Anguttara Nikaya


[Site Map]  [Home]  [Sutta Indexes]  [Glossology]  [Site Sub-Sections]

The Pali is transliterated as IAST Unicode (āīūṃṅñṭḍṇḷ). Alternatives:
[ ASCII (aiumnntdnl) | Mobile (āīūŋńñţđņļ) | Velthuis (aaiiuu.m'n~n.t.d.n.l) ]

 

Aŋguttara Nikāya
Chakkanipata
IV. Devatā Vagga

Sutta 42

Nāgita Suttaɱ

Adapted from the 1995 edition of the digital version of the Sri Lanka Buddha Jayanti Tripitaka Series and proofed against, and mostly resolved to the Pali Text Society Anguttara-Nikaya edited by Prof. E. Hardy, Ph.D., D.D.

 


 

[1][pts][than] Evaɱ me sutaɱ.|| ||

Ekaɱ samayaɱ Bhagavā Kosalesu cārikaɱ caramāno mahatā bhikkhu-saŋghena saddhiɱ yena Icchānaŋgalaɱ nāma kosalānaɱ brāhmaṇagāmo tad avasari.|| ||

Tatra sudaɱ Bhagavā Icchānaŋgale viharati Icchānaŋgalavanasaṇḍe.|| ||

Assosuɱ kho Icchānaŋgalikā brāhmaṇagahapatikā||
"samaṇo khalu bho Gotamo Sakyaputto Sakyakulā pabbajito Icchānaŋgalaɱ anuppatto Icchānaŋgale viharati Icchānaŋgalavanasaṇḍe.|| ||

Taɱ kho pana bhavantaɱ Gotamaɱ evaɱ kalyāṇo kittisaddo abbhūggato||
"Iti pi so Bhagavā arahaɱ Sammā-sambuddho vijjā-caraṇa-sampanno sugato lokavidu anuttaro purisadamma sārathi satthā deva-manussānaɱ buddho Bhagavā" ti.|| ||

So imaɱ lokaɱ sadevakaɱ samārakaɱ sabrahmakaɱ sassamaṇabrāhmaṇīɱ pajaɱ sadeva-manussaɱ sayaɱ abhiññā sacchikatvā pavedeti.|| ||

So dhammaɱ deseti ādikalyāṇaɱ majjhekalyāṇaɱ pariyosānakalyāṇaɱ sātthaɱ savyañjanaɱ kevalaparipuṇṇaɱ parisuddhaɱ,||
brahmacariyaɱ pakāseti.|| ||

Sādhu kho pana tathārūpānaɱ arahataɱ dassanaɱ hotī" ti. Atha kho Icchānaŋgalikā brāhmaṇagahapatikā tassā rattiyā accayena pahūtaɱ khādanīyaɱ bhojanīyaɱ ādāya yena Icchānaŋgalavanasaṇḍaɱ ten'upasaŋkamiɱsu.|| ||

Upasaŋkamitvā bahidvārakoṭṭhake aṭṭhaɱsu uccāsaddā mahāsaddā. Tena kho pana samayena āyasmā Nāgito Bhagavato upaṭṭhāko hoti.|| ||

Atha kho Bhagavā āyasmantaɱ Nāgita`ɱ [342] āmantesi:||
ke pana te Nāgita uccāsaddā mahāsaddā kevaṭṭā maññe macche vilopetī ti.|| ||

Ete bhante Icchānaŋgalikā brāhmaṇagahapatikā pahutaɱ khādanīyaɱ hojanīyaɱ ādāya bahidvārakoṭṭhake ṭhitā Bhagavantaɱyeva uddissa bhikkhu-saŋghaɱ cā ti. 'Māhaɱ Nāgita yasena samāgamaɱ mā ca mayā yaso.|| ||

Yo kho Nāgita na yimassa nekkhammasukhassa pavivekasukhassa upasamasukhassa sambodhasukhassa nikāmalābhī assa akicchalābhī akasiralābhī,||
yassāhaɱ nekkhammasukhassa pavivekasukhassa upasamasukhassa sambodhasukhassa nikāmalābhī akicchalābhī akasiralābhī,||
so taɱ mī'hasukhaɱ middhasukhaɱ lābhasakkārasilokasukhaɱ sādiyeyyāti.|| ||

Adhivāsetudāni bhante Bhagavā,||
adhivāsetu sugato.|| ||

Adhivāsana kālodāni bhante Bhagavato.|| ||

Yena yen'eva dāni bhante Bhagavā gamissati,||
tanninnā va bhavissanti brāhmaṇagahapatikā,||
ne gamā ce va jānapadā ca.|| ||

seyyathā pi bhante thullaphusitake deve vassante yathāninnaɱ udakāni pavattanti,||
eva meva kho bhante yena yen'evadāni Bhagavā gamissati,||
tanninnā va bhavissanti brāhmaṇagahapatikā negamā ce va jānapadā ca.|| ||

Taɱ kissa hetu?|| ||

Tathā hi bhante Bhagavato silapaññaṇanti.|| ||

Māhaɱ Nāgita yasena samāgamaɱ mā ca mayā saso.|| ||

Yo kho Nāgita,||
na yimassa nekkhammasukhassa pavivekasukhassa upasamasukhassa sambodhasukhassa nikāmalābhī assa akicchalābhī akasiralābhī,||
yassāhaɱ nekkhammasukhassa pavivekasukhassa upasamasukhassa sambodhasukhassa nikāmalābhī akicchalābhi akasiralābhī,||
so taɱ mī'hasukhaɱ middhasukhaɱ lābhasakkāra silokasukhaɱ sādiyeyya ti.|| ||

Idhāɱ Nāgita bhikkhuɱ passāmi gāmantavihāriɱ [343] samāhitaɱ nisinnaɱ tassa mayhaɱ Nāgita,||
evaɱ hoti:||
"idānimaɱ āyasmantaɱ ārāmiko vā samaṇuddeso vā sahadhammiko vā tamhā samādhimhā cāvessatī" ti.|| ||

Tenāhaɱ Nāgita tassa bhikkhuno na attamano homi gāmantavihārena.|| ||

(2) Idha panāhaɱ Nāgita,||
bhikkhuɱ passāmi āraññakaɱ araññe pacalāyamānaɱ nisinnaɱ.|| ||

Tassa mayhaɱ Nāgita evaɱ hoti:||
"idāni ayamāyasmā imaɱ niddākilamathaɱ paṭivinodetvā araññasaññaɱ yeva manasi karissati ekattanti.|| ||

Tenāhaɱ Nāgita tassa bhikkhuno attamano homi araññavihārena. (3) Idha panāhaɱ Nāgita bhikkhuɱ passāmi araññakaɱ araññe asamāhitaɱ nisinnaɱ.|| ||

Tassa mayhaɱ Nāgita evaɱ hoti:||
"idāni ayamāyasmā asamāhitaɱ vā cittaɱ samādahi'ssati samāhitaɱ vā cittaɱ anurakkhi'ssati" ti.|| ||

Tenāhaɱ Nāgita tassa bhikkhuno attamano homi araññavihārena.|| ||

(4) Idha panāhaɱ Nāgita,||
bhikkhuɱ passāmi āraññakaɱ araññe samāhitaɱ nisinnaɱ.|| ||

Tassa mayhaɱ Nāgita evaɱ hoti:||
idāni ayamāyasmā avimuttaɱ vā cittaɱ vimocessati,||
vimuttaɱ vā cittaɱ anurakkhi'ssatī" ti.|| ||

Tenāhaɱ Nāgita tassa bhikkhuno attamano homi araññavihārena.|| ||

(5) Idha panāhaɱ Nāgita bhikkhuɱ passāmi gāmantavihāriɱ lābhiɱ cīvara piṇḍapātasenāsanagilānapaccayabhesajjaparikkhārānaɱ.|| ||

So taɱ lābhasakkārasilokaɱ nikāmayamāno riñcati paṭisallānaɱ,||
riñcati araññe vanapatthāni pantāni senāsanāni,||
gāminigamarājadhāniɱ osaritvā vāsaɱ kappeti.|| ||

Tenāhaɱ Nāgita tassa bhikkhuno na attamano homi gāmantavihārena.|| ||

(6) Idha panāhaɱ Nāgita bhikkhuɱ passāmi āraññakaɱ lābhiɱ cīvarapiṇḍapātasenāsanagilānapaccayabhesajjaparikkhārānaɱ.|| ||

So taɱ lābhasakkārasilokaɱ paṭipaṇāmetvā na riñcati paṭisallānaɱ,||
na riñcati araɱ yevanapatthāni pantāni senāsanāni.|| ||

Tenāhaɱ Nāgita tassa bhikkhuno attamano homi araññavihārena.|| ||

Yasmāhaɱ Nāgita samaye addhānamaggapaṭipanno na kañci passāmi purato vā pacchato vā,||
phāsu me Nāgita tasmiɱ samaye hoti antamaso uccārapassāvakammāyā" ti.|| ||

Devatā vaggo catuttho.

 


Contact:
E-mail
Copyright Statement   Webmaster's Page