Anguttara Nikaya


[Site Map]  [Home]  [Sutta Indexes]  [Glossology]  [Site Sub-Sections]

The Pali is transliterated as IAST Unicode (āīūṃṅñṭḍṇḷ). Alternatives:
[ ASCII (aiumnntdnl) | Mobile (āīūŋńñţđņļ) | Velthuis (aaiiuu.m'n~n.t.d.n.l) ]

 

Anguttara Nikāya
Pañcaka Nipāta
XXII. Akkosaka-Vagga

Sutta 213

Sīla Suttaɱ

Adapted from the 1995 edition of the digital version of the Sri Lanka Buddha Jayanti Tripitaka Series and proofed against, and mostly resolved to the Pali Text Society Anguttara-Nikaya edited by Prof. E. Hardy, Ph.D., D.D.

 


 

[1][pts]Evaɱ me sutaɱ:|| ||

Ekaɱ samayaɱ Bhagavā Sāvatthiyaɱ viharati.|| ||

Tatra kho Bhagavā bhikkhu āmantesi:|| ||

"Bhikkhavo" ti.|| ||

"Bhadante" ti te bhikkhū Bhagavato paccassosuɱ.|| ||

Bhagavā etad avoca:|| ||

"Pañc'ime bhikkhave ādīnavā dussīlassa sīlavipattiyā.|| ||

Katame pañca?|| ||

2. Idha, bhikkhave,||
dussīlo sīlavipanno pamādādhikaraṇaɱ mahatiɱ bhogajāniɱ nigacchati.|| ||

Ayaɱ bhikkhave paṭhamo ādīnavo dussīlassa sīlavipattiyā.|| ||

3. Puna ca paraɱ bhikkhave dussīlassa sīlavipannassa pāpako kittisaddo abbhuggacchati.|| ||

Ayaɱ bhikkhave dutiyo ādīnavo dussīlassa sīlavipattiyā.|| ||

[253] 4. Puna ca paraɱ bhikkhave dussīlo sīlavipanno yañññad eva parisaɱ upasaŋkamati:||
yadi khattiya-parisaɱ||
yadi brāhmaṇa-parisaɱ||
yadi gahapati-parisaɱ||
yadi samaṇa-parisaɱ,||
avisārado upasaŋkamati||
maŋkubhuto.|| ||

Ayaɱ bhikkhave tatiyo ādīnavo dussīlassa sīlavipattiyā.|| ||

5. Puna ca paraɱ bhikkhave dussīlo sīlavipanno sammūḷho kālaɱ karoti.|| ||

Ayaɱ bhikkhave catuttho ādīnavo dussīlassa sīla vipattiyā.|| ||

6. Puna ca paraɱ bhikkhave dussīlo sīlavipanno kāyassa bhedā param maraṇā apāyaɱ duggatiɱ vinipātaɱ nirayaɱ uppajjati.|| ||

Ayaɱ bhikkhave pañcamo ādīnavo dussīlassa sīlavipattiyā.|| ||

Ime kho bhikkhave pañca ādīnavā dussīlassa sīlavippattiyā.|| ||

 


 

7. Pañc'ime bhikkhave ānisaɱsā sīlavato sīlasampadāya.|| ||

Katame pañca?|| ||

8. Idha, bhikkhave,||
sīlavā sīlasampanno appamādādhikaraṇaɱ mahantaɱ bhogkkhandhaɱ adhigacchati.|| ||

Ayaɱ bhikkhave paṭhamo ānisaɱso sīlavato sīlasampadāya.|| ||

9. Puna ca paraɱ bhikkhave sīlavato sīlasampannassa kalyāṇo kittisaddo abbhuggacchati.|| ||

Ayaɱ bhikkhave dutiyo ānisaɱso sīlavato sīlasampadāya.|| ||

10. Puna ca paraɱ bhikkhave sīlavā sīlasampanno yaññadeva parisaɱ upasaŋkamiti||
yadi khattiya-parisaɱ||
yadi brāhmaṇa-parisaɱ||
yadi gahapati-parisaɱ||
yadi samaṇa-parisaɱ,||
visārado upasaŋkamati,||
amaŋkubhuto|| ||

Ayaɱ bhikkhave tatiyo ānisaɱso sīlavato sīlasampadāya.|| ||

11. Puna ca paraɱ bhikkhave sīlavā sīlasampanno asammūḷho kālaɱ karoti.|| ||

Ayaɱ bhikkhave catuttho ānisaɱso sīlavato sīlasampadāya.|| ||

12. Puna ca paraɱ bhikkhave sīlavā sīlasampanno kāyassa bhedā param maraṇā sugatiɱ saggaɱ lokaɱ uppajjati.|| ||

Ayaɱ bhikkhave pañcamo ānisaɱso silavato sīlasampadāya.|| ||

[254] Ime kho bhikkhave pañca ānisaɱsā sīlavato silasampadāyā" ti.|| ||


Contact:
E-mail
Copyright Statement   Webmaster's Page