Anguttara Nikaya


[Site Map]  [Home]  [Sutta Indexes]  [Glossology]  [Site Sub-Sections]

The Pali is transliterated as IAST Unicode (āīūṃṅñṭḍṇḷ). Alternatives:
[ ASCII (aiumnntdnl) | Mobile (āīūŋńñţđņļ) | Velthuis (aaiiuu.m'n~n.t.d.n.l) ]

 

Anguttara Nikaya
Pañcaka-Nipāta
XX. Brāhmaṇa Vaggo

Sutta 197

Vassantarāya Suttaɱ

Adapted from the 1995 edition of the digital version of the Sri Lanka Buddha Jayanti Tripitaka Series and proofed against, and mostly resolved to the Pali Text Society Anguttara-Nikaya edited by Prof. E. Hardy, Ph.D., D.D.

 


 

[1][pts]Evaɱ me sutaɱ:|| ||

Ekaɱ samayaɱ Bhagavā Sāvatthiyaɱ viharati.|| ||

Tatra kho Bhagavā bhikkhu āmantesi:|| ||

"Bhikkhavo" ti.|| ||

"Bhadante" ti te bhikkhū Bhagavato paccassosuɱ.|| ||

Bhagavā etad avoca:|| ||

"Pañc'ime bhikkhave, vassassa antarāyā,||
yaɱ nemittā na jānanti,||
yattha nemittānaɱ cakkhuɱ na kamati.|| ||

Katame pañca?|| ||

2. Upari bhikkhave, ākāse tejodhātu pakuppati,||
tena uppannā meghā paṭivigacchanti.|| ||

Ayaɱ bhikkhave, paṭhamo vassassa antarāyo||
yaɱ nemittā na jānanti,||
yattha nemittānaɱ cakkhuɱ na kamati.|| ||

3. Puna ca paraɱ bhikkhave, upari ākāse vāyodhātu pakuppati,||
tena uppannā meghā paṭivigacchanti.|| ||

Ayaɱ bhikkhave, dutiyo vassassa antarāyo||
yaɱ nemittā na jānanti,||
yattha nemittānaɱ cakkhuɱ na kamati.|| ||

4. Puna ca paraɱ bhikkhave, Rāhu Asurindo pāṇinā udakaɱ paṭicchitvā mahāsamudde chaḍḍeti.|| ||

Ayaɱ bhikkhave, tatiyo vassassa antarāyo||
yaɱ nemittā na jānanti,||
yattha nemittānaɱ cakkhuɱ na kamati.|| ||

5. Puna ca paraɱ bhikkhave, vassavalāhakā devā pamattā honti.|| ||

Ayaɱ bhikkhave, catuttho vassassa antarāyo||
yaɱ nemittā na jānanti,||
yattha nemittānaɱ cakkhuɱ na kamati.|| ||

6. Puna ca paraɱ bhikkhave, manussā adhammikā honti.|| ||

Ayaɱ bhikkhave, pañcamo vassassa antarāyo||
yaɱ nemittā na jānanti,||
yattha nemittānaɱ cakkhuɱ na kamati.|| ||

Ime kho bhikkhave, pañca vassassa antarāyā,||
yaɱ nemittā na jānanti,||
yattha nemittānaɱ cakkhuɱ na kamatī" ti.|| ||

 


Contact:
E-mail
Copyright Statement   Webmaster's Page