Anguttara Nikaya


[Site Map]  [Home]  [Sutta Indexes]  [Glossology]  [Site Sub-Sections]

The Pali is transliterated as IAST Unicode (āīūṃṅñṭḍṇḷ). Alternatives:
[ ASCII (aiumnntdnl) | Mobile (āīūŋńñţđņļ) | Velthuis (aaiiuu.m'n~n.t.d.n.l) ]

 

Aŋguttara Nikāya
Chakkanipata
VII. Devatā Vagga

Sutta 69

Devatā Suttaɱ

Adapted from the 1995 edition of the digital version of the Sri Lanka Buddha Jayanti Tripitaka Series and proofed against, and mostly resolved to the Pali Text Society Anguttara-Nikaya edited by Prof. E. Hardy, Ph.D., D.D.

 


 

[1][pts]Evaɱ me sutaɱ:|| ||

Ekaɱ samayaɱ Bhagavā Sāvatthiyaɱ viharati||
Jetavane Anāthapiṇḍikassa ārāme.|| ||

Tatra kho Bhagavā bhikkhu āmantesi:|| ||

"Bhikkhavo" ti.|| ||

"Bhadante" ti te bhikkhū Bhagavato paccassosuɱ.|| ||

Bhagavā etad avoca:|| ||

2. "Atha kho aññatarā devatā abhikkantāya rattiyā abhikkantavaṇṇā kevalakappaɱ Jetavanaɱ obhāsetvā yena Bhagavā ten'upasaŋkami.|| ||

Upasaŋkamitvā Bhagavantaɱ abhivādetvā eka-m-antaɱ aṭṭhāsi.|| ||

Eka-m-antaɱ ṭhitā kho sā devatā Bhagavantaɱ etad avoca:|| ||

"Cha yime bhante dhammā bhikkhuno aparihānāya saɱvattanti.|| ||

Katame cha?|| ||

Satthu-gāravatā,||
dhamma-gāravatā,||
saŋgha-gāravatā,||
sikkhā-gāravatā,||
sovacassatā,||
kalyāṇamittatā.|| ||

Ime kho bhante cha dhammā bhikkhuno aparihānāya saɱvattanti" ti.|| ||

Idam avoca sā devatā.|| ||

Samanuñño Satthā ahosi.|| ||

Atha kho sā devatā||
"Samanuñño me Satthā", ti||
Bhagavantaɱ abhivādetvā padakkhiṇaɱ katvā tatth'ev'antaradhāyi.|| ||

 


 

[424] 2. Atha Bhagavā tassā rattiyā accayena bhikkhū āmantesi:|| ||

"Imaɱ bhikkhave rattiɱ aññatarā devatā abhikkantāya rattiyā abhikkantavaṇṇā kevalakappaɱ Jetavanaɱ obhāsetvā yenāhaɱ ten'upasaŋkami.|| ||

Upasaŋkamitvā maɱ abhivādetvā eka-m-antaɱ aṭṭhāsi.|| ||

Eka-m-antaɱ ṭhitā kho bhikkhave sā devatā maɱ etad avoca:|| ||

"Cha yime bhante dhammā bhikkhuno aparihānāya saɱvattanti.|| ||

Katame cha?|| ||

Satthu-gāravatā,||
dhamma-gāravatā,||
saŋgha-gāravatā,||
sikkhā-gāravatā,||
sovacassatā,||
kalyāṇamittatā.|| ||

Ime kho bhante cha dhammā bhikkhuno aparihānāya saɱvattantiti" ti.|| ||

Idam avoca bhikkhave sā devatā.|| ||

Idaɱ vatvā maɱ abhivādetvā padakkhiṇaɱ katvā tatth'ev'antaradhāyī" ti.|| ||

 


 

3. Evaɱ vutte āyasmā Sāriputto Bhagavantaɱ etad avoca:|| ||

"Imassa kho ahaɱ bhante Bhagavatā saŋkhittena bhāsitassa evaɱ vitthārena atthaɱ ājānāmi:|| ||

Idha bhante bhikkhū||
attanā ca satthu-gāravo hoti||
satthu-gāravatāya ca vaṇṇavādi,||
ye c'aññe bhikkhū na satthu-gāravā,||
te ca satthu-gāravatāya samādapeti,||
ye caññe bhikkhū satthu-gāravā,||
tesañ ca vaṇṇaɱ bhāṇati bhūtaɱ tacchaɱ kālena.|| ||

Attanā ca dhamma-gāravo hoti||
dhamma-gāravatāya ca vaṇṇavādi,||
ye c'aññe bhikkhū na dhamma-gāravā,||
te ca dhamma-gāravatāya samādapeti,||
ye caññe bhikkhū dhamma-gāravā,||
tesañ ca vaṇṇaɱ bhāṇati bhūtaɱ tacchaɱ kālena.|| ||

Attanā ca saŋgha-gāravo hoti||
saŋgha-gāravatāya ca vaṇṇavādi,||
ye c'aññe bhikkhū na saŋgha-gāravā,||
te ca saŋgha-gāravatāya samādapeti,||
ye caññe bhikkhū saŋgha-gāravā,||
tesañ ca vaṇṇaɱ bhāṇati bhūtaɱ tacchaɱ kālena.|| ||

Attanā ca sikkhā-gāravo hoti||
sikkhā-gāravatāya ca vaṇṇavādi,||
ye c'aññe bhikkhū na sikkhā-gāravā,||
te ca sikkhā-gāravatāya samādapeti,||
ye caññe bhikkhū sikkhā-gāravā,||
tesañ ca vaṇṇaɱ bhāṇati bhūtaɱ tacchaɱ kālena.|| ||

Attanā ca suvaco hoti[ed1]||
suvacāya ca vaṇṇavādi,||
ye c'aññe bhikkhū na suvacā,||
te ca suvacāya samādapeti,||
ye caññe bhikkhū suvacā,||
tesañ ca vaṇṇaɱ bhāṇati bhūtaɱ tacchaɱ kālena.|| ||

Attanā ca kalyāṇamitto hoti||
kalyāṇamittāya ca vaṇṇavādi,||
ye c'aññe bhikkhū na kalyāṇamittā,||
te ca kalyāṇamittāya samādapeti,||
ye caññe bhikkhū kalyāṇamittā,||
tesañ ca vaṇṇaɱ bhāṇati bhūtaɱ tacchaɱ kālena.|| ||

Imassa kho ahaɱ bhante Bhagavatā saŋkhitte bhāsitassa evaɱ vitthārena attha ājānāmi" ti.

 


 

4. "Sādhu sādhu Sāriputta,||
sādhu kho tvaɱ Sāriputta||
imassa mayā saŋkhittena bhāsitassa evaɱ vitthārena atthaɱ ājānāsi.

Idha Sāriputta bhikkhu||
attanā ca satthu-gāravo hoti||
satthu-gāravatāya ca vaṇṇavādi,||
ye c'aññe bhikkhū na satthu-gāravā,||
te ca satthu-gāravatāya samādapeti,||
ye caññe bhikkhū satthu-gāravā,||
tesañ ca vaṇṇaɱ bhāṇati bhūtaɱ tacchaɱ kālena.|| ||

Attanā ca dhamma-gāravo hoti||
dhamma-gāravatāya ca vaṇṇavādi,||
ye c'aññe bhikkhū na dhamma-gāravā,||
te ca dhamma-gāravatāya samādapeti,||
ye caññe bhikkhū dhamma-gāravā,||
tesañ ca vaṇṇaɱ bhāṇati bhūtaɱ tacchaɱ kālena.|| ||

Attanā ca saŋgha-gāravo hoti||
saŋgha-gāravatāya ca vaṇṇavādi,||
ye c'aññe bhikkhū na saŋgha-gāravā,||
te ca saŋgha-gāravatāya samādapeti,||
ye caññe bhikkhū saŋgha-gāravā,||
tesañ ca vaṇṇaɱ bhāṇati bhūtaɱ tacchaɱ kālena.|| ||

Attanā ca sikkhā-gāravo hoti||
sikkhā-gāravatāya ca vaṇṇavādi,||
ye c'aññe bhikkhū na sikkhā-gāravā,||
te ca sikkhā-gāravatāya samādapeti,||
ye caññe bhikkhū sikkhā-gāravā,||
tesañ ca vaṇṇaɱ bhāṇati bhūtaɱ tacchaɱ kālena.|| ||

Attanā ca suvaco hoti||
suvacāya ca vaṇṇavādi,||
ye c'aññe bhikkhū na suvacā,||
te ca suvacāya samādapeti,||
ye caññe bhikkhū suvacā,||
tesañ ca vaṇṇaɱ bhāṇati bhūtaɱ tacchaɱ kālena.|| ||

Attanā ca kalyāṇamitto hoti||
kalyāṇamittāya ca vaṇṇavādi,||
ye c'aññe bhikkhū na kalyāṇamittā,||
te ca kalyāṇamittāya samādapeti,||
ye caññe bhikkhū kalyāṇamittā,||
tesañ ca vaṇṇaɱ bhāṇati bhūtaɱ tacchaɱ kālena.|| ||

Imassa kho Sāriputta mayā saŋkhittena bhāsitassa evaɱ vitthārena attho daṭṭhabbo" ti.|| ||

 


[ed1] This is just a guess at the construction of this paragraph and should be checked.

 


Contact:
E-mail
Copyright Statement   Webmaster's Page