Anguttara Nikaya


[Site Map]  [Home]  [Sutta Indexes]  [Glossology]  [Site Sub-Sections]

The Pali is transliterated as IAST Unicode (āīūṃṅñṭḍṇḷ). Alternatives:
[ ASCII (aiumnntdnl) | Mobile (āīūŋńñţđņļ) | Velthuis (aaiiuu.m'n~n.t.d.n.l) ]

 

Aŋguttara Nikāya
Chakkanipata
V. Dhammika Vagga

Sutta 49

Khema Suttaɱ

Adapted from the 1995 edition of the digital version of the Sri Lanka Buddha Jayanti Tripitaka Series and proofed against, and mostly resolved to the Pali Text Society Anguttara-Nikaya edited by Prof. E. Hardy, Ph.D., D.D.

 


 

[1][pts][than] Ekaɱ samayaɱ Bhagavā Sāvatthiyaɱ viharati Jetavane Anāthapiṇḍikassa ārāme.|| ||

Tena kho pana samayena āyasmā ca Khemo āyasmā ca Sumano Sāvattiyaɱ viharanti Andhavanasmiɱ.|| ||

Atha kho āyasmā ca Khemo āyasmā ca Sumano yena Bhagavā ten'upasaŋkamiɱsu.|| ||

Upasaŋkamitvā Bhagavantaɱ abhivādetvā eka-m-antaɱ nisīdiɱsu.|| ||

Eka-m-antaɱ nisinno kho āyasmā Khemo Bhagavantaɱ etad avoca:|| ||

Yo so bhante bhikkhu arahaɱ khīṇāsavo vusitavā katakaraṇīyo ohitabhāro anuppatta-sadattho parikkhīṇabhavasaɱyojano sammadaññā vimutto,||
tassa na evaɱ hoti "atthi me seyyoti vā atthi me sadisoti vā atthi me hīnoti vā" ti.|| ||

Idamavocāyasmā Khemo samanuñño satthā ahosi.|| ||

Atha kho āyasmā Khemo samanuñño me satthāti uṭṭhāy āsanā Bhagavantaɱ abhivādetvā padakkhiṇaɱ katvā pakkāmi.|| ||

Atha kho āyasmā Sumano acirapakkante āyasmante kheme Bhagavantaɱ etad avoca:|| ||

"Yo so bhante bhikkhu arahaɱ khīṇāsavo vusitavā katakaraṇīyo ohitabhāro anuppatta-sadattho parikkhīṇabhavasaɱyojano sammadaññā vimutto,||
tassa na evaɱ hoti "n'atthi me seyyoti vā,||
n'atthi me sadisoti vā,||
n'atthi me hīnoti vā" ti.|| ||

Idam avocā yasmā Sumano samanuñño satthā ahosi.|| ||

Atha kho āyasmā Sumano samanuñño me satthāti uṭṭhāy āsanā Bhagavantaɱ abhivādetvā padakkhiṇaɱ katvā pakkāmi.|| ||

Atha kho Bhagavā acirapakkante āyasmante ca kheme āyasmante ca sumane bhikkhū āmentasi:||
evaɱ kho bhikkhave kulaputtā aññaɱ vyākaronti,||
attho ca vutto,||
attā ca anupanīto.|| ||

Atha ca pana idh'ekacce moghapurisā hasamānakā maññe aññaɱ vyākarontī ti.|| ||

Te pacchā vighātaɱ āpajjantī ti.|| ||

Na ussesu na omesu samatte nopanīyare||
Khīṇā sañjāti vusitaɱ brahmacariyaɱ caranti||
Saññojanavippamuttā ti.|| ||

 


Contact:
E-mail
Copyright Statement   Webmaster's Page