Anguttara Nikaya


[Site Map]  [Home]  [Sutta Indexes]  [Glossology]  [Site Sub-Sections]

The Pali is transliterated as IAST Unicode (āīūṃṅñṭḍṇḷ). Alternatives:
[ ASCII (aiumnntdnl) | Mobile (āīūŋńñţđņļ) | Velthuis (aaiiuu.m'n~n.t.d.n.l) ]

 

Anguttara Nikaya
Pañcaka-Nipāta
XVIII. Upāsaka Vaggo

Sutta 174

Vera Suttaɱ

Adapted from the 1995 edition of the digital version of the Sri Lanka Buddha Jayanti Tripitaka Series and proofed against, and mostly resolved to the Pali Text Society Anguttara-Nikaya edited by Prof. E. Hardy, Ph.D., D.D.

 


 

[1][pts]Evaɱ me sutaɱ:|| ||

Ekaɱ samayaɱ Bhagavā Sāvatthiyaɱ viharati Jetavane Anāthapiṇḍikassa ārāme.|| ||

"Atha kho Anāthapiṇḍiko gahapati yena Bhagavā ten'upasaŋkami.|| ||

Upasaŋkamitvā Bhagavantaɱ abhivādetvā eka-m-antaɱ nisīdi.|| ||

Eka-m-antaɱ nisinnaɱ kho Anāthapiṇḍikaɱ gahapatiɱ Bhagavā etad avoca:|| ||

2. Pañca gahapati, bhayāni verāni appahāya dussīlo iti vuccati Nirayaɱ ca uppajjati.|| ||

Katamāni pañca?|| ||

Pāṇātipātaɱ,||
adinnādānaɱ,||
kāmesu micchācāraɱ,||
musā-vādaɱ,||
surāmerayamajjapamādaṭṭhānaɱ.|| ||

[205] Imāni kho gahapati, pañca bhayāni verāni appahāya dussīlo iti vuccati Nirayaɱ ca uppajjati.|| ||

 

 

3. Pañca gahapati, bhayāni verāni pahāya sīlavā iti vuccati Sugatiɱ ca uppajjati.|| ||

Katamāni pañca?|| ||

Paṇātipātaɱ,||
adinnādānaɱ,||
kāmesu micchācāraɱ,||
musā-vādaɱ,||
surāmerayamajjapamādaṭṭhānaɱ.|| ||

Imāni kho gahapati, pañca bhayāni verāni pahāya sīlavā iti vuccati Sugatiɱ ca uppajjatī ti.|| ||

 


 

4. Yaɱ gahapati, pāṇātipātī pāṇātipātapaccayā diṭṭhadhammikam pi bhayaɱ veraɱ pasavati,||
samparāyikam pi bhayaɱ veraɱ pasavati,||
cetasikam pi dukkhaɱ domanassaɱ paṭisaɱvedeti.|| ||

Pāṇātipātā paṭivirato n'eva diṭṭhadhammikaɱ bhayaɱ veraɱ pasvati,||
na samparāyikaɱ bhayaɱ veraɱ pasvati,||
na cetasikaɱ dukkhaɱ domanassaɱ paṭisaɱvedeti.|| ||

Pāṇātipātā paṭiviratssa evaɱ taɱ bhayaɱ veraɱ vūpasantaɱ hoti.|| ||

 

 

5. Yaɱ gahapati, adinnadāyī adinnādānapaccayā diṭṭhadhammikam pi bhayaɱ veraɱ pasavati,||
samparāyikam pi bhayaɱ veraɱ pasavati,||
cetasikam pi dukkhaɱ domanassaɱ paṭisaɱvedeti.|| ||

Adinnādānā paṭivirato n'eva diṭṭhadhammikaɱ bhayaɱ veraɱ pasavati,||
na samparāyikaɱ bhayaɱ veraɱ pasavati,||
na cetayikaɱ dukkhaɱ domanassaɱ paṭisaɱvedeti.|| ||

Adinnādānā paṭiviratassa evaɱ taɱ bhayaɱ veraɱ vūpasantaɱ hoti.|| ||

 

 

6. Yaɱ gahapati, kāmesu micchācārī kāmesumicchācāra paccayā diṭṭhadhammikam pi bhayaɱ veraɱ pasavati,||
samparāyikam pi bhayaɱ veraɱ pasavati,||
cetasikam pi dukkhaɱ domanassaɱ paṭisaɱvedeti.|| ||

Kāmesumicchācārā paṭivirato n'eva diṭṭhadhammikaɱ bhayaɱ veraɱ pasavati,||
na samparāyikaɱ bhayaɱ veraɱ pasavati,||
na cetayikaɱ dukkhaɱ domanassaɱ paṭisaɱvedeti.|| ||

Kāmesumicchācārā paṭiviratassa evaɱ taɱ bhayaɱ veraɱ vūpasantaɱ hoti.|| ||

 

 

7. Yaɱ gahapati, musāvādī musāvādapaccayā diṭṭhadhammikam pi bhayaɱ veraɱ pasavati,||
samparāyikam pi bhayaɱ veraɱ pasavati,||
cetasikam pi dukkhaɱ domanassaɱ paṭisaɱvedeti.|| ||

Musāvādā paṭivirato n'eva diṭṭhadhammikaɱ bhayaɱ veraɱ pasavati,||
na samparāyikaɱ bhayaɱ veraɱ pasavati,||
na cetasikaɱ dukkhaɱ domanassaɱ paṭisaɱvedeti.|| ||

Musāvādā paṭiviratassa evaɱ taɱ bhayaɱ veraɱ vūpasantaɱ hoti.|| ||

 

 

8. Yaɱ gahapati, surāmerayamajjapamādaṭṭhāyī surāmerayamajjapamādaṭṭhānapaccayā diṭṭhadhammikam pi bhayaɱ veraɱ pasavati,||
samparāyikam pi bhayaɱ veraɱ pasavati,||
cetasikam pi dukkhaɱ domanssaɱ paṭisaɱvedeti.|| ||

Surāmeraya majjapamādaṭṭhānā paṭivirato n'eva diṭṭhadhammikaɱ bhayaɱ veraɱ pasavati,||
na samparāyikaɱ bhayaɱ veraɱ pasavati,||
na cetasikaɱ dukkhaɱdomanassaɱ paṭisaɱvedeti.|| ||

Surāmerayamajjapamādaṭṭhānā paṭiviratassa evaɱ taɱ bhayaɱ veraɱ vūpasantaɱ hotī" ti.

Yo pāṇam atimāteti musāvādañ ca bhāsati, Loke adinnaɱ ādiyati paradārañ ca gacchati, Surāmerayapānaɱ ca yo naro anuyuñjati;

Appahāya pañca verāni dussīlo iti vuccati, Kāyassa bhedā duppañño nirayaɱ so upapajjati

Yo pāṇaɱ nātipāteti musā-vādaɱ na bhāsati, Loke adinnaɱ nādiyati paradāraɱ na gacchati, [206] Surāmeraya pānaɱ ca yo naro nānuyuñjati;

Pahāya pañca verāni sīlavā iti vuccati, Kāyassa bhedā sappañño sugatiɱ so upapajjati.|| ||


Contact:
E-mail
Copyright Statement   Webmaster's Page