Anguttara Nikaya


[Site Map]  [Home]  [Sutta Indexes]  [Glossology]  [Site Sub-Sections]

The Pali is transliterated as IAST Unicode (āīūṃṅñṭḍṇḷ). Alternatives:
[ ASCII (aiumnntdnl) | Mobile (āīūŋńñţđņļ) | Velthuis (aaiiuu.m'n~n.t.d.n.l) ]

 

Anguttara Nikāya
Pañcaka Nipāta
16. Saddhamma Vaggo

Sutta 159

Udāyī Suttaɱ

Adapted from the 1995 edition of the digital version of the Sri Lanka Buddha Jayanti Tripitaka Series and proofed against, and mostly resolved to the 1994 Pali Text Society Anguttara-Nikaya edited by Professor E. Hardy, Ph.D., D.D.

 


 

[1][pts][than] Evaɱ me sutaɱ:|| ||

Ekaɱ samayaɱ Bhagavā Kosambiyaɱ viharati Ghositārāme.|| ||

Tena kho pana samayena āyasmā Udāyī mahatiyā gihīparisāya parivuto dhammaɱ desento nisinno hoti.|| ||

Addasā kho āyasmā Ānando āyasmantaɱ Udāyiɱ mahatiyā gihīparisāya parivutaɱ dhammaɱ desentaɱ nisinnaɱ.|| ||

Disvāna yena Bhagavā ten'upasaŋkami.|| ||

Upasaŋkamitvā Bhagavantaɱ abhivādetvā eka-m-antaɱ nisidi.|| ||

Eka-m-antaɱ nisinno kho ayasmā Ānando Bhagavantaɱ etad avoca:|| ||

'Āyasmā bhante Udāyī mahatiyā gihīparisāya parivuto dhammaɱ desetī' ti.|| ||

Na kho Ānanda sukaraɱ paresaɱ dhammaɱ desetuɱ.|| ||

Paresaɱ Ānanda dhammaɱ desentena pañca dhamme ajajhattaɱ upaṭṭhapetvā paresaɱ dhammo desetabbo.|| ||

Katame pañca?|| ||

2. Ānupubbikathaɱ kathessāmī ti paresaɱ dhammo desetabbo.|| ||

Pariyāyadassāvī kathaɱ kathessāmī ti paresaɱ dhammo desetabbā.|| ||

Anuddayataɱ paṭicca kathaɱ kathessāmī ti paresaɱ dhammo desetabbo.|| ||

Na āmisantaro kathaɱ kathessāmī ti paresaɱ dhammo desetabbo.|| ||

Attānaɱ ca paraɱ ca anupahacca kathaɱ kathessāmī ti paresaɱ dhammo desetabbo.|| ||

Na kho Ānanda sukaraɱ paresaɱ dhammaɱ desetuɱ.|| ||

Paresaɱ Ānanda dhammaɱ desentena ime pañca dhamme ajajhattaɱ upaṭṭhapetvā paresaɱ dhammo desetabbo ti.|| ||

 


Contact:
E-mail
Copyright Statement   Webmaster's Page