Anguttara Nikaya


[Site Map]  [Home]  [Sutta Indexes]  [Glossology]  [Site Sub-Sections]

The Pali is transliterated as IAST Unicode (āīūṃṅñṭḍṇḷ). Alternatives:
[ ASCII (aiumnntdnl) | Mobile (āīūŋńñţđņļ) | Velthuis (aaiiuu.m'n~n.t.d.n.l) ]

 

Anguttara Nikāya
Sattaka Nipāta

Sutta 22

Dutiya Bhikkhū Aparihāniya Suttaɱ

Adapted from the 1995 edition of the digital version of the Sri Lanka Buddha Jayanti Tripitaka Series and proofed against, and mostly resolved to the Pali Text Society Aŋguttara-Nikāya edited by Prof. E. Hardy, PhD., D.D..

 


 

[1][pts] EVAṂ ME SUTAṂ.|| ||

Ekaɱ samayaɱ Bhagavā Sāvatthiyaɱ viharati.|| ||

Satta vo bhikkhave,||
aparihānīye dhamme desissāmi.|| ||

Taɱ sunātha||
sādhukaɱ||
manasikarotha||
bhāsissāmi ti.

'Evaɱ bhante' ti kho te bhikkhū Bhagavato paccassosuɱ.|| ||

Bhagavā etad avoca:|| ||

2. Katame ca bhikkhave,||
satta aparihānīyā dhammā?|| ||

Yāvakīvañ ca bhikkhave,||
bhikkhū na kammārāmā bhavissanti,||
na kammārāmataɱ anuyuttā,||
vuddhi yeva bhikkhave,||
bhikkhūnaɱ pāṭikaŋkhā no parihāni.|| ||

Yāvakīvañ ca bhikkhave,||
bhikkhū na bhassārāmā bhavissanti;|| ||

yāvakīvañ ca bhikkhave,||
bhikkhū na niddārāmā bhavissanti;|| ||

yāvakīvañ ca bhikkhave,||
bhikkhū na saŋgaṇikārāmā bhavissanti;|| ||

yāvakīvañ ca bhikkhave,||
bhikkhū na pāpicchā bhavissanti;|| ||

yāvakīvañ ca bhikkhave,||
bhikkhū pāpikānaɱ icchānaɱ vasaɱ gatā bhavissanti;|| ||

yāvakīvañ ca bhikkhave,||
bhikkhū na pāpamittā bhavissanti||
na pāpasahāyā||
na pāpasampavaŋkā bhavissanti;|| ||

yāvakīvañ ca bhikkhave,||
bhikkhu na oramattakena visesādhigamena antarāvosānaɱ āpajjissanti,||
vuddhiyeva bhikkhave,||
bhikkhūnaɱ pāṭikaŋkhā no parihānī.|| ||

Yāvakīvañ ca bhikkhave,||
ime satta aparihānīyā dhammā bhikkhūsu ṭhassantī,||
imesu ca sattasu aparihānīyesu dhammesu bhikkhu sandissanti,||
vuddhiyeva bikkhave,||
bhikkhūnaɱ pāṭikaŋkhā no parihānī ti.

 


Contact:
E-mail
Copyright Statement   Webmaster's Page