Anguttara Nikaya


[Site Map]  [Home]  [Sutta Indexes]  [Glossology]  [Site Sub-Sections]

The Pali is transliterated as IAST Unicode (āīūṃṅñṭḍṇḷ). Alternatives:
[ ASCII (aiumnntdnl) | Mobile (āīūŋńñţđņļ) | Velthuis (aaiiuu.m'n~n.t.d.n.l) ]

 

Anguttara Nikāya
Chakka-Nipata
III: Anuttariya-Vagga

Sutta 23

Bhaya Suttaɱ

Adapted from the 1995 edition of the digital version of the Sri Lanka Buddha Jayanti Tripitaka Series and proofed against, and mostly resolved to the Pali Text Society Anguttara-Nikaya edited by Prof. E. Hardy, Ph.D., D.D.

 


 

[1][pts] Evaɱ me sutaɱ:|| ||

Ekaɱ samayaɱ Bhagavā Sāvatthiyaɱ viharati
Jetavane Anāthapiṇḍikassa ārāme.|| ||

Tatra kho Bhagavā bhikkhū āmantesi:|| ||

'Bhikkhavo' ti.|| ||

'Bhadante' ti te bhikkhū Bhagavato paccassosuɱ.|| ||

Bhagavā etad avoca:|| ||

2. Bhayan ti bhikkhave kāmānam etaɱ adhivacanaɱ,||
dukkhan ti bhikkhave kāmānam etaɱ adhivacanaɱ,||
rogo ti bhikkhave kāmānam etaɱ adhivacanaɱ,||
gaṇḍo ti bhik- [311] khave kāmānam etaɱ adhivacanaɱ,||
saŋgo ti bhikkhave kāmānam etaɱ adhivacanaɱ||
paŋko ti bhikkhave kāmānam etaɱ adhivacanaɱ.|| ||

3. Kasmā ca bhikkhave bhayan ti kāmānam etaɱ adhivacanaɱ?|| ||

Kāmarāgarattāyaɱ bhikkhave chandarāgavinibaddho diṭṭhadhammikā pi bhayā na parimuccati,||
samparāyikā pi bhayā na parimuccati.|| ||

Tasmā bhayan ti kāmānam etaɱ adhivacanaɱ.|| ||

4. Kasmā ca bhikkhave dukkhan ti kāmānam etaɱ adhivacanaɱ?|| ||

Kāmarāgarattāyaɱ bhikkhave chandarāgavinibaddho diṭṭhadhammikā pi dukkhā na parimuccati,||
samparāyikā pi dukkhā na parimuccati.|| ||

Tasmā dukkhan ti kāmānam etaɱ adhivacanaɱ.|| ||

5. Kasmā ca bhikkhave rogo ti kāmānam etaɱ adhivacanaɱ?|| ||

Kāmarāgarattāyaɱ bhikkhave chandarāgavinibaddho diṭṭhadhammikā pi rogā na parimuccati,||
samparāyikā pi rogā na parimuccati.|| ||

Tasmā bhayan ti rogo etaɱ adhivacanaɱ.|| ||

6. Kasmā ca bhikkhave gaṇḍo ti kāmānam etaɱ adhivacanaɱ?|| ||

Kāmarāgarattāyaɱ bhikkhave chandarāgavinibaddho diṭṭhadhammikā pi gaṇḍā na parimuccati,||
samparāyikā pi gaṇḍā na parimuccati.|| ||

Tasmā bhayan ti gaṇḍo etaɱ adhivacanaɱ.|| ||

7. Kasmā ca bhikkhave saŋgo ti kāmānam etaɱ adhivacanaɱ?|| ||

Kāmarāgarattāyaɱ bhikkhave chandarāgavinibaddho diṭṭhadhammikā pi saŋgā na parimuccati,||
samparāyikā pi saŋgā na parimuccati.|| ||

Tasmā saŋgo ti kāmānam etaɱ adhivacanaɱ.|| ||

8. Kasmā ca bhikkhave paŋko ti kāmānam etaɱ adhivacanaɱ?|| ||

Kāmarāgarattāyaɱ bhikkhave chandarāgavinibaddho diṭṭhadhammikā pi paŋkā na parimuccati,||
samparāyikā pi paŋkā na parimuccati.|| ||

Tasmā paŋko ti kāmāname taɱ adhivacananti.|| ||

Bhayaɱ dukkhaɱ rogo gaṇḍo saŋgo paŋko ubhayaɱ||
Ete kāmā pavuccanti, yattha satto puthujjano.|| ||

Upādāne bhayaɱ disvā jātimaraṇasambhave||
Anupādā vimuccanti jātimaraṇa saŋkhaye.|| ||

Te khemappattā sukhino diṭṭhadhammābhinibbutā||
Sabbaverabhayātītā sabbadukkhaɱ upaccagun ti.|| ||

 


Contact:
E-mail
Copyright Statement   Webmaster's Page