Anguttara Nikaya


[Site Map]  [Home]  [Sutta Indexes]  [Glossology]  [Site Sub-Sections]

The Pali is transliterated as IAST Unicode (āīūṃṅñṭḍṇḷ). Alternatives:
[ ASCII (aiumnntdnl) | Mobile (āīūŋńñţđņļ) | Velthuis (aaiiuu.m'n~n.t.d.n.l) ]

 

Aŋguttara Nikāya
Chakkanipata
VI. Mahā Vagga

Sutta 58

Āsava Suttaɱ

Adapted from the 1995 edition of the digital version of the Sri Lanka Buddha Jayanti Tripitaka Series and proofed against, and mostly resolved to the Pali Text Society Anguttara-Nikaya edited by Prof. E. Hardy, Ph.D., D.D.

 


 

[1][pts]Evaɱ me sutaɱ:|| ||

Ekaɱ samayaɱ Bhagavā Sāvatthiyaɱ viharati||
Jetavane Anāthapiṇḍikassa ārāme.|| ||

Tatra kho Bhagavā bhikkhu āmantesi:|| ||

"Bhikkhavo" ti.|| ||

"Bhadante" ti te bhikkhū Bhagavato paccassosuɱ.|| ||

Bhagavā etad avoca:|| ||

2. "Chahi bhikkhave dhammehi samannāgato bhikkhu āhuneyyo hoti||
pāhuneyyo||
dakkhiṇeyyo||
añjalikaraṇīyo||
anuttaraɱ puññakkhettaɱ lokassa.|| ||

Katamehi chahī?|| ||

2. Idha, bhikkhave, bhikkhūno ye āsavā saɱvarā pahātabbā,||
te āsavā saɱvarena pahīnā honti.|| ||

Ye āsavā paṭisevanā pahātabbā,||
te āsavā paṭisevanāya pahīnā honti.|| ||

Ye āsavā adhivāsanā pahātabbā,||
te āsavā adhivāsanāya pahīnā honti.|| ||

Ye āsavā parivajjanā pahātabbā,||
te āsavā parivajjanāya pahīnā honti.|| ||

Ye āsavā vinodanā pahātabbā,||
te āsavā vinodanāya pahīnā honti.|| ||

Ye āsavā bhāvanā pahātabbā,||
te āsavā bhāvanāya pahīnā honti.|| ||

 

§

 

3. Katame ca bhikkhave āsavā saɱvarā pahātabbā,||
ye saɱvarena pahīnā honti?|| ||

Idha bhikkhave bhikkhū paṭisaŋkhā yoniso cakkhūndriya-saɱvara-saɱvuto viharati.|| ||

Yaɱ hi'ssa bhikkhave cakkhūndriya-saɱvaraɱ-asaɱvutassa viharato||
uppajjeyyuɱ [388] āsavā vighātapariḷāhā,||
cakkhūndriya-saɱvara-saɱvutassa viharato||
evaɱsa te āsavā vighātapariḷāhā na honti.|| ||

Paṭisaŋkhā yoniso sotindriya-saɱvara-saɱvuto viharati.|| ||

Yaɱ hi'ssa bhikkhave sotindriya-saɱvaraɱ-asaɱvutassa viharato||
uppajjeyyuɱ āsavā vighātapariḷāhā||
sotindriya-saɱvara-saɱvutassa viharato||
evaɱsa te āsavā vighātapariḷāhā na honti.|| ||

Paṭisaŋkā yoniso ghānindriya-saɱvara-saɱvuto viharati.|| ||

Yaɱ hi'ssa bhikkhave ghānindriya-saɱvaraɱ-asaɱvutassa viharato||
uppajjeyyuɱ āsavā vighātapariḷāhā,||
ghānindriya-saɱvara-saɱvutassa viharato||
evaɱsa te āsavā vighātapariḷāhā na honti.|| ||

Paṭisaŋkā yoniso jivahindriya-saɱvara-saɱvuto viharati.|| ||

Yaɱ hi'ssa bhikkhave jivahindriya-saɱvaraɱ-asaɱvutassa viharato||
uppajjeyyuɱ āsavā vighātapariḷāhā,||
jivahindriya-saɱvara-saɱvutassa viharato||
evaɱsa te āsavā vighātapariḷāhā na honti.

Paṭisaŋkhā yoniso kāyindriya-saɱvara-saɱvuto viharati.|| ||

Yaɱ hi'ssa bhikkhave kāyindriya-saɱvara-asaɱvutassa viharato||
uppajjeyyuɱ āsavā vighātapariḷāhā,||
kāyindriya-saɱvara-saɱvutassa viharato||
evaɱsa te āsavā vighātapariḷāhā na honti.|| ||

Paṭisaŋkhā yoniso maninadriya-saɱvara-saɱvuto viharati.|| ||

Yaɱ hi'ssa bhikkhave manindriya-saɱvara-asaɱvutassa viharato||
uppajjeyyuɱ āsavā vighātapariḷāhā,||
manindriya-saɱvara-saɱvutassa viharato||
evaɱsa te āsavā vighātapariḷāhā na honti.|| ||

Yaɱ hi'ssa bhikkhave saɱvaraɱ-asaɱvutassa viharato||
uppajjeyyuɱ āsavā vighātapariḷāhā,||
saɱvaraɱ-saɱvutassa viharato||
evaɱsa te āsavā vighātapariḷāhā na honti.|| ||

Ime vuccanti bhikkhave āsavā saɱvarā pahātabbā||
ye saɱvarena pahīnā honti.|| ||

 


 

4. Katame ca bhikkhave āsavā paṭisevanā pahātabbā,||
ye paṭisevanāya pahīnā honti?|| ||

Idha bhikkhave bhikkhū||
paṭisaŋkhā yoniso cīvaraɱ paṭisevati yāva-d-eva sītassa paṭighātāya,||
uṇhassa paṭighātāya,||
ḍaɱsamakasavātātapasiriɱsapasamphassānaɱ paṭighātāya,||
yāva-d-eva hirikopina-paṭicchā-danatthaɱ.|| ||

Paṭisaŋkhā yoniso piṇḍapātaɱ paṭisevati||
n'eva davāya,||
na madāya,||
na maṇḍanāya,||
na vibhūsanāya,||
yāva-d-eva imassa kāyassa ṭhitiyā yāpanāya vihiɱsūparatiyā,||
brahmacariyā-nuggahāya.|| ||

Iti pūrāṇañ ca vedanaɱ paṭihaŋkhāmi,||
nacañ ca vedanaɱ||
na uppādessāmi.|| ||

Yātrāva me bhavissati anavajjatā ca phāsuvihāro cāti.|| ||

Paṭisaŋkā yoniso senāsanaɱ paṭisevati||
yāva-d-eva sītassa paṭighātāya,||
uṇhassa paṭighātāya,||
ḍaɱsamakasavātātapasiriɱsapasamphassānaɱ paṭighātāya,||
yāva-d-eva utuparissaya-vinodanaɱ paṭisallānārāmatthaɱ.|| ||

Paṭisaŋkhā yoniso galānapaccayahesajjaparikkhāraɱ paṭisevati||
yāva-d-eva uppannānaɱ veyyābādhikānaɱ vedanānaɱ paṭighātāya,||
avyāpajjhaparamatāyā.|| ||

[389] Yaɱ hi'ssa bhikkave appaṭisevato uppajjeyyuɱ āsavā vighāta-pariḷāhā,||
paṭisevato evaɱsa te āsavā vighātapariḷāhā na honti.|| ||

Ime vuccanti bhikkhave āsavā paṭisevanā pahātabbā||
ye paṭisevanāya pahīnā honti.|| ||

 


 

5. Katame ca bhikkhave āsavā adhivāsanā pahātabbā,||
ye adhivāsanā pahinā honti?|| ||

Idha bhikkhave bhikkhu paṭisaŋkhā yoniso khamo hoti sītassa uṇhassa jighacchāya pipāsāya ḍaɱsamakasavātātapasiriɱsapasamphassānaɱ,||
duruttānaɱ||
durāgatānaɱ||
vacanapathānaɱ,||
uppannānaɱ||
sārīrikānaɱ||
vedanānaɱ||
dukkhānaɱ||
tibbānaɱ||
kharānaɱ||
kaṭukānaɱ||
asātānaɱ||
amanāpānaɱ,||
pāṇaharānaɱ||
adhivāsakajātiko hoti.|| ||

Yaɱ hi'ssa bhikkhave anadhivāsayato||
uppajjeyyuɱ āsavā vighātapariḷāhā,||
adhivāsayato evaɱsa te āsavā vighātapariḷāhā na honti.|| ||

Ime vuccanti bhikkhave āsavā adhivāsanā pahātabbā,||
ye adhivāsanāya pahīnā vontī.|| ||

 


 

6. Katame ca bhikkhave āsavā parivajjanā pahātabbā,||
ye parivajjanāya pahīnā honti?|| ||

Idha bhikkhave bhikkhū paṭisaŋaɱkhā yoniso||
caṇḍaɱ hatthiɱ parivajjeti,||
caṇḍaɱ assaɱ parivajjeti,||
caṇḍaɱ goṇaɱ parivajjeti,||
caṇḍaɱ kukkuraɱ parivajjeti,||
ahiɱ khāṇuɱ kaṇṭakāṭṭānaɱ sobbhaɱ papātaɱ candanikaɱ oligallaɱ,||
yathārūpe anāsane nisinnaɱ,||
yathārūpe agocare carantaɱ,||
yathārūpe pāpake mitte bhajantaɱ,||
viññū sabrahmacārī pāpakesu ṭhānesu okappeyyuɱ,||
so taɱ c'eva anāsanaɱ tañ ca agocaraɱ te ca pāpake mitte paṭisaŋkhā yoniso parivajjeti.|| ||

Yaɱ hi'ssa bhikkhave aparivajjayato uppajjayato uppajjeyyuɱ āsavā vighātapariḷāhā,||
parivajjayato evaɱsa te āsavā vighātapariḷāhā na honti.|| ||

[390] Ime vuccanti bhikkhave āsavā parivajjanā pahātabba,||
ye parivajjanāya pahīnā honti.|| ||

 


 

7. Katame ca bhikkhave āsavā vinodanā pahātabbā,||
ye vinodanāya pahīṇā honti?|| ||

Idha, bhikkhave, bhikkhū||
paṭisaŋakhā yoniso uppannaɱ kāma-vitakkaɱ||
nādhivāseti,||
pajahati vinodeti,
vyantikaroti,
anabhāvaɱ gameti;|| ||

paṭisaŋkhā yoniso uppannaɱ vyāpāda-vitakkaɱ||
nādhivāseti,||
pajahati vinodeti,
vyantikaroti,
anabhāvaɱ gameti;|| ||

paṭisaŋkhā yoniso uppannaɱ vihiɱsā-vitakkaɱ||
nādhivāseti,||
pajahati vinodeti,
vyantikaroti,
anabhāvaɱ gameti;|| ||

paṭisaŋkhā yoniso uppannuppanne pāpake akusale dhamme nādhivāseti,||
pajahati vinodeti,
vyantikaroti,
anabhāvaɱ gameti.|| ||

Yaɱ hi'ssa bhikkhave avinodayato uppajjeyyuɱ āsavā vighātapariḷāhā,||
vinodayato evaɱsa te āsavā vighātapariḷāhā na honti.|| ||

Ime vuccanti bhikkhave āsavā vinodanā pahātabbā||
ye vinodanāya pahīnā honti.|| ||

 


 

8. Katame ca bhikkhave āsavā bhāvanāya pahātabbā,||
ye bāvanāya pahīṇā honti?|| ||

Idha bhikkhave bhikakhū paṭisaŋkhā yoniso satisambojjhaŋghaɱ bhāveti||
vivekanissitaɱ||
virāganissitaɱ||
nirodhanissitaɱ||
vossaggaparināmiɱ.|| ||

Idha, bhikkhave, bhikkhu paṭisaŋkhā yoniso sammavicayasambojjhaŋgaɱ bhāveti||
vivekanissitaɱ||
virāganissitaɱ||
nirodhanissitaɱ||
vossaggaparināmiɱ.|| ||

Idha, bhikkhave, bhikkhu paṭisaŋkhā yoniso vīriyasambojjhāŋgaɱ bhāveti||
vivekanissitaɱ||
virāganissitaɱ||
nirodhanissitaɱ||
vossaggaparināmiɱ.|| ||

Idha, bhikkhave, bhikkhu paṭisaŋkhā yoniso pitisambojjhaŋgaɱ hāveti||
vivekanissitaɱ||
virāganissitaɱ||
nirodhanissitaɱ||
vossaggaparināmiɱ.|| ||

Idha, bhikkhave, bhikkhu paṭisaŋkhā yoniso passaddhisambojjhaŋgaɱ bhāveti||
vivekanissitaɱ||
virāganissitaɱ||
nirodhanissitaɱ||
vossaggaparināmiɱ.|| ||

Idha, bhikkhave, bhikkhu paṭisaŋkhā yoniso samādhisambojjhaŋgaɱ bhāveti||
vivekanissitaɱ||
virāganissitaɱ||
nirodhanissitaɱ||
vossaggaparināmiɱ.|| ||

Idha, bhikkhave, bhikkhu paṭisaŋkhā yoniso upekkhāsambojjhaŋgaɱ bhāveti||
vivekanissitaɱ||
virāganissitaɱ||
nirodhanissitaɱ||
vossaggaparināmiɱ.|| ||

Yaɱ hi'ssa bhikkhave abhāvayato uppajjeyyuɱ āsavā vighātapariḷāhā bhāvayato evaɱsa te āsavā vighātaparisāhā na honti.|| ||

Ime vuccanti bhikkhave āsavā bhāvanā pahātabbā,||
ye bhāvanāya pahīnā honti.|| ||

Imehi pakhā bhikkhave chahi dhammehi samannāgato bhikkhu āhuneyyo hoti pāhuneyyo dakkhiṇeyyo añjalikaraṇīyo anuttaraɱ puññakkhettaɱ lokassā" ti.

 


Contact:
E-mail
Copyright Statement   Webmaster's Page