Anguttara Nikaya


[Site Map]  [Home]  [Sutta Indexes]  [Glossology]  [Site Sub-Sections]

The Pali is transliterated as IAST Unicode (āīūṃṅñṭḍṇḷ). Alternatives:
[ ASCII (aiumnntdnl) | Mobile (āīūŋńñţđņļ) | Velthuis (aaiiuu.m'n~n.t.d.n.l) ]

 

Anguttara Nikaya
Pañcaka-Nipāta
XX. Brāhmaṇa Vaggo

Sutta 195

Piŋgiyānī Suttaɱ

Adapted from the 1995 edition of the digital version of the Sri Lanka Buddha Jayanti Tripitaka Series and proofed against, and mostly resolved to the Pali Text Society Anguttara-Nikaya edited by Prof. E. Hardy, Ph.D., D.D.

 


[236]

[1][pts]Evaɱ me sutaɱ:|| ||

Ekaɱ samayaɱ Bhagavā Vesāliyaɱ viharati Mahāvane Kūṭāgārasālāyaɱ.|| ||

Tena kho pana samayena pañcamattāni Licchavīsatāni Bhagavantaɱ payirupāsanti.|| ||

App ekacce Licchavī nīlā honti nīlavaṇṇā nīlavatthā nīlālaɱkārā.|| ||

App ekacce Licchavī pītā honti pītavaṇṇā pītavatthā pītālaɱkārā.|| ||

App ekacce Licchavī lohitakā honti lohitakavaṇṇā lohitakavatthā lohitakālaɱkārā.|| ||

App ekacce Licchavī odātā honti odātavaṇṇā odātavatthā odātālaɱkārā.|| ||

Tyāssu'daɱ Bhagavā atirocati vaṇṇena c'eva yasasā ca.|| ||

Atha kho Piŋgiyānī brāhmaṇo uṭṭhāy āsanā ekaɱsaɱ uttarāsaŋgaɱ karitvā yena Bhagavā ten'añjaliɱ paṇāmetvā Bhagavantaɱ etad avoca:|| ||

"Paṭibhāti maɱ Bhagavā,||
paṭibhāti maɱ Sugatā" ti.|| ||

"Paṭibhātu taɱ Piŋgiyānī" ti Bhagavā avoca.|| ||

Atha kho Piŋgiyānī brāhmaṇo Bhagavato sammukhā sāruppāya gāthāya abhitthavi:|| ||

Padumaɱ yathā kokanadaɱ sugandhaɱ||
Pāto siyā phullam avītagandhaɱ,||
Aŋgīrasaɱ passa virocamānaɱ||
Tapantam ādiccam iv'antalikkhe ti.|| ||

Atha kho te Licchavī pañcahi uttarāsaŋgasatehi Piŋgiyāniɱ brāhmaṇaɱ acchādesuɱ.|| ||

Atha kho Piŋgiyānī brāhmaṇo tehi pañcahi uttarāsaŋgasatehi Bhagavantaɱ [240] acchādesi.|| ||

Atha kho Bhagavā te Licchavī etad avoca:|| ||

2. "Pañcannaɱ Licchavī, ratanānaɱ pātubhāvo dullabho lokasmiɱ.|| ||

Katamesaɱ pañcannaɱ?|| ||

3. Tathāgatassa arahato sammā sambuddhassa pātubhāvo dullabho lokasmiɱ.|| ||

Tathāgatappaveditassa dhamma-vinayassa desetā puggalo dullabho lokasmiɱ.|| ||

Tathāgatappaveditassa dhamma-vinayassa desitassa viññātā puggalo dullabho lokasmiɱ.|| ||

Tathāgatappaveditassa dhamma-vinayassa desitassa viññatā dhammānudhammapaṭipanno puggalo dullabho lokasmiɱ.|| ||

Kataññu-katavedī puggalo dullabho lokasmiɱ.|| ||

Imesaɱ kho Licchavī pañcannaɱ ratanānaɱ pātubhāvo dullabho lokasmin" ti.|| ||


Contact:
E-mail
Copyright Statement   Webmaster's Page