Anguttara Nikaya


[Site Map]  [Home]  [Sutta Indexes]  [Glossology]  [Site Sub-Sections]

The Pali is transliterated as IAST Unicode (āīūṃṅñṭḍṇḷ). Alternatives:
[ ASCII (aiumnntdnl) | Mobile (āīūŋńñţđņļ) | Velthuis (aaiiuu.m'n~n.t.d.n.l) ]

 

Aŋguttara Nikāya
Chakkanipata
IV. Devatā Vagga

Sutta 41

Dārukkhandha suttaɱ

Adapted from the 1995 edition of the digital version of the Sri Lanka Buddha Jayanti Tripitaka Series and proofed against, and mostly resolved to the Pali Text Society Anguttara-Nikaya edited by Prof. E. Hardy, Ph.D., D.D.

 


 

[1][pts][ati][bd] EVAṂ ME SUTAṂ

Ekaɱ samayaɱ āyasmā Sāriputto Rājagahe viharati Gijjhakūṭe pabbate. Atha kho āyasmā Sāriputto pubbaṇhasamayaɱ nivāsetvā pattacīvaram ādāya sambahulehi bhikkhūhi saddhiɱ Gijjhakūṭā pabbatā orohanto addasa aññatarasmiɱ padese mahantaɱ dārukkhandhaɱ, disvā bhikkhū āmantesi:
Passatha no bumhe āvuso amuɱ mahantaɱ dārukkhandhan ti?

Evam āvuso ti.

[2][pts][ati][bd] Ākaŋkhamāno āvuso bhikkhu iddhimā cetovasippatto amuɱ dārukkhandhaɱ paṭhavī tv eva adhimucceyya.
Taɱ kissa hetu?
Atthi āvuso amusmiɱ dārukkhandhe paṭhavidhātu, yaɱ nissāya bhikkhu iddhimā cetovasippatto amuɱ dārukkhandhaɱ paṭhavī tv eva adhimucceyya.

[3][pts][ati][bd] Ākaŋkhamāno āvuso bhikkhu iddhimā cetovasippatto amuɱ dārukkhandhaɱ āpo tv eva adhimucceyya.
Taɱ kissa hetu?
Atthi āvuso amusmiɱ dārukkhandhe āpodhātu, yaɱ nissāya bhikkhu iddhimā cetovasippatto amuɱ dārukkhandhaɱ āpo tv eva adhimucceyya.

[4][pts][ati][bd] Ākaŋkhamāno āvuso bhikkhu iddhimā cetovasippatto amuɱ dārukkhandhaɱ tejo tv eva adhimucceyya.
Taɱ kissa hetu?
Atthi āvuso amusmiɱ dārukkhandhe tejodhātu, yaɱ nissāya bhikkhu iddhimā cetovasippatto amuɱ dārukkhandhaɱ tejo tv eva adhimucceyya.

[5][pts][ati][bd] Ākaŋkhamāno āvuso bhikkhu iddhimā cetovasippatto amuɱ dārukkhandhaɱ vāyo tv eva adhimucceyya.
Taɱ kissa hetu?
Atthi āvuso amusmiɱ dārukkhandhe vāyodhātu, yaɱ nissāya bhikkhu iddhimā cetovasippatto amuɱ dārukkhandhaɱ vāyo tv eva adhimucceyya.

[6][pts][ati][bd] Ākaŋkhamāno āvuso bhikkhu iddhimā cetovasippatto amuɱ dārukkhandhaɱ subhan tv eva adhimucceyya.
Taɱ kissa hetu?
Atthi āvuso amusmiɱ dārukkhandhe subhadhātu, yaɱ nissāya bhikkhu iddhimā cetovasippatto amuɱ dārukkhandhaɱ subhan tv eva adhimucceyyā ti

[7][pts][ati][bd] Ākaŋkhamāno āvuso bhikkhu iddhimā cetovasippatto amuɱ dārukkhandhaɱ asubhan tv eva adhimucceyya.
Taɱ kissa hetu?
Atthi āvuso amusmiɱ dārukkhandhe asubhadhātu, yaɱ nissāya bhikkhu iddhimā cetovasippatto amuɱ dārukkhandhaɱ asubhan tv eva adhimucceyyā ti

 


Contact:
E-mail
Copyright Statement   Webmaster's Page