Anguttara Nikaya


[Site Map]  [Home]  [Sutta Indexes]  [Glossology]  [Site Sub-Sections]

The Pali is transliterated as IAST Unicode (āīūṃṅñṭḍṇḷ). Alternatives:
[ ASCII (aiumnntdnl) | Mobile (āīūŋńñţđņļ) | Velthuis (aaiiuu.m'n~n.t.d.n.l) ]

 

Anguttara Nikaya
Pañcaka-Nipāta
XX. Brāhmaṇa Vaggo

Sutta 191

Soṇa Suttaɱ

Adapted from the 1995 edition of the digital version of the Sri Lanka Buddha Jayanti Tripitaka Series and proofed against, and mostly resolved to the Pali Text Society Anguttara-Nikaya edited by Prof. E. Hardy, Ph.D., D.D.

 


 

[1][pts]Evaɱ me sutaɱ:|| ||

Ekaɱ samayaɱ Bhagavā Sāvatthiyaɱ viharati.|| ||

Tatra kho Bhagavā bhikkhu āmantesi:|| ||

"Bhikkhavo" ti.|| ||

"Bhadante" ti te bhikkhū Bhagavato paccassosuɱ.|| ||

Bhagavā etad avoca:|| ||

"Pañc'ime bhikkhave porāṇā brāhmṇadhammā etarahi sunakhesu sandissanti||
no brāhmaṇesu.|| ||

Katame pañca?|| ||

2. Pubbe sudaɱ bhikkhave brāhmaṇā brāhmaṇiɱ yeva gacchanti,||
no abrāhmṇiɱ.|| ||

Etarahi bhikkhave brāhmaṇā brāhmaṇim pi gacchanti||
abrāhmṇim pi gacchanti.|| ||

Etarahi bhikkhave sunakhā sunakhiɱ yeva gacchanti,||
no asunakhiɱ.|| ||

Ayaɱ bhikkhave paṭhamo porāṇo brāhmaṇadhammo etarahi sunakhesu sandissati,||
no brāhmaṇesu.|| ||

 

 

3. Pubbe sudaɱ bhikkhave brāhmaṇā brāhmaṇiɱ utuniɱ yeva gacchanti,||
no anutuniɱ.|| ||

Etarahi bhikkhave brah- [222]maṇā brāhmaṇiɱ utunim pi gacchanti,||
anutunim pi gacchanti.|| ||

Etarahi bhikkhave sunakhā sunakhiɱ utuniɱ yeva gacchanti,||
no anutuniɱ.|| ||

Ayaɱ bhikkhave dutiyo porāṇo brahmaṇa dhammo etarahi sunakhesu sandissati,||
no brāhmaṇesu.|| ||

 

 

4. Pubbe sudaɱ bhikkhave brāhmaṇā brahmaṇiɱ n'eva kiṇanti,||
no vikkiṇanti||
sampiyen'eva saɱvāsaɱ saɱsaggatthāya sampavattenti.|| ||

Etarahi bhikkhave brahmaṇā brāhmaṇiɱ kiṇanti pi,||
vikkiṇanti pi||
sampiyena pi||
saɱvāsaɱ saɱsaggatthāya sampavattenti||
asampiyena pi saɱvāsaɱ saɱsaggatthāya sampavattenti.|| ||

Etarahi bhikkhave sunakhā sunakhiɱ n'eva kiṇanti,||
no vikkiṇanti||
sampiyen'eva saɱvāsaɱ saɱsaggatthāya sampavattenti.|| ||

Ayaɱ bhikkhave tatiyo porāṇo brahmaṇadhammo etarahi sunakhesu sandissati,||
no brāhmaṇesu.|| ||

 

 

5. Pubbe sudaɱ bhikkhave brāhmaṇā na sannidhiɱ karonti dhanassa pi||
dhaññassa pi||
rajatassa pi||
jātarūpassa pi.|| ||

Etarahi bhikkhave brahmaṇā sannidhiɱ karonti dhanassa pi||
dhaññassa pi||
rajatassa pi||
jātarūpassa pi.|| ||

Etarahi bhikkhave sunakhā sannidhiɱ na karonti dhanassa pi||
dhaññassa pi||
rajatassa pi||
jātarūpassa pi.|| ||

Ayaɱ bhikkhave catuttho porāṇo brāhmaṇadhammo etarahi sunakhesu sandissati,||
no brāhmaṇesu.|| ||

 

 

6. Pubbe sudaɱ bhikkhave brahmaṇā sāyaɱ sāyamāsāya,||
pāto pātarāsāya bhikkhaɱ pariyesanti.|| ||

Etarahi bhikkhave brahmaṇā yāvadatthaɱ udarāvadehakaɱ bhuñjitvā avasesaɱ ādāya pakkamanti.|| ||

Etarahi bhikkhave sunakhā sāyaɱ sāyamāsāya,||
pāto pātarāsāya bhikkhaɱ pariyesanti.|| ||

Ayaɱ bhikkhave pañcamo porāṇo brahmaṇadhammo etarahi sunakhesu sandissanti,||
no brāhmaṇesu.|| ||

Ime kho bhikkhave pañca porāṇā brāhmaṇadhammā etarahi sunakhesu sandissanti,||
no brāhmaṇesū" ti.|| ||


Contact:
E-mail
Copyright Statement   Webmaster's Page