Anguttara Nikaya


[Site Map]  [Home]  [Sutta Indexes]  [Glossology]  [Site Sub-Sections]

The Pali is transliterated as IAST Unicode (āīūṃṅñṭḍṇḷ). Alternatives:
[ ASCII (aiumnntdnl) | Mobile (āīūŋńñţđņļ) | Velthuis (aaiiuu.m'n~n.t.d.n.l) ]

 

Aŋguttara Nikāya
Chakkanipata
VI. Mahā Vagga

Sutta 57

Chaḷābhijāti Suttaɱ

Adapted from the 1995 edition of the digital version of the Sri Lanka Buddha Jayanti Tripitaka Series and proofed against, and mostly resolved to the Pali Text Society Anguttara-Nikaya edited by Prof. E. Hardy, Ph.D., D.D.

 


 

[1][pts]Evaɱ me sutaɱ:|| ||

Ekaɱ samayaɱ Bhagavā Rajagahe viharati Gijjhakūṭe pabbate.|| ||

Atha kho āyasmā Ānando yena Bhagavā ten'upasaŋkami.|| ||

Upasaŋkamitvā Bhagavantaɱ abhivādetvā eka-m-antaɱ nisidī.|| ||

Eka-m-antaɱ nisinno kho āyasmā Ānando Bhagavantaɱ etad avoca:|| ||

2. "Pūraṇena bhante Kassapena chaḷābhijātiyo paññattā:||
kaṇhābhijāti paññattā,||
nīlābhijāti paññattā,||
lohitābhijāti paññattā,||
haliddāhijāti paññatatā,||
sukkābhijāti paññattā,||
paramasukkābhijāti paññattā.|| ||

Tatr'idaɱ bhante Pūraṇena Kassapena kaṇhābhijāti paññattā:||
orabhikā sūkarikā sākuṇikā māgavikā luddā macchaghātakā corā coraghātakā bandhanāgārikā,||
ye vā pan'aññe pi keci kurūrakammantā.|| ||

Tatr'idaɱ bhante Pūraṇena Kassapena nīlābhijāti paññattā:||
bhikkhū kaṇṭakavuttikā,||
ye vā pan'aññe pi keci kammavādā kiriyavādā.|| ||

Tatr'idaɱ bhante Pūraṇena Kassapena lohitābhijāti paññattā:||
nigaṇṭhā ekasā- [384] ṭakā.|| ||

Tatr'idaɱ bhante Pūraṇena Kassapena haḷiddābhijāti paññattā:||
gihī odātavasanā acelakasāvakā.|| ||

Tatr'idaɱ bhante Pūraṇena Kassapena sūkkābhijāti paññattā:||
ājivakā ājivikiniyo.|| ||

Tatr'idaɱ bhante Pūraṇena Kassapena paramasukkābhijāti paññattā:||
Nando Vaccho,||
Kiso Saŋkicco,||
Makkhali Gosālo.|| ||

Pūraṇena bhante Kassapena imā chaḷābhijātiyo paññattā" ti.|| ||

3. "Kim pan'Ānanda Pūraṇassa Kassapassa sabbo loko etad abhanujānāti imā chaḷābhijātiyo paññāpetun" ti?|| ||

"No h'etaɱ bhante."|| ||

"Seyyathā pi Ānanda pūriso daḷiddo assako anāḷḷikyo,||
tassa akāmakassa bilaɱ olaggeyyuɱ,|| ||

'Idaɱ te ambho purisa maɱsaɱ ca khāditabbaɱ mulañ ca anuppadātabban' ti.|| ||

Evam eva kho Ānanda Pūraṇena Kassapena appaṭiññāya etasaɱ samaṇa-brāhmaṇānaɱ imā chaḷābhijātiyo paññattā yathā taɱ bālena avyattena akhettaññunā akusalena.|| ||

 


 

Ahaɱ kho pan'Ānanda chaḷābhijātiyo paññāpemi.|| ||

Taɱ suṇāhi,||
sādhukaɱ manasikarohi,||
bhāsissāmi" ti.|| ||

"Evaɱ bhante",||
ti kho āyasmā Ānando Bhagavato paccassosi.|| ||

Bhagavā etad avoca:|| ||

"Katamā c'Ānanda chaḷābhijātiyo?|| ||

4. Idh'Ānanda ekacco kaṇhābhijātiyo samāno||
kaṇhaɱ dhammā abhijāyati.|| ||

Idh'Ānanda ekacco kaṇhābhijātiyo samāno||
sukkaɱ dhammaɱ abhijāyati.|| ||

Idh'Ānanda ekacco kaṇhābhijātiyo samāno||
akaṇhaɱ asukkaɱ nibbānaɱ abhijāyati.|| ||

Idh'Ānanda ekacco [385] sukkābhijātiyo sāmāno||
kaṇhaɱ dhamma abhijāyati.|| ||

Idh'Ānanda ekacco sukkābhijātiyo samāno||
sukkaɱ dhammaɱ abhijāyati.|| ||

Idh'Ānanda ekacco sukkābhijātiyo samāno||
akṇhaɱ asukkaɱ nibbānaɱ abhijāyati.|| ||

5. Kathañ c'Ānanda kaṇhābhijātiyo samāno||
kaṇhaɱ dhammaɱ abhijāyati?|| ||

Idh'Ānanda ekacco nīce kule paccājāto hoti||
caṇḍāla kule vā||
nesādakule vā||
veṇakule vā||
rathakārakale vā||
pukkusa kule vā,||
dalidde appannapānabhojane kasiravuttike yattha kasirena ghāsacchādo labbhati.|| ||

So ca hoti dubbaṇṇo duddasiko okoṭimako,||
bavhābādho kāṇo vā||
kuṇī vā||
khañjo vā||
pakkhahato vā,||
na lābhī annassa pānassa vatthassa yānassa mālāgandhavilepanassa seyyāvasathapadipeyyassa.|| ||

So kāyena duccaritaɱ carati,||
vācāya duccaritaɱ carati,||
manasā duccaritaɱ carati.|| ||

So kāyena duccaritaɱ caritvā,||
vācāya duccaritaɱ caritvā,||
manasā duccaritaɱ caritvā,||
kāyassa bhedā param maraṇā||
apāyaɱ duggatiɱ vinipātaɱ nirayaɱ upapajjati.|| ||

Evaɱ kho Ānanda kaṇhābhijātiyo samāno||
kaṇhaɱ abhijāyati.|| ||

6. Kathaɱ c'Ānanda kaṇhābhijātiyo samāno||
sukkaɱ dhammaɱ abhijāyati?|| ||

Idh'Ānanda ekacco nīce kule paccājāto hoti||
caṇḍāla kule vā||
nesādakule vā||
veṇakule vā||
rathakārakale vā||
pukkusa kule vā,||
dalidde appannapānabhojane kasiravuttike yattha kasirena ghāsacchādo labbhati.|| ||

So ca hoti dubbaṇṇo duddasiko okoṭimako,||
bavhābādho kāṇo vā||
kuṇī vā||
khañjo vā||
pakkhahato vā,||
na lābhī annassa pānassa vatthassa yānassa mālāgandhavilepanassa seyyāvasathapadipeyyassa.|| ||

So kāyena sucaritaɱ carati||
vācāya sucaritaɱ carati||
manasā sucaritaɱ carati.|| ||

So kāyena sucaritaɱ caritvā||
vācāya sucaritaɱ caritvā||
manasā sucaritaɱ caritvā||
kāyassa bhedā param maraṇā||
sugatiɱ saggaɱ lokaɱ upapajjati.|| ||

Evaɱ kho Ānanda kaṇhābhijātiyo samāno||
sukkaɱ dhammaɱ abhijāyati.|| ||

7. Kathaɱ c'Ānanda kaṇhābhijātiyo samāno||
akaṇhaɱ asukkaɱ nibbānaɱ abhijāyati?|| ||

Idh'Ānanda ekacco nīce kule paccājāto hoti||
caṇḍāla kule vā||
nesādakule vā||
veṇakule vā||
rathakārakale vā||
pukkusa kule vā,||
dalidde appannapānabhojane kasiravuttike yattha kasirena ghāsacchādo labbhati.|| ||

So ca hoti dubbaṇṇo duddasiko [386] okoṭimako.|| ||

So kesamassaɱ ohāretvā kāsāyāni vatthāni acchādetvā agārasmā anagāriyaɱ pabbajati.|| ||

So evaɱ pabbajito samāno||
pañca nīvaraṇe pahāya||
cetaso upakkilese paññāya dubbalīkaraṇe,||
catusu satipaṭṭhānesu suppatiṭṭhitacitto||
sattabojjhaŋge yathābhūtaɱ bhāvetvā||
akaṇhaɱ asukkaɱ nibbānaɱ abhijāyati.|| ||

Evaɱ kho Ānanda kaṇhābhijātiyo samāno||
akaṇhaɱ asukkaɱ nibbānaɱ abhijāyati.|| ||

8. Kathañ c'Ānanda sukkābhijātiyo samāno||
kaṇhaɱ dhammaɱ abhijāyati?|| ||

Idh'Ānanda ekacco ucce kule paccājāto hoti: khattiya-mahā-sārakule vā||
brāhmaṇa-mahā-sārakule vā||
gahapati-mahā-sārakule vā||
aḍḍhe mahaddhane mahābhoge||
pahuta-jātarūparajate||
pahuta-vittupakaraṇe||
pahuta-dhanadhaññe.|| ||

So ca hoti abhirūpo dassanīyo pāsādiko paramāya vaṇṇapokkharatāya samannāgato,||
lābhī annassa pānassa vatthassa yānassa mālāgandhavilepanassa seyyāvasathapadīpeyyassa.|| ||

So kāyena duccaritaɱ carati,||
vācāya duccaritaɱ carati,||
manasā duccaritaɱ carati.|| ||

So kāyena duccaritaɱ caritvā||
vācāya duccaritaɱ caritvā||
manasā duccaritaɱ caritvā||
kāyassa bhedā param maraṇā||
apāyaɱ duggatiɱ vinīpātaɱ nirayaɱ upapajjati.|| ||

Evaɱ kho Ānanda sukkābhijātiyo samāno||
kaṇhaɱ dhammaɱ abhijāyati.|| ||

9. Kathañ c'Ānanda sukkābhijātiyo samāno||
sukkaɱ dhammaɱ abhijāyati?|| ||

Idh'Ānanda ekacco ucce kule paccājāto hoti: khattiya-mahā-sārakule vā||
brāhmaṇa-mahā-sārakule vā||
gahapati-mahā-sārakule vā||
aḍḍhe mahaddhane mahābhoge||
pahuta-jātarūparajate||
pahuta-vittupakaraṇe||
pahuta-dhanadhaññe.|| ||

So ca hoti abhirūpo dassanīyo pāsādiko paramāya vaṇṇapokkharatāya samannāgato,||
lābhī annassa pānassa vatthassa yānassa mālāgandhavilepanassa seyyāvasathapadīpeyyassa.|| ||

So ca hoti abhirūpo dassanīyo pāsādiko paramāya vaṇṇapokkharatāya samannāgato, lābhī annassa pānassavatthassa yānassa mālāgandhavilepanassa yyovasathapadīpeyyassa.|| ||

So kāyena sucaritaɱ carati,||
vācāya sucaritaɱ carati,||
manasā sucaritaɱ carati.|| ||

So kāyena sucaritaɱ caritvā||
vacāya sucaritaɱ caritvā||
manasā sucaritaɱ caritvā||
kāyassa bhedā param maraṇā||
sugatiɱ saggaɱ lokaɱ upapajjati.|| ||

Evaɱ kho Ānanda sūkkābhijātiyo samāno||
sukkaɱ dhammaɱ abhijāyati.|| ||

10. Kathaɱ c'Ānanda sukkābhijātiyo samāno akaṇhaɱ asukkaɱ nibbānaɱ abhijāyati?|| ||

[387] Idh'Ānanda ekacco ucce kule paccājāto hoti: khattiya-mahā-sārakule vā||
brāhmaṇa-mahā-sārakule vā||
gahapati-mahā-sārakule vā||
aḍḍhe mahaddhane mahābhoge||
pahuta-jātarūparajate||
pahuta-vittupakaraṇe||
pahuta-dhanadhaññe.|| ||

So ca hoti abhirūpo dassanīyo pāsādiko paramāya vaṇṇapokkharatāya samannāgato,||
lābhī annassa pānassa vatthassa yānassa mālāgandhavilepanassa seyyāvasathapadīpeyyassa.|| ||

So kesamassuɱ ohāretvā kāsāyāni vatthāni acchādetvā āgārasmā anagāriyaɱ pabbajati.|| ||

So evaɱ pabbajito samāno||
pañca nīvaraṇe pahāya||
cetaso upakkilese paññāya dubbalīkaraṇe,||
catusu satipaṭṭhānesu suppatiṭṭhitacitto||
sattabojjhaŋge yathābhūtaɱ bhāvetvā||
akaṇhaɱ asukkaɱ nibbānaɱ abhijāyati.|| ||

Evaɱ kho Ānanda sukkābhijātiyo samāno||
akaṇhaɱ asukkaɱ nibbānaɱ abhijāyati.|| ||

Imā kho Ānanda chalābhijātiyo" ti.

 


Contact:
E-mail
Copyright Statement   Webmaster's Page