Anguttara Nikaya


[Site Map]  [Home]  [Sutta Indexes]  [Glossology]  [Site Sub-Sections]

The Pali is transliterated as IAST Unicode (āīūṃṅñṭḍṇḷ). Alternatives:
[ ASCII (aiumnntdnl) | Mobile (āīūŋńñţđņļ) | Velthuis (aaiiuu.m'n~n.t.d.n.l) ]

 

Anguttara Nikāya
Chakka-Nipata
II: Sārāṇīya-Vagga

Sutta 15

Anutappa Suttaɱ

Adapted from the 1995 edition of the digital version of the Sri Lanka Buddha Jayanti Tripitaka Series and proofed against, and mostly resolved to the Pali Text Society Anguttara-Nikaya edited by Prof. E. Hardy, Ph.D., D.D.

 


 

[1][pts]Evaɱ me sutaɱ:|| ||

Ekaɱ samayaɱ Sāriputto Sāvatthiyaɱ viharati.|| ||

Tatra kho Sāriputto bhikkhu āmantesi:|| ||

"Āvuso bhikkhavo" ti.|| ||

"Āvuso" ti te bhikkhū āyasmato Sāriputtassa paccassosuɱ.|| ||

Āyasmā Sāriputto etad avoca:|| ||

2. "Tathā tathā āvuso bhikkhu vihāraɱ kappeti,||
yathā yathā'ssa vihāraɱ kappayato kālakiriyā anutappā hoti.|| ||

3. Kathañ c'āvuso bhikkhu tathā tathā vihāraɱ kappeti,||
yathā yathā'ssa vihāraɱ kappayato,||
kālakiriyā anutappā hoti?|| ||

Idh'āvuso bhikkhu kammārāmo hoti||
kammarato kammārāmataɱ anuyutto,||
bhassārāmo hoti||
bhassarato bhassārāmataɱ anuyutto,||
niddārāmo hoti||
niddārato niddārāmataɱ anuyutto,||
saŋgaṇikārāmo hoti||
saŋgaṇikārato saŋgaṇikārāmataɱ anuyutto,||
saɱsaggārāmo hoti||
saɱsaggarato saɱsaggārāmataɱ anuyutto,||
papañcārāmo hoti||
papañcarato papañcārāmataɱ anuyutetā.|| ||

Evaɱ kho āvuso bhikkhu tathā tathā vihāraɱ kappeti,||
yathā yathā'ssa vihāraɱ kappayato||
kālakiriyā anutappā hoti.|| ||

Ayaɱ vuccat'āvuso bhikkhū sakkāyābhirato,||
na pahāsi sakkāyaɱ sammā dukkhassa antakiriyāya.|| ||

 


 

4. Tathā tathāvuso bhikkhu vihāraɱ kappeti,||
yathā yathā'ssa vihāraɱ kappayato||
kālakiriyā ananutappā hoti.|| ||

Kathañ c'āvuso bhikkhu tathā tathā vihāraɱ kappeti,||
yathā yathāssa vihāraɱ kappayato||
bhaddakaɱ maraṇaɱ hoti||
kālakiriyā ananutappā hoti?|| ||

Idh'āvuso bhikkhu na kammārāmo hoti||
na kammarato||
na kammārāmataɱ anuyutto,||
na bhassāramo hoti||
na bhassarato||
na bhassāramataɱ anuyutto,||
na niddārāmo hoti,||
na niddārato||
na niddārāmataɱ anuyutto,||
na saŋgaṇikārāmo hoti||
na saŋgaṇikārato||
na saŋgaṇikārāmataɱ anuyutto,||
na saɱsaggārāmo hoti||
na saɱsaggarato||
na saɱsaggārāmataɱ anuyutto,||
na papañvārāmo hoti||
na papañvarato||
na papañvārāmataɱ anuyutto.|| ||

Evaɱ kho āvuso bhikkhu tathā tathāssa vihāraɱ kappeti yathā yathā'ssa vihāraɱ kappayato||
kālakiriyā ananutappā hoti.|| ||

Ayaɱ vuccatāvuso bhikkhu nibbānābhirato pahāsi sakkāyaɱ sammādukkhassa antakiriyāyā" ti.|| ||

Yo papañcaɱ anuyutto papañcābhirato mago||
Virādhayī so nibbānaɱ yogakkhemaɱ anuttaraɱ.|| ||

Yo ca papañcaɱ hitvāna nippapañcapade rato||
Ārādhayī so nibbānaɱ yogakkhemaɱ anuttaran ti.|| ||

 


Contact:
E-mail
Copyright Statement   Webmaster's Page