Anguttara Nikaya


[Site Map]  [Home]  [Sutta Indexes]  [Glossology]  [Site Sub-Sections]

The Pali is transliterated as IAST Unicode (āīūṃṅñṭḍṇḷ). Alternatives:
[ ASCII (aiumnntdnl) | Mobile (āīūŋńñţđņļ) | Velthuis (aaiiuu.m'n~n.t.d.n.l) ]

 

Aŋguttara-Nikāya
Pañcaka-Nipāta Kimbila Vagga

Sutta 206

U-N-A-B-R-I-D-G-E-D

Vinibandha Suttaɱ

Adapted from the 1995 edition of the digital version of the Sri Lanka Buddha Jayanti Tripitaka Series and proofed against, and mostly resolved to the Pali Text Society Anguttara-Nikaya edited by Prof. E. Hardy, Ph.D., D.D.

 


 

[1][bd] EVAṂ ME SUTAṂ.|| ||

Ekaɱ samayaɱ Bhagavā Sāvatthiyaɱ viharati.|| ||

Tatra kho Bhagavā bhikkhū āmantesi:|| ||

'Bhikkhavo' ti.|| ||

'Bhadante' ti te bhikkhū Bhagavato paccassosuɱ.|| ||

Bhagavā etad avoca:|| ||

Pañc'ime bhikkhave, cetaso vinibandhā.|| ||

Katame pañca?|| ||

Idha, bhikkhave, bhikkhu kāmesu avītarāgo hoti,||
avigatacchando avigatapemo avigatapipāso avigatapariḷāho avigatataṇho.|| ||

Yo so bhikkhave, bhikkhu kāmesu avigatarāgo hoti||
avigatacchando avigatapemo avigatapipāso avigatapariḷāho avigatataṇho,||
tassa cittaɱ na namati ātappāya anuyogāya sātaccāya padhānāya.|| ||

Yassa cittaɱ na namati ātappāya anuyogāya sātaccāya padhānāya,||
ayaɱ paṭhamo cetaso vinibandho.|| ||

 


 

Puna ca paraɱ bhikkhave, bhikkhu kāye avigatarāgo hoti,||
avigatacchando avigatapemo avigatapipāso avigatapariḷāho avigatataṇho.|| ||

Yo so bhikkhave, bhikkhu kāyesu avigatarāgo hoti,||
avigatacchando avigatapemo avigatapipāso avigatapariḷāho avigatataṇho,||
tassa cittaɱ na namati ātappāya anuyogāya sātaccāya padhānāya.|| ||

Yassa cittaɱ na namati ātappāya anuyogāya sātaccāya padhānāya,||
ayaɱ dutiyo cetaso vinibandho.|| ||

 


 

Puna ca paraɱ bhikkhave, bhikkhu rūpe avigatarāgo hoti,||
avigatacchando avigatapemo avigatapipāso avigatapariḷāho avigatataṇho.|| ||

Yo so bhikkhave, bhikkhu rūpesu avigatarāgo hoti,||
avigatacchando avigatapemo avigatapipāso avigatapariḷāho avigatataṇho,||
tassa cittaɱ na namati ātappāya anuyogāya sātaccāya padhānāya.|| ||

Yassa cittaɱ na namati ātappāya anuyogāya sātaccāya padhānāya,||
ayaɱ tatiyo cetaso vinibandho.|| ||

 


 

Puna ca paraɱ bhikkhave bhikkhu yāvadatthaɱ udarāvadehakaɱ bhuñjitvā seyyasukhaɱ passasukhaɱ middhasukhaɱ anuyutto viharati.|| ||

Yo so bhikkhave, bhikkhu yāvadatthaɱ udarāvadehakaɱ bhuñjitvā seyyasukhaɱ passasukhaɱ middhasukhaɱ anuyutto viharati||
tassa cittaɱ na namati ātappāya anuyogāya sātaccāya padhānāya.|| ||

Yassa cittaɱ na namati ātappāya anuyogāya sātaccāya padhānāya,||
ayaɱ catuttho cetaso vinibandho.|| ||

 


 

Aññataraɱ devanikāyaɱ [250] paṇidhāya brahmacariyaɱ carati:|| ||

'Imināhaɱ sīlena vā vatena vā tapena vā brahmacariyena vā devo vā bhavissāmi devaññataro vā' ti|| ||

Yo so bhikkhave, bhikkhu aññataraɱ devanikāyaɱ paṇidhāya brahmacariyaɱ carati,|| ||

'Imināhaɱ sīlena vā vatena vā tapena vā brahmacariyena vā devo vā bhavissāmi devaññataro vā' ti,||
tassa cittaɱ na namati ātappāya anuyogāya sātaccāya padhānāya.|| ||

Yassa cittaɱ na namati ātappāya anuyogāya sātaccāya padhānāya,||
ayaɱ pañcamo cetaso vinibandho.|| ||

Ime kho bhikkhave, pañca cetaso vinibandhāti.|| ||


Contact:
E-mail
Copyright Statement   Webmaster's Page