Anguttara Nikaya


[Site Map]  [Home]  [Sutta Indexes]  [Glossology]  [Site Sub-Sections]

The Pali is transliterated as IAST Unicode (āīūṃṅñṭḍṇḷ). Alternatives:
[ ASCII (aiumnntdnl) | Mobile (āīūŋńñţđņļ) | Velthuis (aaiiuu.m'n~n.t.d.n.l) ]

 

Anguttara Nikāya
Sattaka Nipāta

Sutta 6

Vitthata Dhana Suttaɱ

Adapted from the 1995 edition of the digital version of the Sri Lanka Buddha Jayanti Tripitaka Series and proofed against, and mostly resolved to the Pali Text Society Aŋguttara-Nikāya edited by Prof. E. Hardy, PhD., D.D..

 


 

[1][pts][ati][upal] EVAṂ ME SUTAṂ.||
Ekaɱ samayaɱ Bhagavā Sāvatthiyaɱ viharati Jetavane Anāthapiṇḍikassa ārāme.|| ||

Tatra kho Bhagavā bhikkhū āmantesi:||
Bhikkhavo ti.||
Bhadante ti te bhikkhū Bhagavato paccassosuɱ.||
Bhagavā etad avoca:|| ||

Sattimāni bhikkhave, dhanāni.|| ||

Katamāni satta?|| ||

Saddhādhanaɱ,||
ladhanaɱ,||
hiridhanaɱ,||
ottappadhanaɱ,||
sutadhanaɱ,||
cāgadhanaɱ,||
paññādhanaɱ.|| ||

(1) Katamañ ca bhikkhave, saddhādhanaɱ?|| ||

Idha, bhikkhave,||
ariyasāvako saddho hoti.|| ||

Saddahati Tathāgatassa bodhiɱ:||
iti pi so Bhagavā arahaɱ Sammā-sambuddhovijjācaraṇa sampanno sugato loka-vidū anuttaro purisadammasārathi satthā deva-manussānaɱ buddho Bhagavā" ti|| ||

Idaɱ vuccati bhikkhave, saddhādhanaɱ.|| ||

(2) Katamañ ca bhikkhave, sīladhanaɱ?|| ||

Idha, bhikkhave,||
ariyasāvako pāṇātipātā paṭivirato hoti,||
adinnādānā paṭivirato hoti,||
kāmesumicchācārā paṭivirato hoti,||
musā-vādā paṭivirato hoti,||
surāmeraya majjapamādaṭṭhānā paṭivirato hoti.|| ||

Idaɱ vuccati bhikkhave, sīladhanaɱ.|| ||

(3) Katamañ ca bhikkhave, hiridhanaɱ?|| ||

Idha, bhikkhave,||
ariyasāvako hirimā hoti.|| ||

Hiriyati kāyaduccaritena||
vacīduccaritena,||
manoduccaritena,||
hirīyati pāpakānaɱ akusalānaɱ dhammānaɱ samāpattiyā.|| ||

Idaɱ vuccati bhikkhave, hiridhanaɱ.|| ||

(4) Katamañ ca bhikkhave, ottappadhanaɱ?|| ||

Idha, bhikkhave, ariyasāvako ottappī hoti.|| ||

Ottapati kāyaduccaritena,||
vaciduccaritena,||
manoduccaritena,||
ottapati pāpakānaɱ akusalānaɱ dhammānaɱ samāpattiyā.|| ||

Idaɱ vuccati bhikkhave, ottappadhanaɱ.|| ||

(5) Katamañ ca bhikkhave, sutadhanaɱ?|| ||

Idha, bhikkhave, ariyasāvako bahussuto hoti sutadharo sutasannicayo.|| ||

Ye te dhammā ādikalyāṇā majjhekalyāṇā pariyosānakalyāṇā sātthaɱ savyañjanaɱ kevalaparipuṇṇaɱ parisuddhaɱ,||
brahmacariyaɱ abhivadanti,||
tathārūpāssa dhammā bahussutā honti,||
dhatā vacasā parivitā manasānupekkhitā diṭṭiyā suppaṭividdhā,||
idaɱ vuccati bhikkhave, sutadhanaɱ.|| ||

(6) Katamañ ca bhikkhave, cāgadhanaɱ?|| ||

Idha, bhikkhave, ariyasāvako vigatamala maccherena cetasā agāraɱ ajjhāvasati,||
muttacāgo payatapāṇī vossaggarato yāva yogo dānasaɱvihāgarato.|| ||

Idaɱ vuccati bhikkhave, cāgadhanaɱ.|| ||

(7) Katamañ ca bhikkhave, paññādhanaɱ?|| ||

Idha, bhikkhave, ariyasāvako paññavā hoti udayatthagāminiyā paññāya samannāgato ariyāya nibbedhikāya sammā dukkhakkhaya gāminiyā.|| ||

Idaɱ vuccati bhikkhave, paññādhanaɱ.|| ||

Imāni kho bhikkhave, satta dhanānī, ti.|| ||

 

Saddhādhanaɱ sīladhanaɱ hiri ottappiyaɱ dhanaɱ||
Sutadhanaɱ ca cāgo ca paññā ce sattamaɱ dhanaɱ.|| ||

Yassa ete dhanā atthi itthiyā purisassa vā||
Ada'iddoti taɱ āhu amoghaɱ tassa jīvitaɱ.|| ||

Tasmā saddhañca sīlañca pasādaɱ dhammadassanaɱ||
Anuyuñjetha medhāvi saraɱ buddhāna sāsananti.|| ||

 


Contact:
E-mail
Copyright Statement   Webmaster's Page