Anguttara Nikaya


[Site Map]  [Home]  [Sutta Indexes]  [Glossology]  [Site Sub-Sections]

The Pali is transliterated as IAST Unicode (āīūṃṅñṭḍṇḷ). Alternatives:
[ ASCII (aiumnntdnl) | Mobile (āīūŋńñţđņļ) | Velthuis (aaiiuu.m'n~n.t.d.n.l) ]

 

Aŋguttara Nikāya
Chakkanipata
VI. Mahā Vagga

Sutta 55

Soṇa suttaɱ

Adapted from the 1995 edition of the digital version of the Sri Lanka Buddha Jayanti Tripitaka Series and proofed against, and mostly resolved to the Pali Text Society Anguttara-Nikaya edited by Prof. E. Hardy, Ph.D., D.D.

 


 

[1][pts][than] Evam me sutaɱ ekaɱ samayaɱ Bhagavā Rājagahe viharati Gijjhakūṭe pabbate. Tena kho pana samayena āyasmā soṇo Rājagahe viharati sītavanasmiɱ.|| ||

Atha kho āyasmato soṇassa rahogatassa patisallīnassa evaɱ cetaso parivitakko udapādi: " ye kho keci Bhagavato sāvakā āraddhaviriyā viharanti, ahaɱ tesaɱ aññataro. Atha ca pana me na anupādāya āsavehi cittaɱ vimuccati. Saɱvijjanti kho pana me kule bhogā. Sakkā bhoge ca bhuñjituɱ puññāni ca kātuɱ. Yannūnāhaɱ sikkhaɱ paccakkhāya hīnāyāvattitvā bhoge ca bhuñjeyyaɱ, puññāni ca kareyyanti.|| ||

Atha kho Bhagavā āyasmato soṇassa cetasā ceto paricitakkamaññāya seyyathā pi nāma balavā puriso sammiñjitaɱ vā bāhaɱ pasāreyya pasāritaɱ vā bāhaɱ sammiñjeyya, eva mevaɱ1 Gijjhakūṭe pabbate antarahito sītavane āyasmato soṇassa pamukhe pātu-r-ahosi. Nisidi Bhagavā paññatte āsane. Āyasmāpi kho soṇo Bhagavantaɱ abhivādetvā eka-m-antaɱ nisīdi. Eka-m-antaɱ nisinnaɱ kho āyasmantaɱ soṇaɱ Bhagavā etad avoca:|| ||

Nanū te soṇa, rahogatassa patisallīnassa evaɱ cetaso parivitakko udapādi: "ye kho keci Bhagavato sāvakā āraddhaviriyā viharanti, ahaɱ tesaɱ aññataro, atha ca pana me na anupādāya āsavehi cittaɱ vimuccati. Saɱvijjanti kho pana me kule bhogā. Sakkā bhoge ca bhuñjituɱ puññāni ca kātuɱ. Yannūnāhaɱ sikkhaɱ paccakkhāya hīnāyāvattitvā bhoge ca bhuñjeyyaɱ, puññāni ca kareyyanti. "|| ||

Evaɱ bhante.|| ||

Taɱ kiɱ maññasi, soṇa kusalo tvaɱ pubbe agārikabhuto vīṇāya tantissareti.|| ||

Evaɱ bhante.|| ||

Taɱ kiɱ maññesi soṇa yadā te vīṇāya tantiyo accāyatā honti, api nu te vīṇā tasmiɱ samaye saravatī vā hoti, kammaññā vāti.|| ||

No h'etaɱ bhante.|| ||

Taɱ kiɱ maññasi soṇa yadā te vīṇāya tantiyo atisithilā honti, api nu te vīṇā tasmiɱ samaye saravati vā hoti kammaññāvāti|| ||

no h'etaɱ bhante.|| ||

Yadā pana te soṇa vīṇāya tantiyo na accāyatā honti na atisithilā, same guṇe patiṭṭhitā, api nu te vīṇā tasmiɱ samaye saravatī vā hoti kammaññā vāti.|| ||

Evaɱ bhante.|| ||

Evam eva kho soṇa accāraddhaɱ viriyaɱ uddhaccāya saɱvattati. Atilīnaɱ viriyaɱ1 kosajjāya saɱvattati. Tasmāt iha tvaɱ soṇa, viriyasamataɱ adhiṭṭhaha, indriyānaɱ ca samataɱ paṭivijjha, tattha ca nimittaɱ gaṇhāhīti.|| ||

"Evaɱ bhante tī kho āyasmā soṇo Bhagavato paccassosi.|| ||

Atha kho Bhagavā āyasmantaɱ soṇaɱ iminā ovādena ovaditvā soyyathāpi nāma balavā puriso sammiñjitaɱ vā bāhaɱ pasāreyya. Pasāritaɱ vā bāhaɱ sammiñjeyya, evam eva kho sītavane antarahito Gijjhakūṭe pabbate pātu-r-ahosi.|| ||

Atha kho āyasmā soṇo aparena samayena viriyasamataɱ adhiṭṭhāsi indriyānañca samataɱ paṭivijjhi. Tattha ca nimittaɱ aggahesi. Atha kho āyasmā soṇo eko vūpakaṭṭho appamatto ātāpi pahitatto viharanto na cirass'eva yassatthāya kulaputtā samma-d-eva agārasmā anagāriyaɱ pabbajanti, tadanuttaraɱ brahmacariyapariyosānaɱ diṭṭhe va dhamme sayaɱ abhiññā sacchikatvā upasampajja vihāsi " khīṇā jāti, vusitaɱ brahmacariyaɱ, kataɱ karaṇīyaɱ, nāparaɱ itthattāyā" ti.abbhaññāsi. Aññataro ca panāyasmā soṇo arahataɱ ahosi.|| ||

Atha kho āyasmato soṇassa arahattappattassa etad ahosi: "yannūnāhaɱ yena Bhagavā ten'upasaŋkameyyaɱ, upasaŋkamitvā Bhagavato santike aññaɱ vyākareyyanti". Atha kho āyasmā soṇo yena Bhagavā ten'upasaŋkami. Upasaŋgamitvā Bhagavantaɱ abhivādevā eka-m-antaɱ nisidi. Eka-m-antaɱ nisinno kho āyasmā soṇo Bhagavantaɱ etad avoca:|| ||

Yo so bhante bhikkhū arahaɱ khīṇāsavo vusitavā katakaraṇīyo ohitabhāro anuppatta-sadattho parikkhīṇabhavasaɱyojano sammadaññāvimutto, so cha ṭhānāni adhimutto hoti: nekkhammādhimutto hoti. Pavivekādhimutto hoti. Abyāpajjhādhimutto hoti. Taṇhakkhayādhimutto hoti. Upādānakkhayādhimutto hoti. Asammohādhimutto hoti.|| ||

Siyā kho pana bhante, idh'ekaccassa āyasmato evam assa: "kevalaɱ saddhāmattakaɱ nūna ayamāyasmā nissāya nekkhammādhimutto" ti. Na kho pan'etaɱ bhante evaɱ daṭṭhabbaɱ. Khīṇāsavo bhante bhikkhū vusitavā. Katakaraṇīyo, karaṇīyaɱ attano asamanupassanto katassavā pativayaɱ, khayā rāgassa vitarāgattā nekkhammādhimutto hoti. Khayā dosassa vītadosattā nekkhammādhimutto hoti, khayā mohassa vītamohattā nekkhammādhimutto hoti.|| ||

Siyā kho pana bhante, idh'ekaccassa āyasmato evam assa: "lābhasakkārasilokaɱ nūna ayamāyasmā nikāmayamāno pavivekādhi mutto" ti. Na kho pan'etaɱ bhante. Evaɱ daṭṭhabbaɱ. Khīṇāsavo bhante, bhikkhu vusitavā katakaraṇīyo, karaṇīyaɱ attano asamanupassanto katassa vā paticayaɱ, khayā rāgassa vītarāgattā pavivekādhimutto hoti, khayā dosassa vītadosattā pavivekādhimutto hoti, khayā mohassa vītamohattā pavivekādhimutto hoti.|| ||

Siyā kho pana bhante, idh'ekaccassa āyasmato evam assa: sīlabbataparāmāsaɱ nūna ayamāyasmā sārato paccāgacchanto avyāpajjhādhimutto hoti. Na kho pan'etaɱ bhante, evaɱ daṭṭhabbaɱ. Khīṇāsavo bhante, bhikkhū vusitavā katakaraṇīyo, karaṇīyaɱ attano asamanupassanto katassa vā paticayaɱ, khayā rāgassa vītarāgattā abyāpajajhādhimutto hoti, khayā dosassa vītadosattā, avyāpajjhādhimutto hoti, khayā mohassa vītamohattā avyāpajjhādhimutto hoti.|| ||

Na kho pan'etaɱ bhante, evaɱ daṭṭhabbaɱ. Bhīṇāsavo bhante, bhikkhū vusitavā katakaraṇīyo, karaṇīyaɱ attano asamanupassanto katassa vā paticayaɱ, khayā rāgassa vitarāgattā taṇhakkhayādhimutto hoti, khayā dosassa vītadosattā taṇhakkhayādhimutto hoti, khayā mohassa vītamohattā taṇhakkhayādhimutto hoti.|| ||

Na kho pan'etaɱ bhante, evaɱ daṭṭhabbaɱ. Khīṇāsavo bhante, bhikkhū vusitavā katakaraṇīyo, karaṇīyaɱ attano asamanupassanto katassa vā paticayaɱ, khayā rāgassa vitarāgattā upādānakkhayādhimutto hoti, khayā dosassa vītadosattā upādānakkhayādhimutto hoti, khayā mohassa vītamohattā upādānakkhayādhimutto hoti.|| ||

Na kho pan'etaɱ bhante, evaɱ daṭṭhabbaɱ. Khīṇāsavo bhante, bhikkhu vusitavā katakaraṇīyo, karaṇīyaɱ attano asamanupassanto katassa vā paticayaɱ, khayā rāgassa vītarāgattā asammohādhimutto hoti, khayā dosassa vītadosattā asammohādhimutto hoti, khayā mohassa vītamohattā asammohādhimutto hoti.|| ||

Evaɱ sammāvimuttacittassa, bhante, bhikkhuno bhūsā ce pi cakkhuviññeyyā rūpā cakkhussa āpāthamāgacchanti, nev'assa cittaɱ pariyādiyanti, amissikatamev'assa cittaɱ hoti, ṭhitaɱ āneñjappattaɱ. Vayañ cassānupassati. Bhūsā ce pi sotaviññeyyā saddā sotassa āpāthamāgacchanti, nev'assa cittaɱ pariyādiyanti, amissikatamev'assa cittaɱ hoti, ṭhitaɱ āneñjappattaɱ, vayañ cassānupassati.|| ||

Evaɱ sammāvimuttacittassa, bhante, bhikkhano bhūsā ce pi chakkhūviññeyyā rūpā cakkhussa āpāthamāgacchantati, nev'assa cittaɱ pariyādiyanti, amissīkatamev'assa citaɱtaɱ hoti, ṭhitaɱ āneñjappattaɱ. Vayañ cassānupassati. Ghānaviññeyyā gandhā ghānassa āpāthamāgacchanti, nev'assa cittaɱ pariyādiyanti, amissīkatamev'assa cittaɱ hoti, ṭhitaɱ āneñgappattaɱ, vayañ cassānupassati.|| ||

Evaɱ sammāvimuttacittassa, bhante, bhikkhuno bhūsā ce pi cakkhuviññeyyā rūpā cakkhussa āpāthamāgacchanti, nev'assa cittaɱ pariyādiyanti, amissikatamev'assa cittaɱ hoti, ṭhitaɱ āneñjappattaɱ. Vayañ cassānupassati. Jivhāviññeyyā rasā jīvhāya āpāthamāgacchanti, nev'assa cittaɱ pariyādiyanti, amissikatamev'assa cittaɱ hoti, ṭhitaɱ āneñjappattaɱ, vaya ñcassānupassati.|| ||

Evaɱ sammāvimuttacittassa, bhante, bhikkhuno bhūsā ce pi cakkhuviññeyyā rūpā cakkhussa āpāthamāgacchanti, nev'assa cittaɱ pariyādiyanti, amissīkatamev'assa cittaɱ hoti, ṭhitaɱ āneñjappattaɱ. Vayañ cassānupassati. Kāyaviññeyyā phoṭṭhabbā kāyassa āpāthamāgacchanti, nev'assa cittaɱ pariyādiyanti, amissīkatamev'assa cittaɱ hoti, ṭhitaɱ āneñjappattaɱ, vayañ cassānupassati.|| ||

Evaɱ sammāvimuttacittassa, bhante, bhikkhuno bhūsā ce pi cakkhuviññeyya rūpā cakkhussa āpāthamāgacchanti, nev'assa cittaɱ pariyādiyanti, amissīkatamev'assa cittaɱ hoti, ṭhitaɱ āneñjappattaɱ. Vayañ cassānupassati. Manoviññeyyā dhammā manassa āpāthamāgacchanti, nev'assa cittaɱ pariyādiyanti, amissikatamev'assa cittaɱ hoti, ṭhitaɱ āneñjappattaɱ, vayañ cassānupassati.|| ||

seyyathā pi bhante selo pabbato acchiddo asusiro ekaghano. Atha purattimāya ce pi disāya āgaccheyya bhūsā vātavuṭṭhi n'eva taɱ saŋkampeyya, na sampakampeyya, na sampavedheyya, atha pacchimāya ce pi disāya āgaccheyya bhūsā vātavuṭṭhi n'eva taɱ saŋkampeyya, na sampakampeyya, na sampavedheyya. Atha uttarāya ce pi disāya āgaccheyya bhūsā vātavuṭṭha n'eva taɱ saŋkampeyya na sampakampeyya, na sampavedheyya, atha dakkhiṇāya ce pi disāya āgacchayya bhūsā vātavuṭṭhi n'eva taɱ saŋkampeyya, na sampakampeyya, na sampavedheyya.|| ||

Evam eva kho bhante, evaɱ sammāvimuttacittassa bhikkhuno bhūsā ce pi cakkhuviññeyyā rūpā cakkhussa apāthamāgacchanti, nev'assa cittaɱ pariyādiyanti. Amissīkatamev'assa cittaɱ hoti ṭhitaɱ āneñjappattaɱ, vayaɱ vayaɱcassānupassati. Bhūsā ce pi sotaviññeyyā saddā sotassa apāthamāgacchanti, nev'assa citataɱ pariyādiyanti. Amissīkatamev'assa cittaɱ hoti ṭhitaɱ āneñjappattaɱ, vayaɱcassānupassati.|| ||

Bhusā ce pi ghāna viññeyyā gandhā ghānassa apāthamāgacchanti, nev'assa cittaɱ pariyādiyanti. Amissīkatamev'assa cittaɱ hoti ṭhitaɱ āneñjappattaɱ, vayaɱcassānupassati.|| ||

Bhūsā ce pi jivhāviññeyyā rasā jivhassa apāthamāgacchanti, nev'assa cittaɱ pariyādiyanti. Amissīkatamev'assa cittaɱ hoti ṭhitaɱ aneñjappattaɱ, vayaɱcassānupassati.|| ||

Bhūsā ce pi kāyaviññeyyā poṭṭhabbā kāyassa apāthamāgacchanti, nev'assa cittaɱ pariyādiyanti. Amissīkatamev'assa cittaɱ hoti ṭhitaɱ āneñjappattaɱ, vayaɱcassānupassati.|| ||

Bhūsā ce pi manoviññeyyā dhammā manassa āpāthamāgacchanti, nev'assa cittaɱ pariyādiyanti, amissīkatamev'assa cittaɱ hoti ṭhitaɱ āneñajappattaɱ, vayaɱ cassānupassatī, ti.|| ||

Nekkhammaɱ adhimuttassa pavivekañca cetaso Abyāpajjhādhimuttassa upādānakkhayassa ca.|| ||

Taṇhakkhayādhimuttassa asammohañca cetaso Disvā āyatanuppādaɱ sammācittaɱ vimuccati.|| ||

Tassa sammāvimuttassa santacittassa bhikkhuno Katassa paticayo n'atthi karaṇīyaɱ na vijjati.|| ||

Selo yathā ekaghano vātena na samīrati Evaɱ rūpā rasā saddā gandhā phassā ca kevalā.|| ||

Iṭṭhā dhammā aniṭṭhā ca nappavedhenti tādino. Ṭhitaɱ cittaɱ vippamuttaɱ vayaɱcassānupassatī, ti.

 


Contact:
E-mail
Copyright Statement   Webmaster's Page