Anguttara Nikaya


[Site Map]  [Home]  [Sutta Indexes]  [Glossology]  [Site Sub-Sections]

The Pali is transliterated as IAST Unicode (āīūṃṅñṭḍṇḷ). Alternatives:
[ ASCII (aiumnntdnl) | Mobile (āīūŋńñţđņļ) | Velthuis (aaiiuu.m'n~n.t.d.n.l) ]

 

Anguttara Nikāya
Sattaka Nipāta

Sutta 31

Appamādagārava Suttaɱ

Adapted from the 1995 edition of the digital version of the Sri Lanka Buddha Jayanti Tripitaka Series and proofed against, and mostly resolved to the Pali Text Society Aŋguttara-Nikāya edited by Prof. E. Hardy, PhD., D.D..

 


 

[1][ati][pts] EVAṂ ME SUTAṂ.|| ||

Ekaɱ samayaɱ Bhagavā Sāvatthiyaɱ viharati.|| ||

Atha kho aññatarā devatā abhikkantāya rattiyā abhikkantavaṇṇā kevalakappaɱ Jetavanaɱ obhāsetvā yena Bhagavā ten'upasaŋkamī.|| ||

Upasaŋkamitvā Bhagavantaɱ abhivādetvā eka-m-antaɱ aṭṭhāsi.|| ||

Eka-m-antaɱ ṭhitā kho sā devatā Bhagavantaɱ etad avoca:|| ||

Satt'ime bhante, dhammā bhikkhuno aparihānāya saɱvattanti.|| ||

Katame satta?|| ||

Satthugāravatā,||
dhammagāravatā,||
saŋghārāravatā,||
sikkhāgāravatā,||
samādigāravatā,||
appamādagāravatā,||
paṭisatthāragāravatā.|| ||

Ime kho bhante, satta dhammā bhikkhuno aparihānāya saɱvattantī, tī|| ||

Idam avoca sā devatā,||
Samanuñño Satthā avosi.|| ||

Atha kho sā devatā||
'samanuñño me Satthā'ti.|| ||

Bhagavantaɱ abhivādetvā padakkhiṇaɱ katvā tatth'ev'antaradhāyī.|| ||

2. Atha kho Bhagavā tassā rattiyā accayena bhikkhū āmantesi:|| ||

Imaɱ bhikkhave, rattiɱ aññatarā devatā abhikkantāya ratatiyā abhikkantavaṇṇā kelakappaɱ Jetavanaɱ obhāsetvā yenāhaɱ ten'upasaŋkami.|| ||

Upasaŋkamitvā maɱ abhivādetvā eka-m-antaɱ aṭṭhāsi.|| ||

Eka-m-antaɱ ṭhitā kho bhikkhave sā devatā maɱ etad avoca:|| ||

'Satt'ime bhante, dhammā bhikkhuno aparihānāya saɱvattanti.|| ||

Katame satta?|| ||

Satthugāravatā,||
dhammagāravatā,||
saŋghārāravatā,||
sikkhāgāravatā,||
samādigāravatā,||
appamādagāravatā,||
paṭisatthāragāravatā.|| ||

Ime kho bhante, satta dhammā bhikkhuno aparihānāya saɱvattantī, tī.|| ||

Idam avoca bhikkhave sā devatā.|| ||

Idaɱ vatvā maɱ abhivādetvā padakkhiṇaɱ katvā tatth'ev'antaradhāyi, tī.

Satthugaru dhammagaru saŋghe ca tibbagāravo,||
Samādhigaru ātāpi sikkhāya tibbagāravo.||
Appamādagaru bhikkhū paṭisatthāragāravo,||
Abhabbo parihānāya nibbānass'eva santike, ti.|| ||


Contact:
E-mail
Copyright Statement   Webmaster's Page