Anguttara Nikaya


[Site Map]  [Home]  [Sutta Indexes]  [Glossology]  [Site Sub-Sections]

The Pali is transliterated as IAST Unicode (āīūṃṅñṭḍṇḷ). Alternatives:
[ ASCII (aiumnntdnl) | Mobile (āīūŋńñţđņļ) | Velthuis (aaiiuu.m'n~n.t.d.n.l) ]

 

Anguttara Nikaya
Pañcaka-Nipāta
XIX. Arañña Vaggo

Sutta 186

Nesajjika Suttaɱ

Adapted from the 1995 edition of the digital version of the Sri Lanka Buddha Jayanti Tripitaka Series and proofed against, and mostly resolved to the Pali Text Society Anguttara-Nikaya edited by Prof. E. Hardy, Ph.D., D.D.

 


 

[1][pts]Evaɱ me sutaɱ:|| ||

Ekaɱ samayaɱ Bhagavā Sāvatthiyaɱ viharati.|| ||

Tatra kho Bhagavā bhikkhu āmantesi:|| ||

"Bhikkhavo" ti.|| ||

"Bhadante" ti te bhikkhū Bhagavato paccassosuɱ.|| ||

Bhagavā etad avoca:|| ||

"Pañc'ime bhikkhave nesajjikā.|| ||

Katame pañca?|| ||

Mandattā momūhattā nesajjiko hoti.|| ||

Pāpiccho icchāpakato nesajjiko hoti.|| ||

Ummādā cittakkhepā nesajjiko hoti.|| ||

Vaṇṇitaɱ buddhehi Buddhasāvakehiti nesajjiko hoti.|| ||

Appicchataɱ yeva nissāya,||
santuṭṭhiɱ yeva nissāya,||
sallekhaɱ yeva nissāya,||
pavivekaɱ yeva nissāya,||
idam aṭṭhitaɱ yeva nissāya nesajjiko hoti.|| ||

Ime kho bhikkhave pañca nesajjikā.|| ||

Imesaɱ kho bhikkhave pañcannaɱ nesajjikānaɱ yvāyaɱ nesajjiko appicchataɱ yeva nissāya,||
santuṭṭhiɱ yeva nissāya,||
sallekhaɱ yeva nissāya,||
pavivekaɱ yeva nissāya,||
idam aṭṭhitaɱ yeva nissāya,||
nesajjiko hoti,||
ayaɱ imesaɱ pañcannaɱ,||
nesajjikānaɱ aggo ca||
seṭṭho ca||
mokkho ca||
uttamo ca||
pavaro ca.|| ||

Seyyathā pi, bhikkhave, gavā khīraɱ,||
khīramhā dadhi,||
dadhimhā navanītaɱ,||
navanitamhā sappi,||
sappimhā sappimaṇḍo tattha aggam akkhāyati,||
evam eva kho, bhikkhave,||
imesaɱ pañcannaɱ nesajjikānaɱ yvāyaɱ nesajjiko appicchataɱ yeva nissāya,||
santuṭṭhiɱ yeva nissāya||
sallekhaɱ yeva nissāya,||
pavivekaɱ yeva nissāya,||
idam aṭṭhitaɱ yeva nissāya nesajjiko hoti,||
ayaɱ imesaɱ pañcannaɱ nesajjikānaɱ aggo ca||
seṭṭho ca||
mokkho ca||
uttamo ca||
pavaro cā" ti.|| ||


Contact:
E-mail
Copyright Statement   Webmaster's Page