammassa ṭhitiyā asammosāya anantaradhānāya saɱvattanti.|| ||

Katame pañca?|| ||

Idha, bhikkhave, bhikkhu suggahitaɱ suttantaɱ pariyāpuṇnti sunikkhittehi padavyañjanehi.|| ||

Sunikkhittassa bhikkhave padavyañjanassa atthopi sunayo hoti.|| ||

Ayaɱ bhikkhave paṭhamo dhammo saddhammassa ṭhitiyā asammosāya anattaradhānāya saɱvattati.|| ||

[180] Puna ca paraɱ bhikkhave, bhikkhu subbacā honti sovacassakaraṇehi dhammehi samannāgatā.|| ||

Khamā padakkhiṇaggāhino anusāsaniɱ.|| ||

Ayaɱ bhikkhave dutiyo dhammo saddhammassa ṭhitiyā asammosāya anantaradhānāya saɱvattati.|| ||

Puna ca paraɱ bhikkhave, ye te bhikkhu bahussutā āgatāgamā dhammadharā vinayadharā mātikādharā, te sakkaccaɱ paraɱ vācenti.|| ||

Tesaɱ accayena na chinnamūlako suttanto hoti sappaṭisaraṇo.|| ||

Ayaɱ bhikkhave, tatiyo dhammo saddhammassa ṭhitiyā asammosāya anantaradhānāya saɱvattati.|| ||

Puna ca paraɱ bhikkhave, therā bhikkhu na bahukālikā honti na sāthalikā okkamane nikkhitta-dhurā paviveke pubbaŋgamā.|| ||

Viriyaɱ ārabhanti appattassa pattiyā anadhigatassa adhigamāya asacchikatassa sacchikiriyāya.|| ||

Tesaɱ pacchimā janatā diṭṭhānugatiɱ āpajjati.|| ||

Sāpi hoti na bāhulikā na sāthalikā okkamane nikkhitta-dhurā paviveke pubbaŋgamā.|| ||

Viriyaɱ ārabhati appattassa pattiyā anadhigatassa adhigamāya asacchikatassa sacchikiriyāya.|| ||

Ayaɱ bhikkhave, catuttho dhammo saddhammassaṭhitiyā asammosāya anantaradhānāya saɱvattati.|| ||

Puna ca paraɱ bhikkhave, saŋgho bhinno samaggo sammodamāno avivadamāno ekuddeso phāsuɱ viharati.|| ||

Saŋghe kho pana bhikkhave, samagge na c'eva aññamaññaɱ akkosā honti.|| ||

Na ca aññamaññaɱ paribhāsā honti.|| ||

Na ca aññamaññaɱ parikkhepā honti.|| ||

Na ca aññamaññaɱ pariccajanā honti.|| ||

Tattha appasannā c'eva pasīdanti.|| ||

Passannānaɱ ca bhiyyobhāvo hoti.|| ||

Ayaɱ bhikkhave, pañcamo dhammo saddhammassa ṭhitiyā asammosāya anantaradhānāya saɱvattati.|| ||

Ime kho bhikkhave, pañca dhammā saddhammassa ṭhitiyā asammosāya anantaradhānāya saɱvattantī" ti.|| ||


Contact:
E-mail
Copyright Statement   Webmaster's Page