Anguttara Nikaya


[Site Map]  [Home]  [Sutta Indexes]  [Glossology]  [Site Sub-Sections]

The Pali is transliterated as IAST Unicode (āīūṃṅñṭḍṇḷ). Alternatives:
[ ASCII (aiumnntdnl) | Mobile (āīūŋńñţđņļ) | Velthuis (aaiiuu.m'n~n.t.d.n.l) ]

 

Aŋguttara Nikāya
Chakkanipata
V. Dhammika Vagga

Sutta 51

Ānanda Suttaɱ

Adapted from the 1995 edition of the digital version of the Sri Lanka Buddha Jayanti Tripitaka Series and proofed against, and mostly resolved to the Pali Text Society Anguttara-Nikaya edited by Prof. E. Hardy, Ph.D., D.D.

 


 

[1][pts][than] Sāvatthinidānaɱ|| ||

Atha kho āyasmā Ānando yenāyasmā Sāriputto ten'upasaŋkami.|| ||

Upasaŋkamitvā āyasmatā Sāriputtena saddhiɱ sammodi.|| ||

Sammodanīyaɱ kathaɱ sārāṇīyaɱ vitisāretvā eka-m-antaɱ nisīdi.|| ||

Eka-m-antaɱ nisinno kho āyasmā Ānando āyasmantaɱ Sāriputtaɱ etad avoca.|| ||

2. "Kittāvatā nu kho āvuso Sāriputta bhikkhu assutañ c'eva dhammaɱ suṇāti,||
sutā c'assa dhammā na sammosaɱ gacchanti,||
ye c'assa dhammā pubbe cetasā samphuṭṭhapubbā,||
te ca samudācaranti,||
aviññātañ ca vijānātī" ti?|| ||

"Āyasmā kho Ānando bahūssuto,||
paṭibhātu āyasmantaɱ yeva Ānandan" ti.|| ||

"Tena h'āvuso Sāriputta suṇāhi,||
sādhukaɱ manasikarohi,||
bhāsissāmī" ti.|| ||

"Evaɱ āvuso" ti kho āyasmā Sāriputto āyasmato Ānandassa paccassosi.|| ||

Āyasmā Ānando etad avoca:|| ||

3. "Idh'āvuso Sāriputta bhikkhu dhammaɱ pariyāpuṇāti:||
suttaɱ geyyaɱ veyyākaraṇaɱ gāthaɱ udānaɱ itivuttakaɱ jātakaɱ abbūtadhammaɱ vedallaɱ.|| ||

Yathāsutaɱ yathāpariyattaɱ dhammaɱ vitthārena paresaɱ deseti.|| ||

Yathāsutaɱ yathāpariyattaɱ dhammaɱ vitthārena paresaɱ vāceti.|| ||

Yathāsutaɱ yathāpariyattaɱ dhammaɱ vitthārena sajjhāyaɱ karoti.|| ||

Yathāsutaɱ yathāpariyattaɱ dhammaɱ cetasā anuvitakkoti,||
anuvicāreti,||
manasānupekkhati.|| ||

Yasmiɱ āvāse therā bhikkhu viharanti bahussutā āgatāgamā dhammadharā vinayadharā mātikādharā,||
tasmiɱ āvāse vassaɱ upeti.|| ||

Te kālena kālaɱ upasaŋkamitvā paripūcchati paripañhati:|| ||

'Idaɱ bhante kathaɱ||
imassa kvattho', ti?|| ||

Tassa te āyasmanto avivaṭañ c'eva vivaranti,||
anuttānīkatañ ca uttānīkarenti.|| ||

Anekavihitesu ca kaŋkhaṭṭhānīyesu dhammesu kaŋkhaɱ paṭivinodenti.|| ||

Ettāvatā kho [362] āvuso Sāriputta bhikkhu assutañ c'eva dhammaɱ suṇāti.|| ||

Sutā c'assa dhammā na sammosaɱ gacchanti.|| ||

Ye c'assa dhammā pubbe cetasā samphuṭṭhapubbā,||
te ca samudācaranti,||
aviññātañ ca vijānātī" ti.|| ||

4. "Acchariyaɱ āvuso,||
abbhutaɱ āvuso,||
yāva subhāsitamidaɱ āyasmatā Ānandena.|| ||

Imehi ca mayaɱ chahi dhammehi samannāgataɱ āyasmantaɱ Ānandaɱ dhārema".|| ||

5. "Āyasmā hi Ānando dhammaɱ pariyāpuṇāti:||
suttaɱ geyyaɱ veyyākaraṇaɱ gāthaɱ udānaɱ itivuttakaɱ jātakaɱ abbhutadhammaɱ vedallaɱ.|| ||

Āyasmā Ānando yathāsutaɱ yathāpariyattaɱ dhammaɱ vitthārena paresaɱ deseti.|| ||

Āyasmā Ānando yathāsutaɱ yathāpariyattaɱ dhammaɱ vitthārena paresaɱ vāceti.|| ||

Āyasmā Ānando yathāsutaɱ yathāpariyattaɱ dhammaɱ vitthārena sajjhāyaɱ karoti.|| ||

Āyasmā Ānando yathāsutaɱ yathāpariyattaɱ dhammaɱ cetasā anuvitakketi,||
anuvicāreti,||
manasānupekkhati.|| ||

Āyasmā Ānando yasmiɱ āvāse therā bhikkhū viharanti bahūssutā āgatāgamā dhammadharā vinayadharā mātikādharā,||
tasmiɱ āvāse vassaɱ upeti.|| ||

Te āyasmā Ānando, kālena kālaɱ upasaŋkamitvā paripūcchati paripañhati:|| ||

'Idaɱ bhante kathaɱ, imassa kvattho' ti?|| ||

Te āyasmato Ānandassa avivaṭañ c'eva vivaranti,||
anuttānīkatañ ca uttānīɱ karonti,||
anekavihitesu ca kaŋkhaṭṭhānīyesu dhammesu kaŋkhaɱ paṭivinodentī" ti.|| ||

 


Contact:
E-mail
Copyright Statement   Webmaster's Page